ءماجىلىس دەپۋتاتى ەرمۇرات باپي ماجىلىستە "حالىق بانككە" قاتىستى ماسەلەنى كوتەردى،- حابارلايدى Dalanews.kz.

ول قازاقستان رەسپۋبليكاسىنىڭ باس پروكۋرورىنا دەپۋتاتتىق ساۋال جولدادى.

"مەنىڭ دەپۋتاتتىق ساۋالىما بۇدان بەس جىل بۇرىن بانكروتتىققا ۇشىراعان ادال شارۋالار، ياعني جەردىڭ پاي ۇلەسىنە يە سولتۇستىك قازاقستان وبلىسىنىڭ قاراپايىم فەرمەرلەرىنىڭ جانايقايى ارقاۋ بولىپ وتىر. شارۋالار وزدەرىنە تيەسىلى جەرلەرىنە قاتىستى دۋشار بولىپ وتىرعان ماسەلەلەرى بويىنشا ماعان جۇگىنگەن بولاتىن. ءوتىنىش بەرۋشىلەردىڭ مالىمدەۋىنشە، "اليبي" اگروحولدينگىنىڭ باسشىلىعى وسى ازاماتتارعا تيەسىلى جەر ۋچاسكەلەرىن پايشىلاردىڭ رۇقساتىنسىز الاياقتىق جولمەن، ولاردىڭ قولدارىن قويۋ ارقىلى ءارتۇرلى قارجى ينستيتۋتتارىنا، ونىڭ ىشىندە "حالىق بانك" اق-نا كەپىلگە قويىپ، نەسيەلەر العان. ال الىنعان قارىزدار بىردەن شەتەلگە شىعارىلىپ وتىرعان"، - دەيدى دەپۋتات.

ءباپيدىڭ سوزىنشە، "حالىق بانكى" بولسا قالىپتاسقان جاعدايدا ءوز قۇقىعىن تەرىس پايدالانىپ، پايشىلارعا قارسى مۇلدەم جوسىقسىز ارەكەتتەرگە بارىپ وتىرعان كورىنەدى. ال سوتتىڭ شەشىمىممەن حالىق بانكىنىڭ پايداسىنا 4،3 ملرد. تەڭگە كولەمىندە قارىز وندىرىلەدى.

"بانك تاراپىنان 12 شارۋاشىلىقتىڭ بەرەشەگىن ءوندىرىپ الۋ شارالارى قولعا الىنادى. وسىلايشا، 2020-2021 جىلدارى 5 كەپىل بەرۋشى شارۋاشىلىقتىڭ جەر ۋچاسكەلەرى ەلەكتروندىق ساۋدا-ساتتىق وتكىزۋ ارقىلى 2،9 ملرد. تەڭگەگە ساتىلادى. ياعني، 12 شارۋاشىلىقتىڭ 5 جەر تەلىمىن ساتۋ ارقىلى حولدينگتىڭ "حالىق بانك" اق الدىنداعى قارىزىنىڭ ۇشتەن ەكىسى وتەلەدى.  ال قالعان جەردى ودان ءارى ساتۋ قارىزدى مەرزىمىنەن بۇرىن وتەۋگە جانە جەردىڭ ءبىر بولىگىن كەپىل بەرۋشىلەرگە قايتارۋعا الىپ كەلەتىن ەدى. الايدا قۇنى قارىز سوماسىنان اساتىن كەپىل زاتتىڭ ءبىر بولىگىن پايشىلارعا قايتارۋدىڭ ورنىنا، قارىز قالدىعىنان ارتىلعان جەر تەلىمىن نارىقتىق قۇنىنان تومەن باعادا كوللەكتورعا بەرىپ جىبەرەدى.

وسىلايشا، اتالعان بانكتىڭ كەسىرىنەن سولتۇستىك قازاقستان وبلىسى ايىرتاۋ اۋدانىنداعى "نوۆوسۆەتلوۆكا-اليبي" ءجشس-نىڭ 357 پايشىسى جاپا شەگىپ، 18 مىڭ گەكتار جەرىنەن ايرىلعالى وتىر. ولار ءۇشىن نەگىزگى كۇنكورىسى جەرىنەن ايرىلۋ – ۇلكەن تراگەديا!" - دەدى دەپۋتات باپي.

ەرمۇرات باپي پايشىلار وزدەرىنىڭ اكتيۆتەرىن قايتارۋ ءۇشىن بانك الدىنداعى قارىزدى وتەۋگە دە دايىن ەكەنىن، سوندىقتان وسى ماسەلەنى ارنايى كەلىسىم كوميسسياسىن قۇرىپ، پايشىلارمەن بىرىگە وتىرىپ بارىنشا تەز ءارى ءادىل شەشۋ قاجەت ەكەنىن مالىمدەدى.