بۇگىن وبلىس اكىمى جانسەيىت تۇيمەبايەۆ ءۇندىستاننىڭ «VENKY'S» كومپانياسىنىڭ وكىلدەرىمەن كەزدەستى.
ءۇندىستان نارىعىنىڭ 90 پايىزعا جۋىعىن قۇس ەتىمەن قامتاماسىز ەتىپ وتىرعان الپاۋىت كومپانيا تۇركىستان وبلىسىنا ينۆەستيسيا سالۋعا نيەتتى.
كەزدەسۋدە ءوڭىر باسشىسى وبلىسىمىزدا اۋىل شارۋاشىلىعى سالاسىن دامىتۋعا تولىق مۇمكىنىك بار ەكەنىن جەتكىزدى.
— تۇركىستان وبلىسى وزبەكستان رەسپۋبليكاسىمەن شەكتەسەدى. وڭىردەن باتىس ەۋروپا – باتىس جۇڭگو ماگيسترالى وتەدى. جۇمىس كۇشى كوپ ءارى تابيعاتى شارۋاشىلىققا قولايلى. بىرنەشە قۇس فابريكاسى بار. ءبىز اكىمدىك تاراپىنان قۇس شارۋاشىلىعىن دامىتىپ، كلاستەر قۇرۋعا ءاردايىم قولداۋ كورسەتۋگە دايىنبىز. ەگەر ينۆەستورلار كەلەتىن بولسا، جەر جانە ينفراقۇرىلىم ماسەلەسىنە دە كومەك كورسەتىلەدى. ەكىجاقتى جوبالار ءۇندىستانعا دا، قازاقستانعا دا پايدالى بولادى دەپ ويلايمىن. بىرلەسىپ جۇمىس ىستەۋگە ءازىرمىز، — دەدى ج.تۇيمەبايەۆ.
ال، «Venkateshwara Hatcheries Private Limited» (VH group) كومپانياسىنىڭ وپەراسيالار جونىندەگى باس ديرەكتورى مۋرتۋزا الي يسمايل ماگدۋم تۇركىستانعا كەلۋدەگى ماقساتىن ءتۇسىندىردى. ينۆەستوردىڭ ايتۋىنشا، كومپانيا 1971 جىلى قۇرىلعان. تەك ءۇندىستاندا عانا ەمەس، اقش جانە ەۋروپا ەلدەرىندە بىرلەسكەن كاسىپورىندارى مەن جوبالارى بار. ءقازىر الەمدە «Venky's» دەگەن اتپەن تانىلعان الپاۋىت كومپانيا قۇس وسىرۋمەن، جۇمىرتقا وندىرۋمەن قاتار جۇمىرتقا ۇنتاعىن دا كادەگە اسىرىپ ءجۇر. ارنايى زەرتتەۋ ورتالىقتارىندا قۇس شارۋاشىلىعىنا قاجەتتى ۆاكسينا شىعارۋمەن دە اينالىسادى. وسى دەرەكتەرگە توقتالعان ءۇندىستاندىق كومپانيا باسشىسى كەلىسسوزدەر ءساتتى اياقتالسا، تۇركىستان وبلىسىندا جۇمىس باستاۋعا دايىن ەكەنىن مالىمدەدى. دالىرەك ايتساق، «ورداباسى قۇس» جانە «شىمكەنت قۇس» جشس-ىمەن دە بىرىككەن جوبالاردى جۇزەگە اسىرۋدى كوزدەپ وتىر.
وبلىس اكىمى جانسەيىت تۇيمەبايەۆ قۇس شارۋاشىلىعىن حالىقارالىق دەڭگەيگە كوتەرۋ ارقىلى ەكسپورت كولەمىن ارتتىرۋعا بولاتىنىن ايتىپ، وسى سالاعا جاۋاپتى ورىنباسارلارىنا ءۇندىستاندىق ينۆەستورمەن ىسكەرلىك بايلانىستى ناقتىلاۋدى تاپسىردى.
تۇركىستان وبلىسى اكىمىنىڭ باسپا ءسوز قىزمەتى
