بەرىك بەكەنوۆ ايتىپ وتكەندەي، ونەركاسىپتى سيفرلاندىرۋ ءبىرىنشى كەزەكتە وندىرىستىك شىعىنداردى تومەندەتۋ، ەڭبەك جاعدايىن جاقسارتۋ، ونىمدىلىكتى ارتتىرۋ، وڭدەۋدەن باستاپ ءونىم سىرتقى نارىقتارعا شىققانعا دەيىنگى ۋاقىتتى قىسقارتۋ ەسەبىنەن وتاندىق كاسىپورىنداردىڭ باسەكەگە قابىلەتتىلىگىن ارتتىرۋعا اسەر ەتەدى.
سونداي-اق، سيفرلىق تەحنولوگيالاردى ەنگىزۋ ءتۇرلى وندىرۋشىلەر اراسىندا كووپەراسيانى دامىتۋعا مۇمكىندىك بەرەدى، بۇل جاھاندىق تىزبەككە ەنۋگە مۇمكىندىك بەرەدى. مۇنىمەن بىرگە، سيفرلىق تەحنولوگيالار ەنگىزەتىن كاسىپورىندار اينالاسىندا جوعارى تەحنولوگيالى سەرۆيستىك ات-كومپانيالار قۇرىلادى. ولار سيفرلىق شەشىمدەر ازىرلەۋ جانە سۇيەمەلدەۋ بويىنشا ءوز قىزمەتتەرىن ۇسىنادى.
ايتا كەتكەن ءجون، «يندۋستريا 4.0» اۋقىمدى مالىمەتتەردى (big data) تالداۋ، اۆتونومدى روبوتتاندىرىلعان جۇيەلەر، يندۋستريالىق ينتەرنەت، ءادديتيۆتى تەحنولوگيالار (3D-باسپا) جانە باسقالارى سياقتى وزىق اقپاراتتىق-كوممۋنيكاسيالىق تەحنولوگيالاردى اۋقىمدى پايدالانۋدى كوزدەيدى.
«سيفرلىق تەحنولوگيالار ارقىلى سالالاردىڭ سيپاتى، بيزنەس ۇلگىلەر ايتارلىقتاي وزگەرەدى. «يندۋستريا 4.0» قازاقستانعا جاڭا مۇمكىندىكتەر ۇسىنادى، اتاپ ايتقاندا، تيىمدىلىكتى ەداۋىر ارتتىرۋ، جاڭا بيزنەستى جانە ەكپورتقا باعىتتالعان وندىرىستەر قۇرۋ»، — دەپ اتاپ ءوتتى بەرىك بەكەنوۆ.
ونىڭ ايتۋىنشا، «يندۋستريا 4.0» تەحنولوگيالارى بارلىق كاسىپورىندار ءۇشىن قولجەتىمدى: «يندۋستريا 3.0» شارتتى كەزەڭىنىڭ سوڭىنا دەيىن جەتكەن كاسىپورىندار ءۇشىن، سونداي-اق تەحنولوگيالىق بازاسى ءبىر دەڭگەيگە تومەن كاسىپورىندار ءۇشىن دە — ولارعا نەگىزگى قورلاردى جاڭارتۋ ءۇشىن، سايكەس مامانداردى دايارلاۋ جانە قايتا دايارلاۋ ءۇشىن ەداۋىر ينۆەستيسيالار قاجەت بولادى.
ءسوز سوڭىندا ول سيفرلىق تەحنولوگيالار، «يندۋستريا 4.0» ەلەمەنتتەرىن ەنگىزۋ بۇگىندە مىندەتتى ەكەنىن باسا ايتتى.
«بۇل قازىرگى زاماننىڭ تالابى. سوندىقتان ەگەر كاسىپورىندار باسەكەگە قابىلەتتى بولعىسى كەلسە، سىرتقى نارىقتارعا شىققىسى كەلسە، ولار وندىرىسكە سيفرلىق شەشىمدەردى ەنگىزۋى ءتيىس»، — دەپ تۇيىندەدى ب. بەكەنوۆ.
