رەسەيلىك youtube-بلوگەر Anton S رەسەيلىك ۆيدەوبلوگەر جانە ءانشى ۆاليا كارناۆالدىڭ قازاقستاندا كليپ ءتۇسىرۋى بارىسىندا ءوزىن ۇستاۋىنا قاتىستى وقيعانى بايانداپ بەردى، دەپ حابارلايدى Dalanews.kz.

بلوگەردىڭ ايتۋىنشا، ۆاليا كارناۆال كليپ ءتۇسىرۋ ءۇشىن قازاقستانعا كەلگەن، الايدا ءتۇسىرىلىم الاڭىندا بىردە ءبىر قازاق بولماسىن دەگەن تالاپ قويعان. 

«قازاقستانعا كەلىپ، الاڭنان بارلىق جەرگىلىكتى تۇرعىنداردى الىپ تاستاۋدى سۇراۋ — بۇل مۇلدەم ورىنسىز ارەكەت. ناعىز كرينج»، – دەيدى Anton S.

ونىڭ ايتۋىنشا، ءتۇسىرىلىم قالا ماڭىنداعى دالا مەن كانونداردا، شامامەن ءتورت ساعاتتىق جەردە وتكەن. بارلىق دايىندىق – كيىم، ماكياج، اكسەسسۋارلار – الدىن الا كەلىسىلگەن.

الايدا ءتۇسىرىلىم كەزىندە توپ مۇشەلەرىنىڭ ءبىرى قازاقشا سويلەي باستاعاندا، ۆاليا كارناۆال كەنەتتەن اشۋعا بۋلىعىپ، ءتۇسىرىلىمدى توقتاتىپ، الگى ادامدى الاڭنان قۋىپ جىبەرىپتى-مىس.

بلوگەردىڭ ايتۋىنشا، كەيىن كارناۆال ءوزىنىڭ مامانىن الدىرتىپ، ول 5-6 ساعات جول ءجۇرىپ كەلگەن. ونىڭ مىندەتى — مودەلگە اق جەيدە مەن دجينسى كيگىزۋ عانا بولعان.

«ول ستيليستتەرگە دورەكى سويلەپ، “كولحوز” دەپ اتاعان. ءبىر قىز نەگە مەنى تاڭدادىڭىز دەپ سۇراعاندا، ۆاليا “مەن ونى كورەي قىزى ەكەن دەپ ويلادىم” دەپ جاۋاپ بەرىپتى. بۇل – ناعىز ۇيات جاعداي»، – دەيدى Anton S.

بۇگىن رەسەيلىك بلوگەردىڭ ءوزى تەلەگرام ارناسىندا بۇل جايتقا قاتىستى پىكىر ءبىلدىرىپ، Anton S مالىمدەگەن نارسەلەردىڭ ءبارى جالعان اقپارات ەكەنىن جەتكىزدى. 

"ءبىر جىل بۇرىن مەن قازاقستاندىق كوماندامەن دورەكى سويلەسىپپىن. مۇنىڭ ءبارى جالعان، عايبات جانە ارانداتۋ ءۇشىن ىستەلىپ وتىرعان دۇنيە. ونىڭ ۇستىنە مەن قازاقستاندىق كوماندانىڭ جۇمىسىنا تەك ءتانتى بولدىم. كەرەمەت كليپ شىقتى. ماعان قاتىستى وسىنداي جالعان اقپارات تاراعانى قىنجىلتادى. مەنى قارالاۋعا باعىتتالعان وسەك-اياڭعا سەنبەۋلەرىڭىزدى سۇرايمىن"، دەيدى ۆاليا.