Májilis depýtaty Qazybek Isa fýtboldan Olimpiadalyq mektepterge orasan qarjy jumsalsa da, Olimpiadaǵa qatysyp kórmegenimizdi aityp, túitkildi máseleni kóterdi, - dep habarlaidy Dalanews.kz.
Depýtat sporttaǵy biýdjettiń, iaǵni halyq qarjysynyń tiimsiz jelge shashylýyn ótkir synap, týrizm jáne sport ministrine saýal joldady.
"Qanshama mol qarjylandyrýǵa qaramastan, Qazaqstan olimpiadalyq medaldyq esepterde jáne Dúniejúzilik sport reitinginde eń sońǵy oryndarda... Fýtbol máselesi memleketten buryn eń aldymen federatsiianyń, klýbtardyń jumysy bolýǵa tiis. Sport mektepterine bir jylda jumsalatyn 174 mlrd-ty 30 jylǵa kóbeitsek, 5-6 trillion shyǵa keledi..." - dedi depýtat.
Onyń aitýynsha, Qazaqstan 30 jylda 1 ǵana stadion salsa, sport biýdjeti bizden birneshe ese az Ózbekstan 10 stadion salyp tastaǵan.
"Budan tórt jyl buryn 2021 jyly jasaǵan saýalymyz qoǵamda úlken rezonans týdyrdy. Qazaq qazynasy arqyly baiyp otyrǵan shetel legionerleri sherýin toqtatý máselesi de qoǵamnyń qatty qoldaýyna ie bolǵan edi. Al byltyr Eýropadaǵy damyǵan elder, tipti kórshimiz Ózbekstan da 17-18 sport túrin ǵana qarjylandyrsa, bizdiń Qazaqstan olardan 10 ese asyp túsip, 180 sport túrin qarjylandyratyny, iaǵni ministrliktiń sportty saýyn siyr etip kelgeni týraly kótergen máselemiz de kóptiń qoldaýyna ie boldy. Biraq jyl saiyn tek 13 jazǵy jáne 5 qysqy olimpiadalyq sport túrlerinen ǵana medal jeńip alynady. Iaǵni biz talap etken 18 sport túri osy jerden-aq shyǵyp tur. Óitkeni Sport ministrliginiń málimeti boiynsha "2018-2020 jyldary sporttyń barlyq túrlerine 646 mlrd teńge bólingen, onyń 72 paiyzyna jýyǵy elimiz úshin basymdyǵy men mańyzyn eskerilmei bólingeni" týraly biz buǵan deiin parlamentte kótergen edik", - dedi ol.
Qazybek Isa taiaýda Parlament qabyldaǵan zańda legionerlerdi baiytýdy toqtatý men 180 sport túrin birneshe esege, 62-ge qysqartý sekildi birqatar másele oń sheshilgenin jetkizdi.
"Sonyń ózinde Eýropa elderinen 4 esedei kóp?! 2018 jyldan bastap sport salasynyń biýdjeti 2 esege ósip, 1,4 trln teńgeni qurady. Aldaǵy 3 jylǵa taǵy 1,3 trln teńge bólý josparlanǵan. Biz talai jyldan beri depýtattyq saýaldarymyzda kóterip kele jatqan fýtbol klýbtaryn jekeshelendirý jaily usynysymyzdyń qoldaý taýyp jatqanyna qýanyshtymyz. Jaqynda Ulttyq quryltaida QR Prezidenti Q.K.Toqaev bul týraly jáne balalar fýtbolyn damytý jaily atap kórsetti. Elimizdegi fýtbol máselesi memleketten buryn eń aldymen federatsiianyń, klýbtardyń jumysy bolýy tiis. Barlyǵyn naryq talaby retteýi kerek. Sebebi naryq zańy árqashan óz ústemdigin júrgizedi. Sondyqtan bizdiń kóterip jatqan máselemiz, biýdjettiń -halyqtyń qarjysy tiimdi jumsalýǵa tiis. Bul týraly da Prezident qatań eskertken bolatyn", - dedi ol.
Respýblikada qazir 521 balalar men jasóspirimder sport mektebi jumys jasaidy. Munda 406 227 sportshy tárbielenip jatyr.
"19 fýtboldan Balalar men jasóspirimderdiń olimpiadalyq sport mektep-internaty bar eken. Buǵan jylyna 29,7 mlrd, iaǵni 30 mlrd-qa jýyq teńge bólinedi. Sonda bári 174 mlrd! Bul bir jyldaǵy bólingen aqsha! Eger bul milliardtardy 30 jylǵa kóbeitetin bolsaq, kalkýliatorǵa syimaityn tsifrlar - 5-6 trillion shyǵa keledi... Bir qyzyǵy, qyzyǵy emes, shyjyǵy - trilliondar jumsalǵan bul mektepterdiń aty «Olimpiadalyq rezerv sport mektebi» dep aiqailap turǵanmen, Qazaqstan tarihta osy kúnge deiin fýtboldan bir de bir ret olimpiadaǵa qatysyp kórgen joq. Sonda alapat qarjy ketip jatqan sport mektepteriniń túlekteri qaida? Olimpiadalyq rezerv qaida? Nátije joq, 30 jyldan astam ne daiyndap kele jatyrmyz? Jumsalǵan sansyz qarjynyń óteýi qaida? Anaý jyly «alaqailap», Braziliiaǵa fýtboldan oqýǵa attandyrǵan 78 balanyń bir de bireýi fýtbol oinaǵan joq. Sonda milliardtardy shashyp kimderdi jibergenbiz?!
Eń ókinishtisi, 30 jyl boiy sportqa, sonyń ishinde fýtbolǵa bólinip kelgen biýdjettiń osynaý qyrýar qarjylaryna ne fýtboldy damytqan joqpyz, ne infraqurylym salyp jarytqan joqpyz. Stadiondarymyz keshegi Keńes odaǵynan qalǵan, kemi 70 jyl buryn salynǵan. Qazaqstan 30 jylda 1 ǵana stadion salsaq, sport biýdjeti bizden birneshe ese az Ózbekstan eýrostandartqa sai 10 stadion jáne túrli sport ǵimarattaryn salyp tastaǵan... Sondyqtan da Ózbekstan ár Olimpiadan altyn arqalap qaitady. Biyl 20 jasar áigili ózbek fýtbolshysy Abdýqodir Ýsmanovty álemniń úzdik klýby "Manchester Siti" 40 mln eýroǵa baǵalady. Qanshama mol qarjylandyrýǵa qaramastan, Qazaqstan olimpiadalyq medaldyq esepterde jáne Dúniejúzilik sport reitinginde eń sońǵy oryndarda..." - dep ashyndy ol.
