تالعاردا ءبىر توپ جىگىتىڭ قولىنان قازا تاپقان شەرزاتتىڭ اكەسى تەرگەۋگە سەنبەيتىنىن جەتكىزدى. ونىڭ سوزىنشە، پوليسەي ۆيدەونى الىپ كەتىپ، ءوشىرىپ تاستاعان، دەپ حابارلايدى Dalanews.kz.
“ءبىزدىڭ دۇكەندە تۇرعان ۆيدەونى الىپ، ءوشىرىپ تاستاعان. ۆيدەو جوق دەيدى. ويلاڭدارشى، وسى ادىلدىك پە؟ ول ۆيدەودا دۇكەنگە كىرگەن قىلمىسكەرلەر بار. سونى ءوشىرىپ تاستاعان. مەن سىزدەرگە ۆيدەونى كورىپ، قىلمىسكەرلەردىڭ ءارقايسىن كورسەتە الام دەيمىن. ەندى كىمگە سەنەيىن، ايتىڭىزدارشى؟ قوسىڭدارشى دەسەم، ۆيدەونى ءوشىرىپ وتىر. نە ءۇشىن شىقپايمىن؟ بالام ءۇشىن شىعىپ وتىرمىن. مەن ولسەم ءولىپ كەتەيىن، باسقا جاسوسپىرىمدەر مەرت بولماسىن”، – دەيدى مارقۇمنىڭ اكەسى.
ەسكە سالايىق، قايعىلى وقيعا 4 قازانعا قاراعان ءتۇنى بولعان ەدى. سۋىق قارۋ اسىنعان ءبىر توپ جىگىت مارقۇم جاسوسپىرىمگە، ونىڭ اعاسى مەن اكەسىنە شابۋىل جاساعان.
شەرزاتتىڭ اكەسى جالعا دۇكەن الىپ، ساۋدا جاساۋمەن اينالىساتىن. ارتى ولىممەن اياقتالعان توبەلەس وسى دۇكەننەن باستالعان.
ءبىر جىگىت دۇكەنگە كەلىپ، ءبىر قۇتى سىرا الىپ، اقشاسىن تولەمەي كەتە بارعان. شەرزاتتىڭ اكەسى سىرانىڭ اقشاسىن تولەۋدى تالاپ ەتكەن كەزدە جانجال تۋىنداعان.
شەرزات وسى ساتتە كليەنتتىڭ دۇكەننەن شىعىپ كەتۋىن سۇراعان. ءبىراق سىرا العان جىگىت دوستارىنا قوڭىراۋ سوعىپ، دۇكەنگە ءۇش كولىكپەن ءبىر توپ جىگىت كەلگەن.
ءبىر توپ جىگىت شەرزاتتى تەپكىلەي باستاعان. بۇل ءساتتى تۇرعىندار ۆيدەوعا ءتۇسىرىپ العان. 10-شى سىنىپتا وقيتىن شەرزات اتا-اناسىنىڭ دۇكەنىنە كەزدەيسوق كەلگەن. سۋىق قارۋمەن كەلگەن بۇزاقىلار ەشكىمدى اياماپتى. قانسىراعان ءبىر وتباسىنىڭ مۇشەلەرى اۋرۋحاناعا جەتكىزىلگەن. كوپ ۇزاماي شەرزات جانساقتاۋ بولىمىندە كوز جۇمعان.
