مۋزەي اشىلعان سوڭ ۇلى ويشىلدىڭ مۇراسى ۇلىقتالىپ، ياساۋي فەنومەنىن اسقاقتاتۋ ارقىلى عىلىم مەن ءتۋريزمدى بىرگە دامىتۋ مۇمكىندىگى اشىلا تۇسەدى. جاڭا مۇراجايدىڭ كونسەپسياسىمەن تانىسقان وبلىس اكىمى ءومىرزاق شوكەيەۆ جوبا جەتەكشىلەرىنە ءبىرقاتار مىندەتتەر جۇكتەدى.
ۇلى ويشىلدىڭ ەل رۋحانياتىنداعى ورنىن جوعارى باعالايتىن ءوڭىر باسشىسى مۇراجايدى بىرەگەي جوباعا اينالدىرۋ جولدارىن كورسەتىپ، وي قوستى. جاڭا مۋزەي عۇلامانىڭ الەمىنە ساپار شەگىپ، كۇللى كۇنشىعىس مۇسىلماندارىنىڭ رۋحاني ۇستازى بولعان ءدىني قايراتكەردىڭ ەڭبەكتەرىن دارىپتەيتىن مادەني وشاق بولماق.
قوجا احمەت ياساۋي مۋزەيىنىڭ اۋماعى – 3200 شارشى مەتر. قۇرىلىستى «سامۇرىق-قازىنا» كومپانياسىنىڭ تاپسىرىسىمەن «بازيس – ا» كومپانياسى جۇرگىزدى. ۇلى تۇلعاعا ارنالعان مۋزەيدە كەلەشەكتە 100 ادام جۇمىسپەن قامتىلماق.
جالپى تۇركىستاندى تۋريزم ورتالىعىنا اينالدىرۋ باعىتىندا اۋقىمدى جۇمىس اتقارىلىپ جاتىر. تۇركىستان قالاسىنداعى تۋريستىك نىساندار جايلى اقپاراتتار الەمدەگى ەڭ ءىرى «http://xn--ripadviser-mwi.com/» ساياحاتشىلار پورتالىنا ەنگىزىلدى. وڭىرگە كەلەتىن قوناقتار، تۋريستەرمەن جۇمىس جۇرگىزەتىن گيد ماماندارىن دايارلاۋ ءىسى دە جاندانا ءتۇستى.
تۇركىستان وبلىسىندا تۋريزم سالاسى تاريحي-تانىمدىق، ەمدىك-ساۋىقتىرۋ جانە ەكولوگيالىق تۋريزم بولىپ، 3 باعىتتا قارقىندى دامىپ كەلەدى. جىل سوڭىنا دەيىن 38 تۋريستىك ينۆەستيسيالىق جوبا جۇزەگە اسادى. ناتيجەسىندە 1050 جاڭا جۇمىس ورىندارى اشىلادى دەگەن جوسپار بار. سولاردىڭ ىشىندە قوجا احمەت ياساۋي مۋزەيى دە جۇرتشىلىق ءجيى كەلەتىن ورىنعا اينالادى دەگەن سەنىم مول.
