استانادا 2022 جىلدان 2024 جىلدىڭ مامىرىنا دەيىن ماينينگ فەرماسىن قوزعالتقىشتاردى وڭدەۋ ورتالىعى رەتىندە جاسىرىپ، ءبىر مەگاپوليستىڭ تۇرعىن اۋدانىمەن سالىستىرعاندا ايلىق ەلەكتر ەنەرگياسىن تۇتىنعان ءۇش ازاماتقا قاتىستى ايىپتاۋ ۇكىمى شىعارىلدى، دەپ حابارلايدى Dalanews.kz.
زاڭسىز جولمەن الىنعان سيفرلىق اكتيۆتەر 143 ملن تەڭگەدەن اسادى.
ءتىنتۋ بارىسىندا 1 257 اسيكماينەر (سيفرلىق اكتيۆتەردى وندىرۋگە ارنالعان جابدىق)، ونەركاسىپتىك سالقىنداتقىش جەلدەتكىشتەر مەن ترانسفورماتورلىق ستانسيا الىندى.
سوت ولاردى ق ر قك 214-بابىنىڭ 2-تارماعى بويىنشا كىنالى دەپ تانىپ، ايىپپۇل سالۋ جازاسىن تاعايىندادى.
سوت شەشىمىمەن مەملەكەت پايداسىنا 900 ملن تەڭگەدەن استام مۇلىك: 2 كولىك («Toyota Camry»، «Nissan Juke») جانە ماينينگ جابدىقتارى تاركىلەندى.
سونىمەن قاتار، سوت قىلمىستىق تابىس مولشەرى رەتىندە 143،2 ملن تەڭگەنى مەملەكەتكە قايتارۋدى مىندەتتەدى.
ۇكىم زاڭدى كۇشىنە ەندى.
