اباي وبلىسىنىڭ ءۇرجار اۋدانىنداعى بەستەرەك اۋىلىندا جانتۇرشىگەرلىك جاعداي بولدى. جۇرگىزۋشى كولىكتى باسقارا الماي، اۋلادا ويناپ وتىرعان التى بالانى قاعىپ كەتكەن. سالدارىنان ەكى بالا وقيعا ورنىندا، بىرەۋى اۋرۋحاناعا بارار جولدا قايتىس بولعان، دەپ حابارلايدى Dalanews.kz.
Syrmedia مالىمەتىنشە،بەستەرەكتە بالالاردى قاعىپ كەتكەن جۇرگىزۋشىنىڭ ۇلى حابارلاسىپ، اكەسى تۋرالى ايتىپ بەرگەن.
ونىڭ ايتۋىنشا، اكەسىنە رولدە وتىرعان ساتتە ۇستاماسى ۇستاپ قالعان. اكەسى جۇمىسسىز بولعان، دەنساۋلىعى دا ناشار بولعان. ۇلىنىڭ ايتۋىنشا، ول ءقازىر وقيعا ورنىنا استانادان جولعا شىعىپ بارا جاتىر.
19 تامىزدا تۇندە مەملەكەت باسشىسىنىڭ تاپسىرماسى بويىنشا اباي وبلىسى ءۇرجار اۋدانىندا جول-كولىك وقيعاسىنىڭ سالدارىنان زارداپ شەككەن بالالارعا مەديسينالىق كومەك كورسەتۋ ءۇشىن قورعانىس مينيسترلىگىنىڭ س-295 اسكەري-كولىك اۆياسياسىنىڭ ۇشاعىمەن قۇرامىندا رەانيماتولوگ، نەيروحيرۋرگ جانە تراۆماتولوگ بار مەديسينالىق بريگادا ۇشتى.
دەنساۋلىق ساقتاۋ مينيسترلىگى ساعات 23.43-تە اباي وبلىسىنىڭ ءۇرجار اۋدانىنا جول-كولىك وقيعاسىنىڭ سالدارىنان زارداپ شەككەن بالالارعا مەديسينالىق كومەك كورسەتۋ ءۇشىن قورعانىس مينيسترلىگىنىڭ اسكەري-كولىكتىك اۆياسياسىنا تيەسىلى س-295 ۇشاعى دارىگەرلەرمەن كەلگەنىن حابارلادى.
