تۇركىستان قالاسىن الەمدىك دەڭگەيدەگى تاريحي-مادەني ورتالىق رەتىندە دامىتۋ ءۇشىن ازىرلەنگەن  «كونە تۇركىستان» كونسەپسياسى 3 كەزەڭدە جۇزەگە اسىرىلاتىن بولادى. 

كونە شاھاردىڭ 99،6 گەكتار جەر اۋماعىن قامتيتىن كونسەپسيانىڭ باستى باعىتتارىنىڭ ءبىرى – تۋريستىك يندۋستريانى دامىتۋ بولىپ بەلگىلەنىپ وتىر.  بۇگىن بۇل تۋرالى ايماقتىق كوممۋنيكاسيالار ورتالىعىندا وتكەن بريفينگتە تۇركىستان قالاسىنىڭ اكىمى الىپبەك وسىربايەۆ ءمالىم ەتتى.

قالا باسشىسىنىڭ ايتۋىنشا،  تۇركىستانعا بيىلعى جىلدىڭ 6 ايىندا 678 683 تۋريست كەلىپ، بۇل كورسەتكىش وتكەن جىلمەن سالىستىرعاندا  92 مىڭ 291 ادامعا ارتقان.  تۋريستەردەن تۇسكەن  تابىس 1 ملرد. 496،5 ملن. تەڭگەنى قۇراپتى.

«ءقازىر «كونە تۇركىستان» كونسەپسياسىنىڭ العاشقى كەزەڭىن ىسكە اسىرۋ ماقساتىندا قوجا احمەت ياساۋي كەسەنەسىنىڭ قارسى بەتىندە ورنالاسقان 12،8 گەكتار جەر اۋماعىندا بۇزىلۋعا جاتاتىن 129 تۇرعىن ءۇيدى مەملەكەتتىك قاجەتتىلىككە ساتىپ الۋ ءۇشىن باعالاۋ جۇمىستارى جۇرگىزىلىپ جاتىر. ساتىپ الۋ شارالارى  زاڭ تالاپتارىنا ساي ىسكە اسىرىلاتىن بولادى. بۇل جوبانىڭ جالپى قۇنى شامامەن - 7 850،6 ملن. تەڭگەنى قۇرايدى. ونىڭ ىشىندە – 1 290 ملن. تەڭگە 129 ءۇيدى ساتىپ الۋعا، 800،0 ملن. تەڭگە ينفراقۇرىلىمعا قارالعان»، - دەدى الىپبەك شارىپبەك ۇلى.

سونداي-اق قالانىڭ وڭتۇستىك شىعىس بەتىندەگى 45،0 گەكتار جەر اۋماعىنا ەتنوساياباق سالۋ جوسپارلانۋدا. ەتنوساياباقتا ۇلتتىق ناقىشتاعى ويىن-ساۋىق ورىندارى، ۇلتتىق تاعامدار مەن سۋسىندار ۇسىناتىن نىساندار، اشىق اسپان استىنداعى دەمالىس ورىندارى مەن كيىز ۇيلەر ورنالاساتىن بولادى. وسى ەتنوساياباقتا تۋريستەرگە ورتا عاسىرلىق كوشەلەردىڭ كورىنىستەرىمەن سول كەزدىڭ مادەنيەتىن تاماشالاي الاتىنداي مۇمكىندىكتەر جاسالادى. سونىمەن قاتار، وبلىسىمىزداعى تاريحي-مادەني ەسكەرتكىشتەر جونىندە ماعلۇمات بەرەتىن اشىق اسپان استىنداعى ماكەتتەر ورنالاستىرىلادى. ساياباقتا ەسكى تاريحي كولشىك قايتا قالپىنا كەلتىرىلەدى.

ال، ءۇشىنشى كەزەڭدە ورتالىق ەسىمحان الاڭىمەن ءامىر تەمىر كوشەسى ارالىعىندا س.قوجانوۆ، بايبۇرت كوشەسى، جاياۋ جۇرگىنشىلەر ارباتتى قايتا جاراقتاندىرىپ، جاڭالاۋ جوسپاردا بار. 

 بۇدان بولەك، قالاداعى تابيعي قوردى پايدالانىپ ەمدىك-ساۋىقتىرۋ ءتۋريزمىن دامىتۋ كوزدەلۋدە.  ويتكەنى تۇركىستان قالاسى اۋماعىندا جەر استى تەرمالدى سۋ جۇيەلەرىنىڭ مول قورى بار.  وسى سۋ كوزدەرىنىڭ قاتارىندا قۇرامى «ترۋسكوۆەس» (ۋكراينا)، «ۆيتاۋتاس» (ليتۆا) جانە نوۆو-يجيەۆسكايا (ۋدمۋرتيا) ەمدىك  جەر استى سۋلارىنا تەڭدەس «شيپا-سۋ» شيپاجايى ورنالاسقان.  بۇگىنگى تاڭدا شيپاجاي باسشىسىمەن كەلىسىپ، مەكەمەنىڭ جۇمىسىن جانداندىرۋ ءۇشىن ءتيىستى شارالار جۇرگىزىلۋدە.