الماتى وبلىسىنىڭ ءۇشارال قالاسىنداعى اۋەجايدىڭ ۇشۋ-قونۋ جولاعىن قايتا جاڭعىرتۋ مەن اقشي اۋىلىندا تازارتقىش قۇرىلىسى بار كارىز جۇيەسىن سالۋ جوبالارى ۇكىمەت تاراپىنان قولداۋ تاپتى.

جالپى تۋريستەر لەگى 2025 جىلعا قاراي 3،5 ملن. ادامعا جەتەدى، بۇل ءوز كەزەگىندە بيۋدجەتتىڭ كىرىس بولىگىن ارتتىرۋعا ىقپال ەتەتىن بولادى.

بۇل جايىندا ءوڭىر تۇرعىندارى الدىندا ەسەپ بەرگەن الماتى وبلىسىنىڭ اكىمى اماندىق باتالوۆ ايتتى، - دەپ حابارلايدى الماتى وبلىسى اكىمىنىڭ باسپا ءسوز قىزمەتى.

بەلگىلى بولعانداي، وڭىردە الاكول كولى جاعالاۋىنىڭ ينفراقۇرىلىمىن دامىتۋعا كوپ كوڭىل بولىنگەن. ءۇشارال اۋەجايى سالىندى. تەمىر جول قاتىناسى جولعا قويىلىپ، وعان ارنايى ۆوكزال سالىندى. اقشي اۋىلىنا دەيىنگى 23 شاقىرىمدىق جول قايتا جاڭعىرتىلدى.

سونىڭ ارقاسىندا الاكولدە ماۋسىم سايىن دەمالاتىندار قاتارى 1،3 ملن. ادامنان استى.

سول سياقتى ءتۋريزمنىڭ تاعى ءبىر باسىمدىق بەرەتىن باعىتى – الماتى تاۋ كلاستەرى. سونىڭ اياسىندا تالعار جانە ەڭبەكشىقازاق اۋداندارىندا زاماناۋي تاۋ-شاڭعى كۋرورتتارى سالىنادى.