"تۇركيا، يران جانە يراكتا ايماقتاعى وزدەرىنىڭ ستراتەگيالىق ماقساتتارىن قورعاۋدىڭ ماڭىزدى جانە قاجەتتى شارالارىن جاساۋدان باسقا تاڭداۋى جوق" دەپ مالىمدەدى حاسسان روۋحاني 4 قازاندا تەگەراندا رەجەپ ەردوعانمەن وتكىزگەن باسپا ءسوز ءماسليحاتىندا. ءبىراق ول ناقتى قانداي شارالار قابىلداناتىنىن ايتپادى.
يراكتىڭ كۇردىستان اۆتونومياسىندا 25 قىركۇيەكتە تاۋەلسىزدىك الۋ جونىندە رەفەرەندۋم وتكەن. اۆتونوميا بيلىگى داۋىس بەرۋگە قاتىسقانداردىڭ 92 پايىزدان استامى "تاۋەلسىزدىكتى قولداعانى" تۋرالى حابارلاعان.
باعدادتاعى ورتالىق بيلىك، اقش، باتىس ەلدەرى مەن بۇۇ رەفەرەندۋمدى قولداعان جوق. كۇرد دياسپوراسى تۇراتىن تۇركيا مەن يران دا داۋىس بەرۋگە اشىق قارسى بولدى. ءبىراق كۇرد جەتەكشىلەرى رەفەرەندۋمدى دەربەس مەملەكەت قۇرۋ كەلىسسوزىن باستاۋعا ماجبۇرلەۋ ءۇشىن پايدالاناتىندارىن مالىمدەدى.
ەردوعان رەفەرەندۋمدى "زاڭسىز" دەپ اتاپ، "وسى كەزدەن باستاپ باتىل شارالار جاسايتىنىن" ايتتى.
باعداد كۇردىستان باسشىلىعىنا سانكسيا سالاتىنىن، حالىقارالىق دەڭگەيدە وقشاۋلايتىنىن جانە قاجەت بولسا اسكەر كىرگىزەتىنىن ەسكەرتىپ، رەفەرەندۋم ناتيجەسىن جويۋدى تالاپ ەتتى. يراك اسكەريلەرى تاياۋدا تۇركيا جانە يران قارۋلى كۇشتەرىمەن بىرىگىپ اسكەري جاتتىعۋ وتكىزدى.
