ۇلەسكەرلەردىڭ ءۇشىن تۇرعىن ءۇي ماسەلەسىن شەشۋ - الماتى وبلىسى باسشىلىعىنىڭ ۇنەمى باقىلاۋىندا تۇرعان ماسەلە بولاتىن. ۇلەسكەرلەردىڭ قاتىسۋىمەن قۇرىلىس جۇرگىزۋ جۇمىستارىنا جاۋاپتى الماتى وبلىسى اكىمدىگىنىڭ ۋاكىلەتتى ورگانى بولىپ تابىلاتىن «جەتىسۋ جاڭا قۇرىلىس» ءجشس-نىڭ ديرەكتورى نۇگىربەك ءابۋلعازيننىڭ مالىمدەۋىنشە، بۇگىنگى كۇنى الماتى وبلىسىندا ۇلەسكەرلىك قۇرىلىس ماسەلەسى تولىقتاي شەشىلدى.

وزدەرىڭىزگە بەلگىلى، 2008-2009 جىلدار ارالىعىندا الماتى وبلىسىندا 4129 ۇلەسكەرى بار 21 پروبلەمالىق نىسان بولاتىن. 2009 جىلى مەملەكەتتىك قارجىلاندىرۋدىڭ كومەگىنسىز 12 نىسان بويىنشا 1553 ۇلەسكەردىڭ ماسەلەسى شەشىلگەن بولاتىن.

«سونىمەن قاتار، مەملەكەتتىك قارجىلىق قولداۋدىڭ ارقاسىندا تاعى 34 كەشەننىڭ قۇرىلىسى اياقتالىپ، ناتيجەسىندە تاعى 9 نىسان بويىنشا 2576 ۇلەسكەردىڭ ماسەلەسى شەشىمىن تاپتى. بۇل ماقساتقا بيۋدجەتتەن 34،588 ملرد. تەڭگە بولىنگەن بولاتىن، ونىڭ 34،009 ملرد. تەڭگەسى رەسپۋبليكالىق بيۋدجەتتەن بولىنگەن بولسا، 0،579 ملرد. تەڭگە جەرگىلىكتى بيۋدجەتتەن قاراستىرىلدى. وسىنىڭ ارقاسىندا بارلىق قاجەتتى ينجەنەرلىك جۇيەلەرى تارتىلعان 355 مىڭ شارشى مەتر جاڭا تۇرعىن ءۇي بوي كوتەردى»، - دەپ حابارلايدى نۇگىربەك ابۋلعازين.

ن. ءابۋلعازيننىڭ حابارلاۋىنشا، ۇلەسكەرلەردىڭ ماسەلەسى بويىنشا سوڭعى نىسان سانالاتىن «ءومىرۇزاق» تۇرعىن ءۇي كەشەنى بويىنشا سوڭعى قۇرىلىس جۇمىستارى اعىمداعى جىلدىڭ تامىز ايىندا اياقتالعان. جالپى اۋماعى 20،922 مىڭ شارشى مەتر بولاتىن 114 پاتەردەن تۇراتىن 51 جەكە تۇرعىن ءۇي تۇرعىزىلدى.  ناتيجەسىندە 105 ۇلەسكەردىڭ ماسەلەسى وڭدى شەشىمىن تاپتى.

وسىلايشا، بۇگىنگى كۇنى الماتى وبلىسىندا ۇلەسكەرلىك قۇرىلىستىڭ پروبلەمالىق ماسەلەلەرى تولىقتاي شەشىلدى.

 

دەرەككوزى: zhetysu.gov.kz