ايتەكە بي بايبەك ۇلىنىڭ 375 جىلدىق مەرەيتويى ق ر مادەنيەت جانە سپورت ءمينيسترىنىڭ 2018 جىلعى 25 تامىزداعى №228 بۇيرىعى بويىنشا 2019-2021 جىلدارى وتكىزىلەتىن مەرەيتويلار مەن اتاۋلى كۇندەردىڭ تىزبەسىنە ەنگىزىلگەن بولاتىن. وسىعا وراي، حالىقارالىق «جەتى جارعى» جانە «قوجابەرگەن جىراۋ» قايىرىمدىلىق قورى تۇركىستان وبلىسى، قازىعۇرت اۋدانىندا شىمكەنت - تاشكەنت حالىقارالىق كۇرە جولىنىڭ بويىنداعى «بابالار رۋحىنا تاعزىم» كەشەنىنە ۇلتىمىزدىڭ ۇلى بيلەرى تولە بي، قازىبەك بي، ايتەكە بيلەرگە بيىك تاس تۇعىر ۇستىندەگى ايبىندى ەسكەرتكىشتەرىن ورناتتى.
ەسكەرتكىش ق ر مادەنيەت جانە سپورت مينيسترلىگىنىڭ ارنايى كوميسسياسىنىڭ شەشىمىنە سايكەس، قۇزىرلى ورگاننىڭ بۇيرىعىمەن بەكىتىلگەن.
ەسكەرتكىشتىڭ اشىلۋىنا تۇركىستان وبلىسىنىڭ اكىمى ءومىرزاق شۇكەيەۆ، «ارداگەرلەر ۇيىمى» رەسپۋبليكالىق قوعامدىق بىرلەستىگىنىڭ ورتالىق كەڭەسىنىڭ ءتوراعاسى، ق ر پارلامەنتى ءماجىلىسىنىڭ دەپۋتاتى باقتىقوجا ىزمۇحامبەتوۆ، مەملەكەتتىك ورگانداردىڭ وكىلدەرى، ق ر پارلامەنتى ءماجىلىس جانە سەنات دەپۋتاتتارى، قوعام قايراتكەرلەرى، زيالى قاۋىم وكىلدەرى مەن وبلىس جۇرتشىلىعى قاتىسادى.
رەسپۋبليكاعا ەڭبەگى سىڭگەن تانىمال انشىلەردىڭ كونسەرتتىك باعدارلاماسىمەن، ۇلتتىق سپورت ويىندارىمەن جالعاسىپ،ۇلى بيلەرگە ارنالعان اس بەرىلەدى.
بۇل ەسكەرتكىشتى ورناتۋ يدەياسىن ويلاستىرىپ، تۇعىرىنا قوندىرعان بەلگىلى ۇلتجاندى ازامات، مەملەكەتشىل قايراتكەر، زاڭ عىلىمدارىنىڭ دوكتورى، پروفەسسور بەكەت تۇرعارايەۆ. بىلتىر وسى «بابالار رۋحىنا تاعزىم» كەشەنىنە وربۇلاق شايقاسى جەڭىسىنىڭ 375 جىلدىق مەرەيتويىنا وراي ۇلى جەڭىستىڭ قاھارماندارى سالقام جاڭگىر حان مەن ءجالاڭتوس باھادۇرگە ارناپ، ەكەۋىنىڭ ات ۇستىندەگى ايبىندى ەسكەرتكىشى ورناتىلعان بولاتىن.
شارانىڭ وتەتىن ۋاقىتى: 2019 جىل، 27 ءساۋىر، 10.00.
وتەتىن ورنى:تۇركىستان وبلىسى، قازىعۇرت اۋدانى شىمكەنت - تاشكەنت حالىقارالىق كۇرە جولىنىڭ 45 شاقىرىمىنداعى ساراپحانا اۋىلى.
