اۋىل شارۋاشىلىعى – ۇيعىر اۋدانىندا نەگىزگى سالالارىنىڭ ءبىرى. ەڭبەكقور شارۋالاردىڭ ماڭداي تەرىمەن وسىرىلگەن ونىمدەردى ەلگە تانىتۋ، جەرگىلىكتى كاسىپكەرلەردى قولداۋ جانە ۇلتتىق تاعامداردى دارىپتەۋ ماقساتىندا ۇيعىر اۋدانى اۋىل شارۋاشىلىعى كورمەسىن ۇيىمداستىردى،- دەپ حابارلايدى Dalanews.kz
بۇل كورمە – تەك ونىمدەردىڭ ساپاسىن كورسەتۋ الاڭى عانا ەمەس، سونداي-اق اۋدانداعى كاسىپكەرلەر مەن شارۋا قوجالىقتارىنىڭ ەڭبەگىن باعالاپ، ولاردىڭ اۋىل شارۋاشىلىعىنا قوسقان ۇلەسىن ناسيحاتتاۋدىڭ ءتيىمدى جولى. كورمە اياسىندا جەرگىلىكتى شارۋالاردىڭ تابيعي ءارى ەكولوگيالىق تازا ونىمدەرى مەن ۇلتتىق تاعامداردىڭ الۋان تۇرىمەن تانىستىرىلدى.
كورمەگە اۋداننىڭ كوپتەگەن كاسىپكەرلەرى مەن شارۋاشىلىق يەلەرى قاتىستى. ولار تاۋىق ەتى، ءسۇت ونىمدەرى، بال، جەمىس-جيدەك، قولونەر بۇيىمدارى جانە باسقا دا ءونىم تۇرلەرىن ۇسىندى.
بۇل كەلۋشىلەر ءۇشىن اۋىلدىڭ ناعىز ءدامىن سەزىنۋگە تاپتىرماس مۇمكىندىك بولدى.
سونىمەن قاتار، ۇلتتىق تاعامدار مەن ءداستۇرلى ونىمدەردىڭ كەڭىنەن ۇسىنىلۋى قازاق حالقىنىڭ باي مادەنيەتى مەن اسحاناسىن ناسيحاتتاپ، ۇرپاقتان-ۇرپاققا بەرىلەتىن اسىل مۇرانى ساقتاۋعا ۇلكەن ۇلەس قوسادى. وسىنداي يگى باستامالار اۋىل تۇرعىندارىنىڭ ءال-اۋقاتىن جاقسارتۋعا جانە بولاشاقتا اۋداننىڭ اۋىل شارۋاشىلىعى الەۋەتىن ارتتىرۋعا مۇمكىندىك بەرەدى.
