Bank RBK-дан 144 млрд теңге жымқыру ісі бойынша сотталған бұрынғы банкир Жомарт Ертаевтың бас бостандығынан айыру мерзімі аяқталып, ол бүгін, 16 қыркүйекте босап шықты, деп хабарлайды dalanews.kz.
Ертаев 2020 жылы Bank RBK-дан 144 млрд теңге жымқыруды ұйымдастырғаны және қылмыстық жолмен алынған ақша мен мүлікті аса ірі көлемде заңдастырғаны үшін 11 жылға сотталған. Кейін апелляциялық сот оның жазасын тоғыз жылға дейін қысқартқан.
Ол 2018 жылғы 15 қарашада қамауға алынған. Сот дерегіне сәйкес, қамауда болған уақыты жаза мерзіміне «бір күнге бір жарым күн» есебімен есептелген. 2025 жылғы 2 қыркүйектегі жағдай бойынша Ертаев 8 жыл 3 ай 14 күн жазасын өтеп, тағы 11 ай 16 күн қалған.
2025 жылдың қыркүйегінде Ертаев Конституцияның 30 жылдығына байланысты рақымшылық туралы заң негізінде мерзімінен бұрын босатылған. Алайда кейін бұл шешім апелляциялық тәртіппен жойылып, ол колонияға қайтарылды.
Соттың түсіндіруінше, рақымшылық туралы шешімнің күшін жоюға оның жазасын есептеуге қатысты мәселелер мен сот актілеріндегі мерзімдерге байланысты сәйкессіздіктер негіз болған.
Ертаевтың қазіргі босатылуы рақымшылықпен емес, тағайындалған жаза мерзімінің толық аяқталуымен байланысты. Бүгінгі таңда оның тоғыз жылдық жаза мерзімі аяқталды.
