زەينەتاقى قورىنداعى قاراجاتتىڭ "ەكسپو" اۋماعىنداعى قۇرىلىسقا جۇمسالاتىنى وتكەن اپتادا ءبىراز جۇرتتى دۇرلىكتىردى. اسىرەسە، ونىڭ "مەگا" ويىن-ساۋىق ورتالىعىن سالۋعا بولىنگەنى ءتىپتى تاڭداي قاقتىرعان. قازاقستاننىڭ دامۋ بانكى زەينەتاقى قورىنان 171 ملرد العان. ونىڭ 15 ملردى "ەكسپو" قۇرىلىسىنا قالاي بولىنگەنى تۋرالى، ءبىر اپتا وتكەن سوڭ، جامىشيەۆ ءتۇسىندىردى.
ونىڭ ايتۋىنشا، نەسيە "بايتەرەك ديەۆەلوپمەنت" ارقىلى 15 جىلعا بەرىلگەن. ەسەسىنە "بايتەرەك" ءوز ەسەپ-شوتىنداعى قاراجاتتى كەپىلگە قويىپتى. بۇل بانك سەكتورىندا ەڭ ءقاۋىپسىز قارجىلىق ءادىس، ياعني تاۋەكەلسىز ءتاسىل بولىپ ەسەپتەلەدى، دەيدى.دەمەك، MEGA Silk Way جوباسى قارىزدى قايتارا الماسا، زەينەتاقى قورىنا تيەسىلى اقشا "بايتەرەكتەن" ۇستالادى.بولات جامىشيەۆ، "قازاقستاننىڭ دامۋ بانكى" اق باسقارما ءتوراعاسى:
- بانك تاجىريبەسىندە كەپىلدىك ەسەپ-شوتتاعى اقشا ەڭ ءتيىمدى جانە ءقاۋىپسىز ءتاسىل. سوندىقتان بۇل جوباعا قۇيعان قاراجاتتىڭ قاۋىپسىزدگى سەنىمدى بولىپ ەسەپەتەلەدى. بانكتىڭ پورتفەلىندەگى باسقا جوبالاراعا قاراعاندا. MEGA Silk Way اۋماعى 140 مىڭ شارشى شاقىرىم ەكى قاباتتى ويىن-ساۋىق ورتالىعى. باتىس بولىگى نازاربايەۆ ۋنيۆەرسيتەتىمەن، شىعىسى "ەكسپونىڭ" نەگىزى پاۆيلونىمەن شەكتەسەدى، - دەدى.
وسىدان ەكى جىل بۇرىن "نۇر پلازا" اتالا جازداعان. بەلگىلى بيزنەسمەن نۇرلان سماعۇلوۆ جوبانى تانىستىرۋ كەزىندە "جالپاقتاۋدى ءومىردىڭ ءوزى ۇيرەتتى" دەگەنى ەل ەسىندە. ءسويتىپ "مەگا" دۇكەندەر جەلىسىنىڭ قوجايىنى پرەزيدەنتتەن باستاپ، ءبارىن كۇلكىگە قارىق قىلعان ەدى.
"ەكسپو" اۋماعىندا الىپ قۇرىلىس سالىپ جاتقان نۇرلان سماعۇلوۆ بيىل "مەگا استانا" مەن "مەگا اقتوبەسىن" ساتىپ جىبەردى. بيزنەسمەن تابىستى جوبالاردى قاراجات قاجەت بولعاندىقتان، قيعانىن تۇسىندىرگەن. ال جامىشيەۆ: "ەكىنشى دەڭگەيلى بانكتەر ۇزاق مەرزىمدى جوبالاردى قارجىلاندىرا المايدى. ءقازىر اقشا جوق"،- دەيدى. وعان قوسا ينفراقۇرىلىمدىق جانە تۋريستىك جوبا رەتىندە ويىن-ساۋىق ورتالىعى زەينەتاقى قورىنا قولقا سالۋعا قۇقىلى دەگەندى ايتتى.
ەكونوميست ايدارحان قۇسايىنوۆ: "زەينەتاقى قورىنداعى قاراجاتتىڭ ءتۇرلى جوبالارعا ينۆەستيسيالاناتىنى قالىپتى جاعداي. تەك قارجى قايتارىمى جوعارى، تابىستى جوبالارعا قۇيىلۋى كەرەك"، - دەيدى. ايدارحان قۇسايىنوۆ، ەكونوميست:
- زەينەتاقى قورىنداعى قاراجات تەككە جاتپاي جۇمىس ىستەۋى كەرەك. ول "ەكسپوعا"، بولماسا باسقا جوبالارعا سالىنادى. اقشا بوسقا جاتىپ، وسپەيتىنى بەلگىلى. ونى ءبارىبىر بىرەۋلەرگە بەرەدى. ال كىرىس پەن قايتارۋ تاۋەكەلى بار - بۇل قالىپتى قارجىلىق ينسترۋمەنت. ونى قارىزعا بەرۋ دە سولاي. ال ونى قايتارىمى جوعارى جوبالارعا قۇيۋ - ول بولەك اڭگىمە. "قازاقستاننىڭ دامۋ بانكى" زەينەتاقى قورىنداعى اقشانى نارىقتىق 14 پايىزدىق ۇستەماقىمەن الىپ، MEGA Silk Way قۇرىلىسىنا 16،5 پايىزبەن قارىزعا بەرگەن. جىل سايىن 1،5 پايىزدىق وسىممەن 15 جىلدا قايتادى.
ءمولدىر باقىت قىزى
