ءماجىلىس دەپۋتاتى قازىبەك يسا فۋتبولدان وليمپيادالىق مەكتەپتەرگە وراسان قارجى جۇمسالسا دا، وليمپياداعا قاتىسىپ كورمەگەنىمىزدى ايتىپ، تۇيتكىلدى ماسەلەنى كوتەردى، - دەپ حابارلايدى Dalanews.kz.
دەپۋتات سپورتتاعى بيۋدجەتتىڭ، ياعني حالىق قارجىسىنىڭ ءتيىمسىز جەلگە شاشىلۋىن وتكىر سىناپ، تۋريزم جانە سپورت مينيسترىنە ساۋال جولدادى.
"قانشاما مول قارجىلاندىرۋعا قاراماستان، قازاقستان وليمپيادالىق مەدالدىق ەسەپتەردە جانە دۇنيەجۇزىلىك سپورت رەيتينگىندە ەڭ سوڭعى ورىنداردا... فۋتبول ماسەلەسى مەملەكەتتەن بۇرىن ەڭ الدىمەن فەدەراسيانىڭ، كلۋبتاردىڭ جۇمىسى بولۋعا ءتيىس. سپورت مەكتەپتەرىنە ءبىر جىلدا جۇمسالاتىن 174 ملرد-تى 30 جىلعا كوبەيتسەك، 5-6 تريلليون شىعا كەلەدى..." - دەدى دەپۋتات.
ونىڭ ايتۋىنشا، قازاقستان 30 جىلدا 1 عانا ستاديون سالسا، سپورت بيۋدجەتى بىزدەن بىرنەشە ەسە از وزبەكستان 10 ستاديون سالىپ تاستاعان.
"بۇدان ءتورت جىل بۇرىن 2021 جىلى جاساعان ساۋالىمىز قوعامدا ۇلكەن رەزونانس تۋدىردى. قازاق قازىناسى ارقىلى بايىپ وتىرعان شەتەل لەگيونەرلەرى شەرۋىن توقتاتۋ ماسەلەسى دە قوعامنىڭ قاتتى قولداۋىنا يە بولعان ەدى. ال بىلتىر ەۋروپاداعى دامىعان ەلدەر، ءتىپتى كورشىمىز وزبەكستان دا 17-18 سپورت ءتۇرىن عانا قارجىلاندىرسا، ءبىزدىڭ قازاقستان ولاردان 10 ەسە اسىپ ءتۇسىپ، 180 سپورت ءتۇرىن قارجىلاندىراتىنى، ياعني مينيسترلىكتىڭ سپورتتى ساۋىن سيىر ەتىپ كەلگەنى تۋرالى كوتەرگەن ماسەلەمىز دە كوپتىڭ قولداۋىنا يە بولدى. ءبىراق جىل سايىن تەك 13 جازعى جانە 5 قىسقى وليمپيادالىق سپورت تۇرلەرىنەن عانا مەدال جەڭىپ الىنادى. ياعني ءبىز تالاپ ەتكەن 18 سپورت ءتۇرى وسى جەردەن-اق شىعىپ تۇر. ويتكەنى سپورت مينيسترلىگىنىڭ مالىمەتى بويىنشا "2018-2020 جىلدارى سپورتتىڭ بارلىق تۇرلەرىنە 646 ملرد تەڭگە بولىنگەن، ونىڭ 72 پايىزىنا جۋىعى ەلىمىز ءۇشىن باسىمدىعى مەن ماڭىزىن ەسكەرىلمەي بولىنگەنى" تۋرالى ءبىز بۇعان دەيىن پارلامەنتتە كوتەرگەن ەدىك"، - دەدى ول.
قازىبەك يسا تاياۋدا پارلامەنت قابىلداعان زاڭدا لەگيونەرلەردى بايىتۋدى توقتاتۋ مەن 180 سپورت ءتۇرىن بىرنەشە ەسەگە، 62-گە قىسقارتۋ سەكىلدى ءبىرقاتار ماسەلە وڭ شەشىلگەنىن جەتكىزدى.
"سونىڭ وزىندە ەۋروپا ەلدەرىنەن 4 ەسەدەي كوپ؟! 2018 جىلدان باستاپ سپورت سالاسىنىڭ بيۋدجەتى 2 ەسەگە ءوسىپ، 1،4 ترلن تەڭگەنى قۇرادى. الداعى 3 جىلعا تاعى 1،3 ترلن تەڭگە ءبولۋ جوسپارلانعان. ءبىز تالاي جىلدان بەرى دەپۋتاتتىق ساۋالدارىمىزدا كوتەرىپ كەلە جاتقان فۋتبول كلۋبتارىن جەكەشەلەندىرۋ جايلى ۇسىنىسىمىزدىڭ قولداۋ تاۋىپ جاتقانىنا قۋانىشتىمىز. جاقىندا ۇلتتىق قۇرىلتايدا ق ر پرەزيدەنتى ق.ك.توقايەۆ بۇل تۋرالى جانە بالالار فۋتبولىن دامىتۋ جايلى اتاپ كورسەتتى. ەلىمىزدەگى فۋتبول ماسەلەسى مەملەكەتتەن بۇرىن ەڭ الدىمەن فەدەراسيانىڭ، كلۋبتاردىڭ جۇمىسى بولۋى ءتيىس. بارلىعىن نارىق تالابى رەتتەۋى كەرەك. سەبەبى نارىق زاڭى ءارقاشان ءوز ۇستەمدىگىن جۇرگىزەدى. سوندىقتان ءبىزدىڭ كوتەرىپ جاتقان ماسەلەمىز، بيۋدجەتتىڭ -حالىقتىڭ قارجىسى ءتيىمدى جۇمسالۋعا ءتيىس. بۇل تۋرالى دا پرەزيدەنت قاتاڭ ەسكەرتكەن بولاتىن"، - دەدى ول.
رەسپۋبليكادا ءقازىر 521 بالالار مەن جاسوسپىرىمدەر سپورت مەكتەبى جۇمىس جاسايدى. مۇندا 406 227 سپورتشى تاربيەلەنىپ جاتىر.
"19 فۋتبولدان بالالار مەن جاسوسپىرىمدەردىڭ وليمپيادالىق سپورت مەكتەپ-ينتەرناتى بار ەكەن. بۇعان جىلىنا 29،7 ملرد، ياعني 30 ملرد-قا جۋىق تەڭگە بولىنەدى. سوندا ءبارى 174 ملرد! بۇل ءبىر جىلداعى بولىنگەن اقشا! ەگەر بۇل ميللياردتاردى 30 جىلعا كوبەيتەتىن بولساق، كالكۋلياتورعا سىيمايتىن سيفرلار - 5-6 تريلليون شىعا كەلەدى... ءبىر قىزىعى، قىزىعى ەمەس، شىجىعى - تريلليوندار جۇمسالعان بۇل مەكتەپتەردىڭ اتى «وليمپيادالىق رەزەرۆ سپورت مەكتەبى» دەپ ايقايلاپ تۇرعانمەن، قازاقستان تاريحتا وسى كۇنگە دەيىن فۋتبولدان ءبىر دە ءبىر رەت وليمپياداعا قاتىسىپ كورگەن جوق. سوندا الاپات قارجى كەتىپ جاتقان سپورت مەكتەپتەرىنىڭ تۇلەكتەرى قايدا؟ وليمپيادالىق رەزەرۆ قايدا؟ ناتيجە جوق، 30 جىلدان استام نە دايىنداپ كەلە جاتىرمىز؟ جۇمسالعان سانسىز قارجىنىڭ وتەۋى قايدا؟ اناۋ جىلى «الاقايلاپ»، برازيلياعا فۋتبولدان وقۋعا اتتاندىرعان 78 بالانىڭ ءبىر دە بىرەۋى فۋتبول ويناعان جوق. سوندا ميللياردتاردى شاشىپ كىمدەردى جىبەرگەنبىز؟!
ەڭ وكىنىشتىسى، 30 جىل بويى سپورتقا، سونىڭ ىشىندە فۋتبولعا ءبولىنىپ كەلگەن بيۋدجەتتىڭ وسىناۋ قىرۋار قارجىلارىنا نە فۋتبولدى دامىتقان جوقپىز، نە ينفراقۇرىلىم سالىپ جارىتقان جوقپىز. ستاديوندارىمىز كەشەگى كەڭەس وداعىنان قالعان، كەمى 70 جىل بۇرىن سالىنعان. قازاقستان 30 جىلدا 1 عانا ستاديون سالساق، سپورت بيۋدجەتى بىزدەن بىرنەشە ەسە از وزبەكستان ەۋروستاندارتقا ساي 10 ستاديون جانە ءتۇرلى سپورت عيماراتتارىن سالىپ تاستاعان... سوندىقتان دا وزبەكستان ءار وليمپيادان التىن ارقالاپ قايتادى. بيىل 20 جاسار ايگىلى وزبەك فۋتبولشىسى ابدۋقودير ۋسمانوۆتى الەمنىڭ ۇزدىك كلۋبى "مانچەستەر سيتي" 40 ملن ەۋروعا باعالادى. قانشاما مول قارجىلاندىرۋعا قاراماستان، قازاقستان وليمپيادالىق مەدالدىق ەسەپتەردە جانە دۇنيەجۇزىلىك سپورت رەيتينگىندە ەڭ سوڭعى ورىنداردا..." - دەپ اشىندى ول.
