جەڭىسكە جەتكەن نۇروتاندىقتاردىڭ 47%-ى – جاڭا تۇلعالار، ونىڭ ىشىندە ءبىلىم بەرۋ سالاسىنىڭ وكىلدەرى، كاسىپكەرلەر، فەرمەرلەر بار. ورتاشا جاسى – 46 جاس. ايەلدەر – 10%، 35 جاسقا دەيىنگى جاستار سانى – 18%. كوپشىلىگى باستاۋىش پارتيا ۇيىمدارىنىڭ ءتوراعالارى، پارتياىشىلىك پرايمەريزدىڭ قاتىسۋشىلارى.
– 2021 جىلعى 25 شىلدەدە مەملەكەت باسشىسىنىڭ باستاماسى بويىنشا وتكەن اۋىل اكىمدەرىن تىكەلەي سايلاۋ پارتيالاردىڭ جەرگىلىكتى جەرلەردە حالىقپەن قويان-قولتىق جۇمىس ىستەۋىنە جۇيەلى سەرپىن بەردى. باسەكەلى كۇرەس ناتيجەسىندە نۇروتاندىقتار سايلاۋ وكرۋگتەرىنىڭ باسىم كوپشىلىگىندە جەڭىسكە جەتتى. سونىمەن بىرگە، ءوزىن-وزى ۇسىنعاندار جانە باسقا 5 پارتيانىڭ وكىلدەرى دە اكىم بولىپ سايلاندى. وسىلايشا، بارلىق دەڭگەيلەردە پروپورسيونالدى سايلاۋ جۇيەسىنە كوشۋ پارتيالاردىڭ ينستيتۋسيونالدىق ماڭىزى مەن ءرولىن نىعايتتى. كەڭ تۇرعىدان العاندا، بۇل سايلاۋ ازاماتتاردىڭ شەشىمدەر قابىلداۋ پروسەسىنە قاتىسۋىن جانداندىرۋعا، سونداي-اق ەسەپ بەرەتىن مەملەكەتتى قالىپتاستىرۋعا باعىتتالعان، ەلباسى ۇسىنعان 5 ينستيتۋسيونالدى رەفورمانىڭ ناقتى ىسكە اسىرىلۋىن راستادى، – دەپ اتاپ ءوتتى بيلەۋشى پارتيا ءتوراعاسىنىڭ ءبىرىنشى ورىنباسارى باۋىرجان بايبەك بۇعان دەيىنگى ءوزىنىڭ «پارتيالىق جۇيە – مەملەكەتتىلىكتىڭ ينستيتۋسيونالدىق تىرەگى» اتتى ماقالاسىندا.
ەسكە سالا كەتەيىك، بيىل اۋىل اكىمدەرىنىڭ العاشقى تىكەلەي سايلاۋى 864 اۋىلدىق وكرۋگتە ءوتتى. ونىڭ ىشىندە 730 اكىم 25 شىلدەدە، تاعى 134 اكىم تامىز – جەلتوقسان ايلارى ارالىعىندا سايلاندى.
«اق جول» دەموكراتيالىق پارتياسى، قازاقستاننىڭ حالىق پارتياسى، «Adal»، «اۋىل» جانە جالپىۇلتتىق سوسيال-دەموكراتيالىق پارتيالارىنىڭ كانديداتتارى اۋىلدىق وكرۋگتەردىڭ 8،5%-ىندا جەڭىسكە جەتتى. اۋىلدىق وكرۋگتەردىڭ 4%-ىندا بىردە-بىر پارتيانىڭ وكىلى بولىپ تابىلمايتىن ءوزىن-وزى ۇسىنعان ۇمىتكەرلەر سايلاندى.
پارتيا باسپا ءسوز قىزمەتىنىڭ مالىمەتى بويىنشا، «Nur Otan» پارتياسىنىڭ بارلىق كانديداتتارى پارتيانىڭ ساياسي مەنەدجمەنت مەكتەبى بازاسىندا سەمينارلاردان ءوتىپ، قاجەتتى ۇيىمداستىرۋشىلىق، ءادىسنامالىق جانە باسقا دا قولداۋمەن قامتاماسىز ەتىلدى. ءارقايسىسىنىڭ ءوز سايلاۋالدى باعدارلاماسى بار، ول پارتيانىڭ قولداۋىمەن اۋماقتاردىڭ مۇمكىندىكتەرىن ەسكەرە وتىرىپ، ءتيىستى رەسۋرستارمەن قامتاماسىز ەتىلگەن.
