اباي وبلىسى اكىمى بەرىك ءۋالي اۋدانعا جۇمىس ساپارى بارىسىندا شولپان اۋىلىنداعى «بەرەكە» شارۋا قوجالىعىنىڭ جۇمىسىمەن تانىستى.

جەكە كاسىپكەر بەكزات بايمۇحامەت ۇلى جەكە ءوز قاراجاتى ەسەبىنەن جالپى قۇنى 55 ميلليون تەڭگەنى قۇرايتىن تاۋارلى بالىق جانە قۇس شارۋاشىلىعىن دامىتۋدى قولعا الدى. قوجالىقتا نەگىزىنەن اق امۋر مەن تۇقى بالىعى وسىرىلەدى.

قازىرگى تاڭدا 2 گەكتار اۋماققا توعان سالىنىپ، 20 مىڭ دانا شاباق جىبەرىلگەن. جوبا شەڭبەرىندە ءقوناقۇي سالىنعان.

بۇگىندە ءۇي قۇستارىنا ارنالعان قورانىڭ قۇرىلىسى جۇرگىزىلىپ جاتىر. جوباعا 16 گەكتار جەر بولىنگەن. ال وندىرىستىك نىساندا 5 ادام جۇمىسپەن قامتىلاتىن بولادى. جالپى ءۇرجار اۋدانىندا وسى ىسپەتتەس 3 جوبانى ىسكە قوسۋ جوسپارلانىپ وتىر.

كاسىپكەر جوبانى تولىق ىسكە قوسۋ ءۇشىن ەكى باعىتتا مەملەكەتتىك قولداۋعا مۇقتاج ەكەنىن جەتكىزدى. وبلىس اكىمىنە وندىرىستىك ايماققا ەلەكتر جارىعىن تارتۋعا، «اۋىل اماناتى» باعدارلاماسى شەڭبەرىندە 2،5 پايىزدىق جەڭىلدەتىلگەن نەسيە الۋعا كومەك كورسەتۋدى سۇرادى.

ايماق باسشىسى جوبانىڭ ماڭىزىن اتاپ ءوتىپ، كاسىپكەرگە مەملەكەتتىك باعدارلامالار اياسىندا كومەك كورسەتىلەتىن ايتتى.