ناۋرىزدان بەرى قازاقستاندىقتار اراسىندا ءبىرىڭعاي ۋاقىت بەلدەۋىنە قاتىستى ءتۇرلى پىكىر ايتىلىپ ءجۇر. كەيبىر ءوڭىر تۇرعىندارى بۇل ءتاسىل جۇمىس ىستەۋگە، وقۋعا ءتيىمسىز ەكەنىن دە ايتتى. بۇگىن ۇكىمەت ءبىرىڭعاي ۋاقىت بەلدەۋىنە قاتىستى مالىمدەمە جاسادى، - دەپ حابارلايدى Dalanews.kz.
پرەمەر-مينيستر ولجاس بەكتەنوۆتىڭ قاتىسۋىمەن وتكەن ۇكىمەت وتىرىسىندا ساۋدا جانە ينتەگراسيا ءمينيسترى ارمان شاققالييەۆ قازاقستاننىڭ 5ء-شى ۋاقىت بەلدەۋىنە كوشۋىنىڭ ارتىقشىلىقتارىن ايتتى. ول UTC+5 ۋاقىت بەلدەۋى ەل حالقىنىڭ 76 پايىزدان استامى (15 ميلليون 240 مىڭ ادام) كىرەتىن استانا، الماتى، پەتروپاۆل، وسكەمەن، شىمكەنت، سەمەي جانە پاۆلودار قالالارىن قوسقاندا، 67،5-تەن 82،5 گرادۋسقا دەيىنگى بويلىقتى قامتيتىنىن ايتتى.
"ەل اۋماعىنىڭ باسىم بولىگى 5ء-شى ۋاقىت بەلدەۋىندە ورنالاسقان. بۇرىنعى UTC+6 ۋاقىت بەلدەۋى العاش رەت 1930-1931 جىلدارى "بەلدەۋ ۋاقىتى + ءبىر ساعات" فورمۋلاسى بويىنشا دەكرەتتىك ۋاقىتتى قولدانۋ ارقىلى ەنگىزىلدى. UTC+5 - ەلىمىز ءۇشىن جاڭا ۋاقىت بەلدەۋى ەمەس، كەرىسىنشە تاريحي نەگىزدەلگەن ۋاقىتقا ورالۋ"، - دەدى مينيستر ۇكىمەت وتىرىسى كەزىندە.
ءمينيستردىڭ ايتۋىنشا، 195 ەلدىڭ 117ء-سى گەوگرافيالىق ۋاقىتتى ستاندارت ۋاقىت بەلدەۋىنە جاقىن تاڭداعان.
شاققالييەۆ حالىقارالىق تابيعي ۋاقىت اليانسى (IANT) ۇكىمەتتىڭ ورتالىق جانە شىعىس وبلىستار ءۇشىن گەوگرافيالىق بويلىققا سايكەس كەلەتىن جانە حالىق ءۇشىن وڭتايلى شەشىم سانالاتىن UTC+5 ۋاقىت بەلدەۋىن بەلگىلەۋ تۋرالى شەشىمىنە وڭ قورىتىندى بەرگەنىن ايتتى.
"الەمنىڭ كوپتەگەن ەلى تابيعي سيكلگە مۇمكىندىگىنشە جاقىن ۋاقىت بەلدەۋىن تاڭدادى. سوندىقتان تابيعي كۇن سيكلىنە سايكەس كەلەتىن UTC+5 ۋاقىت بەلدەۋىنە اۋىسۋ جاڭالىق ەمەس، تابيعي ۋاقىتقا ورالۋدى بىلدىرەدى. ۋاقىت بەلدەۋلەرىن وزگەرتۋ تۋرالى قابىلدانعان شەشىم عىلىمي نەگىزدەلگەن، ەكونوميكالىق تۇرعىدان ورىندى جانە ەلدىڭ ءتيىمدى جۇمىس ىستەۋ مۇددەسىنە سايكەس كەلەدى. پەتيسيانى قاراۋ ناتيجەسىندە ستاندارتتى ۋاقىت بەلدەۋىنە بارىنشا بەيىمدەلۋگە باعىتتالعان ناقتى ۇسىنىستار بەرىلدى"، - دەدى مينيستر.
پرەمەر-مينيستر ولجاس بەكتەنوۆ نەعۇرلىم تۇسىنىكتى ءاقپاراتتىق-تۇسىندىرۋ ناۋقانىن جۇرگىزۋدى تاپسىردى.
"ساۋدا ءمينيسترى قولدانىستاعى ۋاقىت بەلدەۋىنە قاتىستى جان-جاقتى دالەلدەر كەلتىرە وتىرىپ، ناقتى جاۋاپ بەردى. ۇكىمەت بۇل شەشىمدى قولدايدى. ءبىز ءبىرىڭعاي ۋاقىت بەلدەۋىنە بەكەردەن بەكەر اۋىسقان جوقپىز. ەل اۋماعىنىڭ كوپ بولىگى بەسىنشى ۋاقىت بەلدەۋىندە ورنالاسقان. سوندىقتان بۇل عىلىمي تۇرعىدان دۇرىس شەشىم"، - دەدى بەكتەنوۆ.
ايتا كەتەيىك، بۇعان دەيىن سەنات كۋلۋارىندا عىلىم جانە جوعارى ءبىلىم ءمينيسترى ساياسات نۇربەك ءبىرىڭعاي ۋاقىت بەلدەۋىنىڭ قازاقستاندىقتارعا قالاي اسەر ەتىپ جاتقانىنا قاتىستى عىلىم زەرتتەۋ جۇرگىزىلەتىنىن مالىمدەدى.
ال وسكەمەندىك سەرىكجان احمەتجانوۆ ۇكىمەتكە قارسى شاعىم ءتۇسىردى. ول ۋاقىتتى وزگەرتۋ تۋرالى شەشىمدى زاڭسىز دەپ تانىپ، كۇشىن جويۋدى تالاپ ەتتى.
ول تۋعانىنان بەرى وسكەمەندە تۇراتىنىن ايتادى. احمەتجانوۆتىڭ سوزىنشە، سوتقا شاعىمدانۋىنىڭ باستى سەبەبى - بالالارىنىڭ ساباقتان ۇيگە قاراڭعىدا، كۇن باتقاندا ورالۋى.
"بالالارىم ەكىنشى اۋىسىمدا وقيدى. مەكتەپكە 13:00-14:00-دە بارادى، ال ساباعى ساعات 19:30-دا اياقتالادى. جينالىپ شىعامىن دەگەنشە ساعات 20:00 بولادى. ال وسكەمەندە ناقتى ۋاقىتتان ەكى ساعاتقا ارتىق. ياعني ساعات 20:00 بولعاندا، دەمەك ساعات 22:00. تۇندە ۇيگە كەلگەن سوڭ، كەشكى اس ءىشىپ، ءۇي تاپسىرماسىن ورىنداۋى كەرەك"، - دەدى ول.
