ساراپشىلار حالىقتىڭ تابىسى كوبەيىپ جاتقانىمەن، شىعىستارى دا سوعان ساي ۇنەمى ارتىپ كەلە جاتقانىن ايتادى. ەڭ باستى نازار اۋدارارلىق جايت – تۇرعىندار تابىسىنىڭ جارتىسىنان استامىن تەك ازىق-تۇلىككە جۇمساپ وتىر، دەپ حابارلايدى Dalanews.kz Inbusiness.kz-كە سىلتەمە جاساپ. 

بۇل نەنى بىلدىرەدى؟ حالىقتىڭ تۇتىنۋ دەڭگەيى كوتەرىلدى مە، الدە ينفلياسيانىڭ اسەرى مە؟

شىعىن قۇرىلىمى جانە كۇمان تۋدىراتىن ەسەپتەر

ۇلتتىق ستاتيستيكا بيۋروسىنىڭ دەرەگىنشە، قازاقستاندىقتار تابىسىنىڭ 50،6 پايىزىن ازىق-تۇلىككە، 22،4 پايىزىن ازىق-تۇلىككە جاتپايتىن تاۋارلارعا، 18 پايىزىن اقىلى قىزمەتتەرگە، ال قالعان 6،6 پايىزىن كرەديت پەن قارىز وتەۋگە جۇمسايدى. اتاپ وتەرلىگى، تۇتىنۋعا بايلانىستى شىعىندار ايتارلىقتاي ۇلعايعان.

مىسالى، ماڭعىستاۋ جانە تۇركىستان وبلىستارىنىڭ تۇرعىندارى تابىستارىنىڭ 59،6 پايىزىن ازىق-تۇلىككە جۇمساعان.

بيۋرو حالىقتىڭ جان باسىنا شاققانداعى جىلدىق ورتاشا تابىسىن 1 328 907 تەڭگە دەپ كورسەتكەن. ونىڭ ىشىندە 627 427 تەڭگەسى ازىق-تۇلىككە (ايىنا شامامەن 56 035 تەڭگە)، ال 87 707 تەڭگەسى نەسيەلەرگە جۇمسالادى دەلىنگەن. ءبىراق بۇل ەسەپتە كۇمان تۋدىراتىن تۇستار بار: تۇتىنۋشىلىق نەسيە كولەمى ءوسىپ جاتقان كەزدە نەسيەنى وتەۋگە وسىنشا از قارجى جۇمسالدى دەۋ قيسىنعا كەلە بەرمەيدى.

ورتاشا تابىس پەن ناقتى شىعىن سايكەسە مە؟
ساراپشىلار بۇعان دەيىن دە حالىق تابىسىنىڭ كوپ بولىگى ازىق-تۇلىككە كەتەتىنىن ايتىپ كەلگەن. ءبىراق ولار ەسەپتى جىلدىق ەمەس، ايلىق تابىس كولەمىنە قاراپ جاسايتىن. مىسال ءۇشىن، 2024 جىلدىڭ سوڭعى توقسانىندا ورتاشا ايلىق جالاقى 434 982 تەڭگە بولدى. ونىڭ 50،6 پايىزى – شامامەن 220 101 تەڭگە – ازىق-تۇلىككە جۇمسالعان دەپ ەسەپتەلەدى. ءبىراق بۇل جەردە دە ماسەلە بار: 6،6 پايىز (28 709 تەڭگە) نەسيەگە جۇمسالادى دەۋ – ءومىر شىندىعىنا ساي كەلمەيدى. نەسيەلىك تولەمدەر مۇنان الدەقايدا جوعارى.

ازىق-تۇلىككە شىعىننىڭ ارتۋىن ينفلياسيامەن بايلانىستىرۋ – تابيعي رەفلەكس. الايدا رەسمي ورگاندار 2024 جىلى ينفلياسيا اسا جوعارى بولماعانىن ايتادى. مىسالى، ازىق-تۇلىك ينفلياسياسى نەبارى 5،5 پايىز دەڭگەيىندە بولعان. ءبىراق تۇرعىندار شىنايى ومىردە مۇلدە باسقا جاعدايدى سەزىنۋدە.

وسىعان سۇيەنە وتىرىپ، ساراپشىلار تابىس پەن شىعىن تۋرالى رەسمي ستاتيستيكا قايتا قارالىپ، ناقتىلانۋى ءتيىس دەگەن پىكىردە. سەبەبى قازىرگى دەرەكتەر ازاماتتاردىڭ كۇندەلىكتى ومىردەگى قارجىلىق جۇكتەمەسىمەن سايكەس كەلمەي وتىر.