Zۋمەرلەر نەگە جاپپاي كوشەگە شىعا باستادى؟ بۇل ساۋالعا Baigarayev Sarap ارناسى جاۋاپ ىزدەپ كورگەن، دەپ حابارلايدى Dalanews.kz.
"وسىدان 13-14 جىل بۇرىن "اراب كوكتەمى" دەگەن تولقىن ءبىراز افريكا، اراب ەلدەرىن شايقاپ كەتكەن ەدى. ەندى سوڭعى جىلدارى زۋمەر بۋىن الاڭعا ءجيى شىعا باستادى. ءبىر قىزىعى، بۇل جولى وڭتۇستىك-شىعىس ازيا ايماعىندا ءجيى بايقالادى.
ءبىراق ءبىر ايماقپەن شەكتەلمەيدى. مىسالى، ەۋروپانىڭ كوپ ەلىندە پالەستينانى قولداعان نارازىلىق اكسيالارىنا Z بۋىن وكىلدەرى كوپتەپ كەلگەن. نەمەسە كەزىندە Black Lives Matter دەپ اقش-تا قارا ناسىلدىلەر جاپپاي نارازىلىعىن بىلدىرگەن ەدى. سوندا كوشەگە شىققانداردىڭ تەڭ جارتىسى 30-عا دەيىنگى جاستار بولعان"، - دەپ جازىلعان مالىمەتتە.
ارنا دەرەگىنشە، زۋمەرلەردىڭ ەرەۋىلى سوڭعى جىلدارى نەپال، شري-لانكا، ماروككو، بانگلادەش، يندونەزيا، فيليپپين، گونكونگ، تايلاندتا بايقالعان. ماداگاسكار، پەرۋدە دە جاس بۋىن شىققان. زۋمەرلەر نەگە نارازى؟ نەگە ولار جىلدام ۇيىمداسىپ، وتە اۋقىمدى ەرەۋىل ۇيىمداستىرا الادى؟
"ەڭ الدىمەن، ءار ەلدىڭ جايى بولەك. ءار ەلدە حالىقتىڭ نارازىلىعىن تۋعىزعان فاكتور باسقا. نەپالدا نارازىلىق شەنەۋنىكتەردىڭ بالالارى بايلىعىن ماقتانا تۇسكەن فوتولارعا قارسىلىق رەتىندە باستالعان. فيليپپيندە سەلدىڭ سالدارىن جويۋعا بولىنگەن اقشانىڭ جىمقىرىلۋىنا، جالپى جەمقورلىققا قارسى كوشەگە شىققان. وزگە ەلدە الەۋمەتتىك كومەكتىڭ قىسقارۋىنا دەگەندەي.
ال نەگىزىنەن جاس بۋىننىڭ موبيلدىلىگىنە سمارتفون، ينتەرنەت، الەۋمەتتىك جەلى ىقپال ەتكەن. ياعني، جىلدام كوممۋنيكاسيا. بۇل تەز ۇيىمداسۋعا، بىرىگۋگە مۇمكىندىك بەرگەن. ءتۇرلى حەشتەگتەر مۇددەلەستەردى توپتاستىرعان. زۋمەرلەر تيكتوك، ينستاگرام، ح، تەلەگرام، ديسكوردتى پايدالانعان. كەيدە تەلەگرام.
زۋمەرلەر ميللەنيال، ودان الدىڭعى بۋىن سەكىلدى ەمەس. نەگىزىنەن 90-جج. جوقشىلىقتى كورمەگەن سوڭ با، الەۋمەتتىك ادىلەتسىزدىككە جىلدام قارسى شىعادى. ەتيكانى، زاڭدى ساقتاۋدى، ءوزىن قۇرمەتتەۋدى بىردەن تالاپ ەتەدى. ول ورىندالماسا، پروتەستكە شىعادى. جەكەلەي نە توپپەن. گرەتا تۋنبەرگ جانە ونىڭ زامانداستارى - سونىڭ مىسالى.
تاعى ءبىر فاكتور. زۋمەرلەر پسيحولوگيالىق تۇرعىدا باسقاشا كەلەدى. ولاردىڭ قۇندىلىعى باسقا. سوندىقتان ءداستۇرلى بيلىككە، پارتياعا، مەدياعا كوبىنە سەنبەيدى. ولاردىڭ جىل سايىنعى نارراتيۆتەرىنە سەنبەيدى. سەنىم جوق جەردە قولداۋ جوق. قولداۋ جوق جەردە پروتەست بار"، - دەپ جازىلعان مالىمەتتە.
