تۇركيادان بوتەننىڭ مۇلكى اسا ءىرى مولشەردە يەمدەنگەنى ءۇشىن كۇدىكتى ەكستراديسيالاندى، - دەپ حابارلايدى Dalanews.kz.
باس پروكۋراتۋرا جانە ىشكى ىستەر مينيسترلىگىنىڭ ينتەرپول قىزمەتكەرلەرىمەن، قازاقستاننىڭ تۇركياداعى ەلشىلىگىنىڭ قولداۋىمەن قىلمىستىق جاۋاپكەرشىلىككە تارتۋ ماقساتىندا تۇركيا رەسپۋبليكاسىنان قازاقستان ازاماتى ەكستراديسيالاندى.
"كۇدىكتى 2022-2023 جىلدار ارالىعىندا الماتى قالاسىنداعى كوممەرسيالىق ۇيىمنىڭ بۋحگالتەرى بولا وتىرىپ، تولەم تاپسىرمالارىنا جالعان مالىمەتتەر ەنگىزۋ ارقىلى وزىنە سەنىپ تاپسىرىلعان 27 ميلليون تەڭگەگە جۋىق قاراجاتتى زاڭسىز يەمدەنگەن"، - دەپ جازىلعان باس پروكۋراتۋرا حابارلاماسىندا.
قىلمىس جاساعاننان كەيىن كۇدىكتى جاسىرىنعان، وسىعان بايلانىستى وعان حالىقارالىق ىزدەۋ جاريالاندى. بيىل تامىزدا ول تۇركيا اۋماعىندا ۇستالىپ، سودان كەيىن قازاقستان باس پروكۋراتۋراسىنىڭ سۇراۋى بويىنشا قازاقستاندىق قۇقىق قورعاۋ ورگاندارىنا بەرىلدى.
قازىرگى ۋاقىتتا اتالعان ادام استانا قالاسىنىڭ تەرگەۋ يزولياتورىنا قامالعان.
ايتا كەتەيىك، بۇل قىلمىستى جاساعانى ءۇشىن مۇلكى تاركىلەنىپ،جەتى جىلدان ون ەكى جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعان.
