شىمكەنتتە جىل باسىندا جالاۋىن كوتەرگەن ۇلتتىق مەكتەپ ليگاسى ءوز مارەسىنە جاقىنداپ كەلەدى. بيىلعى ليگا جاس ەرەكشەلىكتەرىنە قاراي سپورتتىڭ 10 ءتۇرى بويىنشا (باسكەتبول، ۆولەيبول، گاندبول، فۋتبول، فۋتزال، اسىق اتۋ، بەس اسىق، پرەزيدەنتتىك سىناما، ۇستەل تەننيسى، توعىزقۇمالاق) اقپان مەن مامىر ايلارى ارالىعىندا ءوتىپ جاتىر، – دەپ حابارلايدى Dalanews.kz شىمكەنت قالاسى اكىمدىگىنىڭ باسپا ءسوز قىزمەتىنە سىلتەمە جاساپ.

ءىس-شارانىڭ ماقساتى – بالالار اراسىندا سالاۋاتتى ءومىر سالتىن ناسيحاتتاۋ، سپورت ارقىلى زياندى ادەتتەردەن ارىلۋ، پاتريوتتىققا تاريبەلەۋ، رەسپۋبليكالىق جارىسقا قاتىساتىن مەكتەپ كومانداسىن انىقتاۋ.

جارىسقا 130 مەكتەپتەن I، II، III-كەزەڭدەرىنە 40 مىڭ وقۋشى قاتىستى. سپورتتىق دودادا العاشقىلاردىڭ ءبىرى بولىپ 5-6 سىنىپتار اراسىنداعى باسكەتبول ويىنىنىڭ چەمپيوندارى ماراپاتتالدى. قىزدار اراسىندا №86 مەكتەپ شاكىرتتەرى، ۇلدار اراسىندا №107 مەكتەپ وقۋشىلارى تالدىقورعان قالاسىندا وتەتىن رەسپۋبليكالىق جارىسقا جولداما الدى.

فينال 15 مامىرعا دەيىن جالعاسادى.