بۇگىن تۇركىستان وبلىسىنىڭ اكىمى جانسەيىت تۇيمەبايەۆ يران ەلىنىڭ ينۆەستورلارمەن كەزدەستى. وڭىرىمىزگە ارنايى جۇمىس ساپارىمەن كەلگەن مارتەبەلى مەيماندار تمد ەلدەرى اراسىنداعى ساپارىن قازاقستاننان باستاپ وتىر. كومپانيانىڭ ماڭىزدى جانە بىرەگەي ەرەكشەلىكتەرىنىڭ ءبىرى – زەرتتەۋگە ينۆەستيسيا سالۋ، سونداي-اق كادرلاردى دايىنداۋداعى تۇراقتى ۇمتىلىس.

فارماسيەۆتيكا سالاسىندا باسەكەلەستەرىنىڭ الدىن وراپ ۇلگەرگەن كومپانيا 54 ءتۇرلى دارى-دارمەك شىعارادى. ساپالى ونىمدەر ەۋروپا نارىعىنا جونەلتىلۋدە. ينۆەستور اراسىنداعى نەگىزگى دانەكەرشى – «Source Energy» كومپانياسى.

بۇگىنگى كۇنى قىزمەتكەرلەردىڭ 30 پايىزى دوكتورلىق، ماگيستراتۋرا جانە فارماكولوگيا سالاسىنداعى ماماندار بولىپ تابىلادى. ولار عىلىمي-زەرتتەۋ، دامىتۋ جانە ساپانى باقىلاۋمەن اينالىسادى. Niak فارماسيەۆتيكالىق كومپانياسى سوڭعى GMP ستاندارتتارىنا سايكەس №2 زاۋىتتى دامىتۋدى جوسپارلاپ وتىر.

– مەن سىزدەردىڭ بۇل باستامالارىڭىزدى تولىق قولدايمىن. ماڭىزدى قادام جاسالىپ جاتقاندىعى انىق. سوندىقتان جۇمىسقا ەش الاڭسىز كىرىسۋلەرىڭىزگە بولادى. سىزدەر ءۇشىن يندۋستريالدىق ايماقتى دايىندايمىز. ەۋروپالىق وداقتىڭ نارىعىنا شىعۋدىڭ دا ءتيىمدى تۇستارىن اتاپ كەتۋگە بولادى. قازاقستان، رەسەي، بەلارۋسيا، قىرعىزستان جانە ارمەنياعا وندىرىلگەن دارىلەردى ەش كەدەرگىسىز جەتكىزەسىزدەر. بۇل شامامەن 200 ملن حالىققا جول تارتادى دەگەن ءسوز. ەكونوميكالىق ايماق رەتىندە وزىمىزدە دە جەڭىلدىكتەر قاراستىرىلعان. كەدەن بەكەتتەرىنەن قيىندىقتار بولمايدى. سوندىقتان بەلسەندى تۇردە بىلەك تۇرە ىسكە كىرىسۋگە شاقىرامىن. بيۋروكراتيا بولماس ءۇشىن مەن ءوزىم قاداعالايمىن، – دەدى ج.تۇيمەبايەۆ.

ءوز كەزەگىندە، يران ينۆەستورلارى ايماق باسشىسىنا ريزاشىلىعىن ءبىلدىردى. كەزدەسۋدە ەكى جاقتى مەماراندۋمعا قول قويىلدى. مارتەبەلى مەيماندار تۇركىستانمەن ساۋدا-ەكونوميكالىق بايلانىستارىنىڭ ودان ءارى نىعايۋىنا نيەتتى ەكەنىن جەتكىزدى.



تۇركىستان وبلىسى اكىمىنىڭ باسپا ءسوز قىزمەتى