الەكساندريا قالاسىندا (اقش، ۆيردجينيا شتاتى) وتكەن 2025 جىلعى مەكتەپ كوماندالارى اراسىنداعى شاحماتتان الەم چەمپيوناتىندا رفمم (الماتى) قۇراماسى كۇمىس جۇلدەگە يە بولدى. جەكە ەسەپتە دە وقۋشىلار جارقىن ونەر كورسەتتى: يمانعالي اقىلباي التىن مەدال جەڭىپ السا، ەدگار مامەدوۆ پەن زارينا نۇرعالييەۆا قولا مەدال يەگەرلەرى اتاندى،- دەپ حابارلايدى Dalanews.kz
FIDE World Schools Team Championship 2025 اياسىندا وتكەن بۇل دوداعا 48 ەلدەن 55 كوماندا قاتىستى. اقتاۋدا وتكەن ەكى جىل بۇرىنعى چەمپيوناتتان ايىرماشىلىعى – الەكساندريادا جاس ەرەكشەلىكتەرى بويىنشا ءبولىنىس بولمادى. ال قۇرامدا قىزدار مەن 12 جاستاعى سپورتشىلاردىڭ بولۋى ەندى مىندەت ەمەس، سپورتتىق ىرىكتەۋ ناتيجەسى رەتىندە باعالاندى.
ءتۋرنيردىڭ سوڭعى كۇنى ادەتتەگىدەن ەرتە – جەرگىلىكتى ۋاقىت بويىنشا ساعات 10:00-دە (قازاقستان ۋاقىتىمەن 19:00-دە) باستالدى. 7ء-شى تۋردىڭ باستى ينتريگاسى: دانيس قۋاندىق ۇلى (2156) مەن ونىڭ SEED Educational Complex (استانا) كومانداسى ءۇندىستاننىڭ Velammal MHS School (چەنناي) كومانداسىن توقتاتا الا ما؟ وكىنىشكە قاراي، ەسەپ ½–3½ ەسەبىمەن ۇندىلىك كوماندانىڭ پايداسىنا اياقتالدى، دەگەنمەن دانيس قارسى كوماندانىڭ كوشباسشىسى س.اسۆاتپەن (2369) تەڭ ويىن كورسەتتى.
ال قالعان ەكى قازاقستاندىق كوماندا جەڭىسكە جەتتى: رفمم (الماتى) كومانداسى Wellington College (جاڭا زەلانديا) كومانداسىن 4–0 ەسەبىمەن ويسىراتا جەڭسە، رفمم-2 (استانا) كومانداسى Gymnázium، Grösslingová 18 (براتيسلاۆا، سلوۆاكيا) كومانداسىن 2½–1½ ەسەبىمەن تىزە بۇكتىردى. سونىمەن قاتار ۇزدىكتەر اراسىنداعى ءۇش بىردەي ماچ تەڭ اياقتالدى – 2–2: The Harker School (سان-حوسە، اقش) – Royal College (كولومبو، شري-لانكا)، University High School (يرۆين، اقش) – Wisdom (تاشكەنت، وزبەكستان)، جانە Kantonsschule Alpenquai (ليۋسەرن، شۆەيساريا) – Lyceum «Photon» (گيۋمري، ارمەنيا).
وسىلايشا، تۋرنير اياقتالۋعا ءبىر تۋر قالعاندا الەم چەمپيونى بەلگىلى بولدى – Velammal MHS School (چەنناي، ءۇندىستان) كومانداسى! ولار 14 كوماندالىق ۇپاي جينادى، بۇل ناتيجەگە ەشبىر قارسىلاس جەتە المادى. ال ەكىنشى ورىن ءۇشىن كۇرەس قىزۋ ءوتتى: 11 ۇپايمەن ءۇش كوماندا – Royal College، The Harker School جانە Wisdom – جۇلدەگە ءۇمىت ارتتى. ولاردىڭ ءىزىن الا 10 ۇپايمەن ءتورت كوماندا – رفمم (الماتى)، SEED Educational Complex (استانا)، رفمم-2 (استانا) جانە Istanbul Erkek High School (تۇركيا) كەلە جاتتى.
8ء-شى تۋردا شەشۋشى ماچتار ءوتتى: Velammal MHS School – Wisdom، The Harker School – SEED Educational Complex، Royal College – رفمم-2 جانە Istanbul Erkek High School – رفمم كەزدەسۋلەرى جۇلدەلى ورىنداردىڭ تاعدىرىن انىقتادى.
چەمپيوندىقتى ەرتەرەك قامتاماسىز ەتكەن ۇندىلىك كوماندا كورشىلەس وزبەكستاننىڭ Wisdom كومانداسىن زورعا دەگەندە 2½–1½ ەسەبىمەن جەڭدى. سول كەزدە استانالىق رفمم-2 شري-لانكا وكىلدەرىن ءدال سونداي ەسەپپەن تىزە بۇكتىردى. ال الماتىلىق كوماندا تۇركيالىق وقۋشىلاردى 4–0 ەسەبىمەن ويسىراتا ۇتتى. وسى ناتيجەلەردەن كەيىن بارشا نازار The Harker School مەن SEED Educational Complex اراسىنداعى كەزدەسۋگە اۋدى. ەگەر اقش كومانداسى جەڭسە – ولاردا كۇمىس مەدال، ال قازاقستان ءۇشىن 3ء-شى ورىن عانا قالادى. ەگەر ءبىزدىڭ كوماندا جەڭسە – العاشقى ءۇش ورىندى قازاقستاندىقتار بولىسەدى: 2ء-شى ورىن – رفمم (الماتى)، 3ء-شى ورىن – SEED Educational Complex، 4ء-شى ورىن – رفمم-2 (استانا). الايدا كەزدەسۋ تەڭ اياقتالدى – 2–2...
قورىتىندى كوماندالىق كەستە كەلەسىدەي بولدى:
- Velammal MHS School (چەنناي، ءۇندىستان) – 16 كوماندالىق ۇپاي، زوننەبورن–بەرگەر كوەففيسيەنتى: 242،5، جەكە ۇپايلار: 26½
- رفمم (الماتى) – 12 ۇپاي، 254، 27؛
- The Harker School (سان-حوسە، اقش) – 12 ۇپاي، 174،5، 20
- رفمم-2 (استانا) – 12 ۇپاي، 139، 19؛
- University High School (يرۆين، اقش) – 11 ۇپاي، 180، 22؛
- Royal College (كولومبو، شري-لانكا) – 11 ۇپاي، 177، 20½؛
- Lyceum «Photon» (گيۋمري، ارمەنيا) – 11 ۇپاي، 168،5، 22؛
- SEED Educational Complex (استانا) – 11 ۇپاي، 158،5، 19½؛
- رفمم-1 (استانا) – 8 ۇپاي، 108،5، 16½؛
- د.ا. قونايەۆ اتىنداعى مەكتەپ-گيمنازياسى (اقتوبە) – 7 ۇپاي، 97، 15؛
- و.ا. جولداسبەكوۆ اتىنداعى №9 IT-ليسەي (شىمكەنت) – 6 ۇپاي، 87، 13.
2025 جىلعى مەكتەپ كوماندالارى اراسىنداعى الەم چەمپيونى اتاعىن Velammal MHS School (چەنناي، ءۇندىستان) جەڭىپ الدى. كوماندا مۇشەلەرى تاقتا رەتى بويىنشا: WFM كيرتي شري رەددي (راپيد رەيتينگ – 1910/كلاسسيكا – 2033)، IM س. اسۆات (2369 / 2500)، FM دااكشين ارۋن (2021/2274)، IM ا.ر. يلامپارتحي (2358/2515) جانە FM ك.پ. پراناۆ (2090/2276). كاپيتانى – 56 جاستاعى ۆەلاۆان سۋببيا.
كۇمىس جۇلدەگەر رفمم (الماتى) كومانداسىن قۇتتىقتايمىز: GM ەدگار مامەدوۆ (2299/2490)، FM يمانعالي اقىلباي (2292/2357)، WIM زارينا نۇرعالييەۆا (2152/2345)، CM ءاليحان داۋلەت (2173/2158)، ءادىجان ەسەنعالي (1989/2071). كوماندا كاپيتانى – 52 جاستاعى سايات ەگەنبەردييەۆ.
جۇلدەلى ورىنعا ءبىر قادام جەتپەي قالعان رفمم-2 (استانا) كومانداسىنا FM ەرعالي سۇلەيمەننىڭ (2337) كوشباسشىلىعى جەتكىلىكسىز بولدى. قۇرامدا: يسلام ايتەن (2045)، ۆلاديمير ساۆيسكيي (1977)، ەرنۇر احمەديار (1802)، مادينا مومىن (1792)، دۇكەمبايەۆا كاميلا (1434). كاپيتانى – بوتاكوز جولعاسبايەۆا.
SEED Educational Complex (استانا) كومانداسى دا WFM ماريا حولياۆكونىڭ (1987) قاتىسۋىنسىز السىرەپ قالدى. قۇرامدا: CM دانيس قۋاندىق ۇلى (2156)، الديار سايلاۋباي (2011)، ارسەن ايتمۇحانوۆ (1762)، ايلين زاركىم (1905). كاپيتانى – قۋانىش سۇلەيمەن.
كوماندالىق كۇمىسپەن قاتار، جەكەلەگەن تاقتالاردا دا ءۇش مەدال جەڭىپ الىندى: يمانعالي اقىلباي 2ء-شى تاقتادا ءابسوليۋتتى ناتيجە – 8 ۇپايدىڭ 8ء-ىن جيناپ، التىن مەدالعا يە بولدى. ەدگار مامەدوۆ پەن زارينا نۇرعالييەۆا 8 پارتيادا 6½ ۇپاي جيناپ، سايكەسىنشە 1 جانە 3ء-شى تاقتالاردا قولا مەدال يەلەندى.
12 جاسار شاحماتشىلاردان قۇرالعان ءۇش قازاقستاندىق كوماندانىڭ ونەرى جايىندا ايتساق، ولار الەمنىڭ مىقتى قارسىلاستارىمەن ويناپ، قۇندى تاجىريبە جينادى.
حالىقارالىق مەكتەپ شاحمات فەدەراسياسىنىڭ (ISCF) جانە KazChess/قازاقستان شاحمات فەدەراسياسىنىڭ پرەزيدەنتى تيمۋر تۋرلوۆ جارىس قورىتىندىسىنا پىكىر ءبىلدىردى:
«قازاقستان ءۇشىن بۇل تۋرنير تەك سپورتتىق دودا عانا ەمەس، بۇكىل شاحمات قوزعالىسىن دامىتۋ قۇرالى رەتىندە ماڭىزدى. ءبىز جاي عانا قاتىسقان جوقپىز – ونىڭ ۇيىمداستىرىلۋىنا ەلەۋلى ۇلەس قوستىق. سوندىقتان جارىستىڭ جوعارى دەڭگەيدە وتكەنىنە وتە قۋانىشتىمىز. ءبىزدىڭ جاس شاحماتشىلار ءۇشىن بۇل – باعا جەتپەس تاجىريبە، ال ەلىمىز ءۇشىن – مەكتەپتەردەگى جۇيەلى جۇمىستىڭ ناتيجەسىن كورسەتەتىن ايقىن دالەل. بارلىق مەدالدار – ۇلكەن ەڭبەكتىڭ، تاباندىلىقتىڭ جانە ناعىز كوماندالىق رۋحتىڭ جەمىسى. قازاقستاننىڭ اقش-تاعى ەلشىلىگىنە جانە جەكە ەلشى ەرجان اشىقبايەۆقا دەلەگاسيامىزعا قولداۋ بىلدىرگەنى جانە شاحماتتىڭ دامۋىنا كوڭىل بولگەنى ءۇشىن العىس ايتامىز. بارلىق قاتىسۋشىلار مەن باپكەرلەردى قۇتتىقتايمىن: ءبىز سىزدەرمەن ماقتانامىز جانە ودان دا بيىك ماقساتتارعا بىرگە بەتتەيمىز!».
ايتا كەتۋ كەرەك، قازاقستان رەسپۋبليكاسىنىڭ اقش-تاعى ەلشىسى ەرجان اشىقبايەۆ چەمپيوناتتىڭ سالتاناتتى اشىلۋ راسىمىنە عانا قاتىسىپ قويماي، بۇكىل تۋرنير بارىسىندا ءبىزدىڭ جاس سپورتشىلارىمىزعا جانكۇيەرلىك تانىتىپ، ەرەكشە قولداۋ ءبىلدىردى.
