بۇل – ايماقتىڭ سپورتتىق رۋحى مەن مادەني مۇراسىن بىرىكتىرەتىن ءىس-شارا. 16 تامىزعا دەيىن مۇندا قازاق ۇلتتىق مادەنيەتىنىڭ اجىراماس بولىگى بولىپ تابىلاتىن ءداستۇرلى ات سپورتى تۇرلەرى بويىنشا جارىستار وتەدءى، دەپ حابارلايدى Dalanews.Kz Altainews.kz سايتىنا سىلتەمە جاساپ.
وبلىستىڭ بارلىق اۋداندارىنان كەلگەن سپورتشىلار كوكپار، اۋدارىسپاق، تەڭگە ءىلۋ، بايگە جانە جورعا جارىس سياقتى سپورت تۇرلەرىندە ءوز شەبەرلىكتەرىن كورسەتەدى.
– بۇگىن بەس جىلدىق ۇزىلىستەن كەيىن شىعىس قازاقستان وبلىسىنىڭ ءححىى حالىقتىق سپورت ويىندارى باستالدى. ءقازىر بۇقارالىق سپورتقا، اسىرەسە ۇلتتىق ات سپورتىنا كوپ كوڭىل بولىنەدى. ءبىز زايسان اۋدانىنىڭ ۇيىمداستىرۋشىلارى مەن اكىمدىگىنە ۇلكەن يپپودروم ۇسىنعانى ءۇشىن ريزامىز. بۇل ايماقتاعى ەڭ ءىرى يپپودروم بولىپ سانالادى. جالپى، بارلىعى جوعارى دەڭگەيدە وتۋدە، – دەدى ءححىى حالىقتىق سپورت ويىندارىنىڭ باس حاتشىسى ءادىل ابدىقالييەۆ.
جارىستار شيەلەنىستى ءارى قىزىقتى بولماق.
– ءبىزدىڭ كوماندادا 16 سپورتشى بار. كەز كەلگەن سپورتشىنىڭ ماقساتى – ۇزدىك، ءبىرىنشى، چەمپيون بولۋ. ارينە، بولاشاقتا حالىقارالىق تۋرنيرلەرگە دە قاتىسقىمىز كەلەدى، – دەدى ريددەردەن كەلگەن كوماندا كاپيتانى ەركەبۇلان تولەۋحانوۆ.
بۇل جارىستار – جاي ويىندار ەمەس، ۇرپاقتان-ۇرپاققا جالعاسىپ كەلە جاتقان مادەني مۇرا.
– ءبىز بۇل ويىنداردى ءوز ايماعىمىزدا قابىلداۋعا قۋانىشتىمىز. اسىرەسە، كەلەسى ايدا استانادا وتەتىن 5ء-شى دۇنيەجۇزىلىك كوشپەندىلەر ويىندارى قارساڭىندا. وسىلايشا ءبىز ۇلتتىق سپورت تۇرلەرىن ناسيحاتتاپ، ولارعا دەگەن سۇيىسپەنشىلىكتى وياتاتىن بولامىز، – دەدى زايسان اۋدانى اكىمىنىڭ ورىنباسارى ريشات رامازانوۆ.
زايسان بىرنەشە كۇن بويى شىعىس قازاقستاننىڭ سپورتتىق ورتالىعىنا اينالادى. قالا تۇرعىندارى مەن قوناقتارى كەرەمەت جارىستارعا كۋا بولماق.
