تۇركىستان وڭىرىندە كاسىپ اشقىسى كەلەتىن ينۆەستورلارعا جان-جاقتى مەملەكەتتىك قولداۋ كورسەتىلۋدە. وبلىس اكىمى دارحان ساتىبالدى كەزەكتى ينۆەستيسيالىق شتاب وتىرىسىن وتكىزىپ، وڭىردە جاڭا ءوندىرىس ورىندارىن اشاتىن كاسىپكەرلەرمەن جوبا بارىسىن جان-جاقتى تالقىلادى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
ينۆەستيسيالىق شتاب – بيزنەس ماسەلەلەرىن جەدەل شەشۋگە ارنالعان اشىق الاڭ. اكىم ەنەرگەتيكا سالاسى، ءسۇت وڭدەۋ زاۋىتى، تىگىن فابريكاسى، مەديسينالىق بۇيىمدار ءوندىرىسى، مال بورداقىلاۋ الاڭى، كىر جۋاتىن ۇنتاق، تۇرمىستىق حيميا ءوندىرىسىن قولعا العان ينۆەستورلارمەن جۇمىس بارىسىن پىسىقتادى.
ينۆەستيسيالىق شتاب وتىرىسىندا كورسەتىلەتىن جان-جاقتى مەملەكەتتىك قولداۋدى قامتاماسىز ەتۋ ارقىلى جاڭا جوبالاردى جۇزەگە اسىرۋىنا ىقپال ەتەتىنى ايتىلدى. وبلىس اكىمى ينۆەستورلارعا وڭتايلى ءارى ىڭعايلى ورتا قالىپتاستىرۋ ءۇشىن بيزنەسكە قويىلاتىن ارتىق تالاپتاردى جويۋدىڭ ماڭىزدىلىعىن اتاپ ءوتتى. قۇرىلىسى ءجۇرىپ جاتقان زاۋىت، فابريكالاردىڭ ماڭىزدىلىعى مەن تيىمدىلىگىن ەسكەرتىپ، وسى ماقساتتا جاۋاپتى تۇلعالارعا ينفراقۇرىلىم تارتۋعا قاتىستى ناقتى تاپسىرمالار بەردى.
– قاعازباستىلىق دەگەندى دوعارۋ قاجەت. ينۆەستورلاردىڭ ءتۇرلى كەدەرگىلەرگە تاپ بولۋىنا جول بەرىلمەۋ كەرەك. ول ءۇشىن ءار اكىم، باسقارما باسشىلارى تىكەلەي جاۋاپتى ەكەنىن ەسكەرتەمىن. ءار ينۆەستيسيالىق جوبانىڭ جۇزەگە اسىرىلۋ بارىسى قاتاڭ باقىلاۋدا. ەشقانداي تەجەۋ بولماۋى كەرەك. ەلەكتر ەنەرگياسى، گاز بويىنشا ماسەلە تۋىنداعان جاعدايدا، شۇعىل ارەكەت ەتىپ، شەشۋ قاجەت. ونى سوزبالاڭعا سالۋدىڭ ءوزى – سىن. اسا ماڭىزدى شيكىزاتتى ءوندىرۋ جانە وڭدەۋ سالاسىنا باسىمدىق بەرىلەدى. تاپسىرما بەرىلگەنىن كۇتىپ وتىرماي، باستاما كوتەرىپ، دەربەس جۇمىس ىستەي بىلىڭىزدەر، – دەدى دارحان ساتىبالدى.
سونداي-اق، دارحان ساتىبالدى تانىستىرىلعان جاڭا جوبالاردىڭ ماڭىزدىلىعىنا نازار اۋدارىپ، اۋدان باسشىلارى مەن جاۋاپتى سالا باسشىلارىنا ينۆەستورلارعا قولداۋ كورسەتۋدى تاپسىردى. اۋدان، قالا اكىمدەرىنىڭ جۇمىسى ينۆەستيسيا تارتۋمەن، حالىقتى جۇمىس ورنىمەن قامتۋمەن باعالاناتىنىن ەسكە سالدى.
تۇركىستان وبلىسىندا قازىرگى ۋاقىتتا ءوندىرىستى دامىتۋ باعىتىندا جۇمىستار قارقىندى جۇرگىزىلۋدە. بيىل جالپى قۇنى 136،0 ملرد. تەڭگەنى قۇرايتىن 56 ينۆەستيسيالىق جوبانى ىسكە اسىرۋ جوسپارلانعان. ناتيجەسىندە 2 مىڭنان استام تۇراقتى جۇمىس ورىندارى اشىلۋدا. بۇگىنگە كۇنى 31 ينۆەستيسيالىق جوبا ىسكە قوسىلدى.
يمپورتتان تاۋەلدىلىكتى ازايتۋ ءۇشىن، وندىرىستىك پاركتە مەملەكەت تاراپىنان كاسىپورىنعا قاجەتتى ينفراقۇرىلىممەن قامتاماسىز ەتىلگەن دايىن عيمارات ۇسىنىلادى. وندىرىستىك كەشەندە 39 عيمارات بوي كوتەرۋدە. 10 كاسىپورىن ىسكە قوسىلدى. بۇدان بولەك، وڭىردە 13 يندۋستريالدى ايماق جانە ارنايى ەكونوميكالىق ايماق بار. وندا جۇمىس باستاپ جاتقان كاسىپورىندار سالىقتان بوساتىلادى. كەدەندىك جەڭىلدىكتەر قاراستىرىلعان، ينفراقۇرىلىمى بار. جالپى ارنايى ەكونوميكالىق جانە يندۋستريالدى ايماقتاردا 53 كاسىپورىن جۇمىس ىستەيدى. سونداي-اق 139،4 ملرد. تەڭگەگە 29 جوبانىڭ قۇرىلىس جۇمىستارى جۇرگىزىلۋدە.
تۇركىستان وبلىسىندا كاسىپكەرلەردىڭ سانى جىل باسىنان 2 مىڭعا ارتىپ، بۇگىندە 208 مىڭدى قۇرادى. اتالعان سالادا 282 مىڭ ادام جۇمىسپەن قامتىلعان. شەتەلدىك ينۆەستورلاردىڭ قاتىسۋىمەن وڭىردە جالپى قۇنى 1،1 ملرد. اقش دوللارىن قۇرايتىن 7 ينۆەستيسيالىق جوبانى جۇزەگە اسىرۋ جوسپارلانىپ، قازىرگى ۋاقىتتا تەكستيل كلاستەرىن قۇرۋ جانە اليۋمينيي بۇيىمدارىن شىعارۋ زاۋىتى ينۆەستيسيالىق جوبالارىنىڭ قۇرىلىسى باستالدى.
