زاڭگەر باعدات اماندوس ۇلى قارجىلىق وپەراسيالارعا قاتىستى ساق بولۋعا شاقىردى، دەپ حابارلايدى Dalanews.kz.
ونىڭ ايتۋىنشا، ەگەر ءبىر اي ىشىندە 300 مىڭ تەڭگەدەن استام قاراجاتتى بىرنەشە ادامعا اۋدارساڭىز، بۇل ارەكەتتەر تۋرالى بانك قارجىلىق مونيتورينگ اگەنتتىگىنە (قما) مالىمەت بەرەدى.
– مۇنداي جاعدايدا اگەنتتىك تاراپىنان "اقشا قايدان كەلدى؟"، "كىمگە اۋداردىڭ؟"، "نە ماقساتپەن جىبەردىڭ؟"، "تابىس كوزىڭ قانداي جانە ول زاڭدى ما؟" دەگەن سۇراقتار قويىلادى. سوندىقتان مۇنداي ساۋالدارعا الدىن الا دايىن بولعان ءجون، – دەيدى زاڭگەر.
سونداي-اق، باعدات اماندوس ۇلى الەۋمەتتىك جەلىلەر ارقىلى تاۋار ساتىپ، تۇراقتى تۇردە تابىس تاباتىندار ءۇشىن جەكە كاسىپكەر رەتىندە تىركەلۋ مىندەتتى ەكەنىن ەسكەرتتى.
– سەبەبى بۇل – تابىس كوزى، جانە ول ءۇشىن سالىق تولەۋ قاجەت، – دەيدى ول.
ال ەگەر اقشا جاقىندارىڭىزدان نەمەسە دوستارىڭىزدان كومەك رەتىندە كەلسە، زاڭ الدىندا جاۋاپ بەرمەس ءۇشىن مۇنى راستايتىن جازباشا تۇسىنىكتەمە دايىنداپ قويعان دۇرىس.
– قارجى مينيسترلىگى جۋىردا ءۇش اي ىشىندە 1 ميلليون تەڭگەدەن استام قاراجات العان جەكە تۇلعالاردىڭ بارلىعىنا تەكسەرىس جۇرگىزىلەتىنىن حابارلادى. سوندىقتان كولەڭكەلى تابىستان اۋلاق بولىپ، سالىق تولەۋدى ۇمىتپاڭىز – سوندا عانا الاڭسىز ۇيىقتاي الاسىز، – دەپ قورىتتى زاڭگەر.
