بۇگىندە ءتۇتىنى بۋداقتاعان ۇلكەن زاۋاتتار كەلمەسكە كەتكەنى انىق. ءقازىر يننوۆاسيالىق قىزمەتتىڭ ارقاسىندا ءوندىرىس ورىندارى مەيلىنشە ىقشامدالىپ، مەيلىنشە تەحنولوگيالىق سيپات العانىن اتاپ ايتۋىمىز كەرەك.
ءقازىر قازاقستان دا ءوزىنىڭ عىلىمي-تەحنيكالىق الەۋەتىنە ارقا سۇيەپ، يننوۆاسيالىق ەكونوميكا قۇرۋعا كۇش جۇمىساپ كەلەدى. وسى تۇرعىدان العاندا يندۋستريالاندىرۋ كارتاسى ەلىمىزدەگى عىلىمي-تەحنيكالىق سالانى كەنجە قالدىرماي دامىتىپ وتىر.
وسى رەتتە يندۋستريالاندىرۋ كارتاسى اياسىندا بۇل باعىتتاعى جۇمىستار قالاي جۇزەگە اسىپ جاتىر دەگەن زاڭدى سۇراق تۋىندايدى. ەندىگى كەزەكتى وسىعان از-كەم جاۋاپ بەرە كەتسەك.
ەلىمىزدە يندۋستريالاندىرۋ كارتاسى اياسىندا جاڭا كاسىپورىندار عانا قۇرىلماعانى انىق. سونىمەن بىرگە ەل اۋماعىندا مەملەكەتتىك يننوۆاسيالىق قىزمەتتى وركەندەتۋ ءۇشىن سالالىق، وڭىرلىك دەڭگەيدە تەحنوپاركتەر، بيزنەس-ينكۋباتورلار، ايماقتىق يننوۆاسيالىق قورلار جانە ۆەنچۋرلىك كاسىپورىندار دا پايدا بولعانىن بىلەمىز.
بۇدان ەلىمىزدە يندۋستاريالدى ەكونوميكانىڭ يننوۆاسيالىق قىرى ايقىندالىپ، العاشقى قارلىعاشتارى پايدا بولعانىن اڭعارۋعا بولادى.
مامانداردىڭ وي-پىكىرىنە قۇلاق اساتىن بولساق، ءقازىر ەلىمىزدە قۇرىلعان تەحنوپاركتەر ۇلتتىق يننوۆاسيالىق جۇيەنىڭ وزەگىنە اينالۋدا.
اڭگىمە باسىندا ءقازىر ءوندىرىس ورىندارىنىڭ مەيلىنشە ىقشامدالعانىن ايتتىق. كەڭەس زامانىندا ءوندىرىس ورىنى دەسە، بۋى بۇرقىراعان قازاندىقتار مەن ءتۇتىنى بۋداقتاعان الىپ مۇرجالار كوز الدىمىزعا ەلەستەيتىنى بەلگىلى. كەيبىر ادامدار ءالى كۇنگە دەيىن ءوندىرىستى وسىلاي ەلەستەتەتىن جاسىرىن ەمەس.
قازىرگى دامىعان زاماندا شاعىن عانا تەحنوپاركتەردە ءبىرقانشا ءونىم وندىرۋگە بولادى. ايتالىق، ءقازىر ەلىمىزدە يندۋستريالاندىرۋ كارتاسى اياسىندا بوي كوتەرگەن تەحنوپاركتەر ءتۇرلى ستارتاپ جوبالار جۇزەگە اسىپ جاتىر.
ءيا، مۇنداي شاعىن بيزنەس جوبالار تۇتاستاي ەكونوميكاعا ىقپال ەتىپ، مىڭداعان ادامدى جۇمىسپەن قامتىماسى انىق. ءبىراق بىزدەر يندۋستريالدى پاركتەردەگى شاعىن بيزنەس جوبالاردى كوبەيتە بەرۋىمىز كەرەك.
ءدال ءقازىر بىزدەر يننوۆاسيالىق قىزمەتكە قاتىستى ءوزىمىزدىڭ كوزقاراسىمىزدى كەڭەيتۋىمىز كەرەك. ول ءۇشىن بىزدەر قازىرگى زاماننىڭ ستارتاپ جانە بيزنەس جوبالارىنىڭ ماڭىزىن ءتۇسىن العانىمىز ءجون.
بۇگىنگى زامانداعى بيزنەس جوبالار ولار – ىقشام، كەز كەلگەن ورتاعا تەز بەيىمدەلگىش بولىپ كەلەدى. سونىمەن قاتار ۇدايى قولايلى ورتانى ىزدەيتىنىن دە ۇمىتپاۋىمىز كەرەك. زاماناۋي بيزنەس جوبالار قاراعاندى مەتالۋرگيا كومبيناتى سياقتى الپاۋىت كاسىپورىن ەمەس. ولار ءوز قىزمەتىنە جۇرگىزۋ ءۇشىن شاعىن جەر مەن ينفراقۇرىلىم بولسا جەتكىلىكتى.
ەڭ باستىسى بيزنەس جوبالار ءۇشىن ينۆەستيسيالىق تارتىمدىلىق. وعان مەملەكەتتىڭ جاساپ وتىرعان سالىقتىق جەڭىلدىكتەرى، لوگيستيكالىق ىلكىمدىلىكتى جانە تۇتىنۋشى مەن كاسىبي بىلىكتى ماماندار شوعىرىن جاتقىزۋعا بولادى.
ءبىزدىڭ ۇكىمەت وسى جايتتاردىڭ باسشىلىققا الىپ، ەلىمىزدىڭ ءار وبلىسىندا يندۋستريالدى تەحنوپاركتەر قۇرىپ، ولارعا مەيلىنشە جاعداي جاساپ كەلەدى. سونىمەن قاتار ولاردىڭ قارجى رەسۋراستارىنا قولجەتىمدىلىگىن ارتتىرۋ ماقساتىندا ايماقتىق يننوۆاسيالىق جانە ۆەنچۋرلىك قورلاردىڭ جۇمىسى جانداندىرۋعا كۇش سالۋدا.
ءقازىر ەل اۋماعىنداعى تەحنوپاركتەر ەكىگە بولىنەدى. ولار ۇلتتىق جانە ايماقتىق تەحنوپاركتەر دەپ ەكى توپقا بولىنەدى. ايتالىق، ۇلتتىق تەحنوپاركتەردىڭ باستى ەرەكشىلەگى ولاردىڭ اينالىساتىن ماسەلەلەرى سالاارالىق باعىتتى قۇرايدى. ارنايى ەكونوميكالىق ايماقتاردا جۇمىس ىستەيتىن مۇنداي تەحنوپاركتەر ءۇشىن سالىقتىق جەڭىلدىكتەر قاراستىرىلعانىن ايتا كەتۋىمىز كەرەك. ەلىمىزدەگى تەحنوپاركتەردە ۇزىن سانى 40-تان استام بيزنەس-ينكۋباتورلار جۇمىس ىستەۋدە.
اتالعان بيزنەس-ينكۋباتورلار ەلىمىزدىڭ بارلىق ايماعىندا بار. ولار كرەاتيۆتى ويلايتىن ازاماتتاردىڭ ماڭىزدى جوبالارىن جيناقتاپ، ەلىمىزدىڭ يننوۆاسيالىق قىزمەتىن قالىپتاستىرىپ وتىر.
وسى جايتتاردى ەسكەرسەك، ەلىمىزدە قولعا الىنعان يندۋسترالاندىرۋ كارتاسى ءتيىستى دەڭگەيدە جۇزەگە اسىپ وتىرعانىن بايقايمىز. الداعى ۋاقىتتا بۇل باعىتتاعى جۇمىستاردى جانداندىرىپ، وندىرىستىك تىزبەكتى قۋاتتاندىرىپ، ەكونوميكانى دامىتۋعا باعىتتاۋدىڭ ماڭىزى زور.
نۇرلان جۇماحان
