انكارا قالاسىندا 9 اقپاندا باستاۋ الىپ، ستامبۋل قالاسىندا جالعاسىن تاپقان تۇركى الەمىنىڭ مادەني مۇراسىن قورعاۋعا باعىتتالعان اۋقىمدى حالىقارالىق باعدارلاما ءوز جۇمىسىن ءساتتى اياقتادى، دەپ حابارلايدى Dalanews.kz
«تۇركى الەمىنىڭ رەستاۆراسيالىق جانە كونسەرۆاسيالىق زەرتحانالارى جەلىسى» اتتى ىس-تاجىريبە الماسۋ جوباسى تۇركى ەلدەرى اراسىنداعى كاسىبي ىنتىماقتاستىقتى كۇشەيتىپ، مادەني مۇرانى ساقتاۋ سالاسىنداعى ءوزارا ىقپالداستىقتى جاڭا دەڭگەيگە كوتەردى.
باعدارلاما تۇركى مادەنيەتى جانە مۇراسى قورىنىڭ ۇيىمداستىرۋىمەن، تۇركيا رەسپۋبليكاسىنىڭ مادەنيەت جانە تۋريزم مينيسترلىگى، TİKA جانە تۇركى الەمى قورى (TDV) قولداۋىمەن وتكىزىلدى. جوبا انكارا مەن ستامبۋل قالالارىندا ءوتىپ، ارحەومەتريا، ساۋلەت ەسكەرتكىشتەرىن قورعاۋ جانە سۋاستى ارحەولوگياسى باعىتتارىندا تۇركيانىڭ زاماناۋي عىلىمي-تەحنيكالىق مۇمكىندىكتەرىن قاتىسۋشى ەلدەرگە تانىستىرۋدى ماقسات ەتتى.
باعدارلاما اياسىندا ازەربايجان، قازاقستان، قىرعىزستان، تۇركيا، وزبەكستان، ماجارستان جانە تۇرىكمەنستان ەلدەرىنەن كەلگەن مادەني مەكەمەلەردىڭ وكىلدەرى، عالىم-زەرتتەۋشىلەر مەن ساراپشىلار بايانداما جاساپ، رەستاۆراسيا مەن كونسەرۆاسيا سالاسىنداعى ءوز ەلدەرىنىڭ تاجىريبەلەرىمەن ءبولىستى. قاتىسۋشىلار تاريحي نىسانداردى قورعاۋدىڭ جاڭا ادىستەرىن، زەرتحانالىق تالداۋ تاسىلدەرىن جانە مادەني مۇرانى سيفرلاندىرۋ باعىتىنداعى تىڭ جاڭالىقتاردى تالقىلادى.
جوبانىڭ قورىتىندى كەزەڭى ستامبۋل قالاسىنىڭ ۇمرانيە اۋدانىندا ورنالاسقان حەكيمباشى تاريحي رەزيدەنسياسىندا وتكەن جۇمىس سەمينارى جانە سەرتيفيكاتتار تابىستاۋ راسىمىمەن اياقتالدى. بۇل سەمينار تۇركى ەلدەرى اراسىنداعى كاسىبي بايلانىستى نىعايتىپ، بولاشاقتا بىرلەسكەن عىلىمي جوبالاردى جۇزەگە اسىرۋعا جول اشتى
جابىلۋ سالتاناتىندا ءسوز سويلەگەن اقتوتى رايىمقۇلوۆا اتالعان باعدارلامانىڭ مادەني مۇرانى ساقتاۋ سالاسىنداعى ماماندار ءۇشىن ماڭىزدى كاسىبي الاڭعا اينالعانىن اتاپ ءوتتى. ونىڭ ايتۋىنشا، رەستاۆراسيالىق جانە كونسەرۆاسيالىق زەرتحانالار ساۋلەت ەسكەرتكىشتەرى مەن تاريحي ارتەفاكتىلەردى قورعاۋدا شەشۋشى ءرول اتقارادى، ال مۇنداي حالىقارالىق جوبالار
تۇركى ەلدەرى اراسىنداعى كاسىبي بايلانىستى ناقتى مازمۇنمەن تولىقتىرىپ، بىرلەسكەن جوبالاردىڭ كوكجيەگىن كەڭەيتەدى.
ءىس-شاراعا ءنابي اۆجى، گوكحان يازگى، تۇركى الەمىنىڭ ءار وڭىرىنەن كەلگەن مادەني مۇرا سالاسىنىڭ ساراپشىلارى، تۇركيادا اككرەديتتەلگەن ديپلوماتيالىق كورپۋس وكىلدەرى جانە بۇقارالىق اقپارات قۇرالدارىنىڭ وكىلدەرى قاتىستى. بۇل جوبانىڭ حالىقارالىق دەڭگەيدەگى بەدەلى مەن ماڭىزىن ايقىنداي ءتۇستى.
باعدارلاما سوڭىندا تۇركى مادەنيەتى جانە مۇراسى قورىنىڭ پرەزيدەنتى اقتوتى رايىمقۇلوۆا تۇركيا رەسپۋبليكاسىنىڭ مادەنيەت جانە تۋريزم مينيسترلىگىنە، TİKA-عا، تۇركى الەمى قورىنا جانە جوبانىڭ تابىستى وتۋىنە ۇلەس قوسقان بارلىق سەرىكتەستەرگە العىس ءبىلدىردى.
سونىمەن قاتار، بىلتىر ءبىر جىلدىڭ ىشىندە، تۇركى مادەنيەتى جانە مۇراسى قورىنىڭ جۇمىسى اياسىندا ءبىلىم بەرۋ مەن زەرتتەۋ سالالارىن قامتىعان حالىقارالىق 80 جوبا ىسكە اسىرىلىپ، تاريحي ەسكەرتكىشتەر قالپىنا كەلتىرىلىپ، مۇراجاي ەكسپوناتتارى جاڭارتىلىپ، رۋحاني جادىگەرلەر سيفرلاندىرىلدى.
مادەني مۇرانى ساقتاۋ – قوعامنىڭ رۋحاني جانە ۇلتتىق سانانى جاڭعىرتۋدىڭ جانە قوعامدىق ساباقتاستىقتى دامىتۋدى قامتاماسىز ەتەتىن ماڭىزدى باعىت.
وسى باعىتتاعى بىرلەسكەن جوبالار تۇركى حالىقتارىنىڭ رۋحاني بىرلىگىن نىعايتىپ، ورتاق تاريحي جادىنى كەلەر ۇرپاققا اماناتتاۋعا قىزمەت ەتە بەرەتىنى ءسوزسىز.
