قازاقستاننىڭ كولىك مينيسترلىگى ۇشقىشتار مەن ديسپەچەردىڭ سويلەسكەن اڭگىمەسىنىڭ تاراۋىنا قاتىستى پىكىر ءبىلدىردى، دەپ حابارلايدى Dalanews.kz.
ۆەدومستۆو مالىمەتىنشە، كولىك مينيسترلىگىنە قاراستى اۆياسيالىق وقيعانىڭ سەبەبىن انىقتاۋ جونىندەگى ارنايى كوميسسياسىنىڭ جۇمىسى جالعاسىپ جاتىر.
– الدىن الا ەسەپ جاريالانعانعا دەيىن كوميسسيا رەسمي دەرەككوزى جوق عالامتوردا جاريالانعان دەرەككە تۇسىنىكتەمە بەرمەيدى. ەستەرىڭىزگە سالا كەتەيىك، كوميسسيا ق ر زاڭناماسىنىڭ تالاپتارىنا جانە يكاو-نىڭ 13-قوسىمشاسىنىڭ تالاپتارىنا سايكەس الدىن الا ەسەپ جاريالايدى. وندا تەرگەۋ بارىسى جانە تەرگەۋ ناتيجەسىندە انىقتالعان ناقتى اقپارات بولادى، – دەلىنگەن مينيسترلىك حابارلاماسىندا.
ەسكە سالايىق، بۇعان دەيىن اقتاۋدا اپاتقا ۇشىراعان ۇشاقتىڭ ۇشقىشتار مەن ديسپەچەردىڭ نە جايلى سويلەسكەنى بەلگىلى بولعان ەدى. رەسەيلىك Baza تەلەگرام ارناسى اقتاۋ ماڭىندا اپاتقا ۇشىراعان Embraer-190 ۇشاعىنىڭ ۇشقىشتارى مەن ديسپەچەرلەردىڭ نە تۋرالى سويلەسكەنىن جاريالادى. جازبادان گروزنىيعا دا، ماحاچكالاعا دا قونباي، ارتىنان باكۋعا ۇشىپ، اقىرى اقتاۋعا قونۋ تۋرالى شەشىمدى AZAL ەكيپاجى ءوزى قابىلداعانىن اڭعارۋعا بولادى.
ستەنوگراممادان سونداي-اق ۇشاق بورتىندا وتتەگى باللونىنىڭ جارىلۋى مەن قوزعالتقىشقا قۇس ءتۇسۋى تۋرالى نۇسقالاردى ەكيپاج مۇشەلەرى ايتقانىن تۇسىنۋگە بولادى.
Baza دەرەككوزدەرى كىم ەكەنىن ايتپاعان. رەسمي تۇردە جازبانىڭ شىنايىلىعى مەن تولىقتىعى دا راستالماعان.
