رەسەي پرەزيدەنتى ۆلاديمير پۋتين دۇنيەجۇزىنىڭ جەتەكشى اقپارات اگەنتتىكتەرى باسشىلارىمەن كەزدەسۋ بارىسىندا يران مەن يزرايل اراسىنداعى جانجالدى بارلىق تاراپتىڭ مۇددەسىن ەسكەرە وتىرىپ كەلىسسوز ارقىلى شەشكەن ءجون بولار ەدى دەگەن پىكىرىن ءبىلدىردى، دەپ حابارلايدى Dalanews.kz Kazinform اگەنتتىگىنە سىلتەمە جاساپ.
ونىڭ ايتۋىنشا، كەلىسىم يراننىڭ بەيبىت اتومعا – تەك ەنەرگەتيكادا عانا ەمەس، تولىق قۇقىلى بولۋىن جانە ءيزرايلدىڭ ءسوزسىز قاۋىپسىزدىگىن قامتاماسىز ەتۋ قۇقىعىن قامتۋى كەرەك.
"جالپى العاندا، مۇنداي شەشىم تابۋعا بولادى. ءبىز ەشكىمگە ەشتەڭە تىقپالامايمىز، تەك جاعدايدان شىعۋعا قاتىستى ءوز كوزقاراسىمىزدى ۇسىنامىز. ءبىراق تۇپكىلىكتى شەشىمدى يران مەن ءيزرايلدىڭ ساياسي باسشىلىعى قابىلدايدى"، — دەدى ۆلاديمير پۋتين.
ايتا كەتسەك،كرەملدىڭ باسپا ءسوز قىزمەتى رف پرەزيدەنتى ۆلاديمير پۋتين بىرىككەن اراب امىرلىكتەرىنىڭ پرەزيدەنتى مۇحاممەد بەن زايد ءال ناحايانمەن تەلەفون ارقىلى سويلەسىپ، يران مەن يزرايل اراسىنداعى قاقتىعىستى تالقىلاعانىن حابارلادى. رەسمي حابارلامادا پۋتين رەسەيدىڭ تاراپتار اراسىنداعى ديالوگتى ىلگەرىلەتۋ ءۇشىن اراعايىندىق جاساۋعا ءازىر ەكەنى جانە وسىعان بايلانىستى ءبىرقاتار شەتەلدىك كوشباسشىمەن بايلانىسقا شىققانى تۋرالى ايتىلعان.
