«ەل پرەزيدەنتى قاسىم-جومارت توقايەۆتىڭ بيىل 9 ماۋسىمدا كەزەكتەن تىس پرەزيدەنت سايلاۋىن وتكىزۋگە بايلانىستى جاريالاعان ۇندەۋىنە قولداۋ بىلدىرەمىن. قازاقستاندى الدا ۇلكەن ىستەر كۇتىپ تۇر. دامىعان 30 ەلدىڭ قاتارىنا قوسىلۋ ءۇشىن ايانباي ەڭبەك ەتۋ كەرەك. وسى ماقساتتاردى ىسكە اسىرۋ ءۇشىن الدىمەن مەملەكەت باسشىسىن سايلاپ، الداعى بەس جىلدا ەلىمىزدىڭ ساياسي-ەكونوميكالىق باعىتىن كىم جۇرگىزەتىنىن ايقىنداپ الۋىمىز كەرەك بولىپ تۇر. ويتكەنى قازاقستانعا بۇگىنگى تاڭدا ەڭ باستى كەرەگى ساياسي-ەكونوميكالىق تۇراقتىلىق پەن قوعامدىق كەلىسىم جانە بەيبىتشىلىك بولىپ وتىر.
بيلىكتىڭ اۋىسۋى كونستيتۋسياعا ساي جۇزەگە اسىرىلدى. ەندى اتا زاڭ بويىنشا جاڭا پرەزيدەنت سايلانادى. بۇل رەتتە تاڭداۋدى جاسايتىن – حالىق. سوندىقتان مۇنداي اۋقىمدى دا ماڭىزدى ساياسي شاراعا ەل تۇرعىندارى نەمقۇرايلى قاراماۋى ءتيىس. ءوزىنىڭ ازاماتتىق كوزقاراسىن ءبىلدىرىپ، سايلاۋعا قاتىسۋى شارت دەپ بىلەمىن.
پرەزيدەنت قاسىم-جومارت توقايەۆ ۇندەۋىندە قازاقستاندى دەموكراتيالى مەملەكەت، سايلاۋدىڭ ءادىل وتەتىنىنە كەپىلدىك بەرەتىنىن، كەزەكتەن تىس سايلاۋ وتكىزۋگە ەلباسى دا، پرەمەر-مينيستر دە، پارلامەنت تە، كونستيتۋسيالىق كەڭەس تە، ساياسي پارتيا جەتەكشىلەرى دە قارسى ەمەستەرىن اتاپ ءوتتى. سونداي-اق پرەزيدەنت ەلمەن كەزدەسكەندە قاراپايىم حالىق، زيالى قاۋىم، بيزنەس وكىلدەرى جانە ينۆەستورلار دۇرىس جولمەن كەلە جاتقانىمىزدى ايتقاندارىن جەتكىزدى. سوندىقتان ەلىمىزدىڭ ءاربىر سانالى ازاماتىن الداعى سايلاۋعا جاۋاپكەرشىلىكپەن قاراۋعا شاقىرامىن. ويتكەنى ەل بولاشاعى ءسىز بەن ءبىزدىڭ تاڭداۋىمىزعا بايلانىستى»، – دەيدى وبلىستىق «ازاماتتىق اليانس» ءتوراعاسى، وبلىستىق ءماسليحات دەپۋتاتى شارىپبەك جامالبەكوۆ.
ال، قازاقستاننىڭ ەڭبەك سىڭىرگەن قايراتكەرى، جازۋشى مارحابات بايعۇت سايلاۋدان ەل ۇلكەن ءۇمىت كۇتەتىنىن ايتادى.
– بيىل ەلىمىزدىڭ ساياسي ءومىرى وزگەرىستەرگە جىل بولدى. ونىڭ ىشىندە ەلباسىنىڭ وكىلەتتىگىن توقتاتۋ تۋرالى شەشىمىن كوپشىلىك ءادىل دەپ باعالادى. نەگە دەسەڭىز، ىشكى ساياسي تۇراقتىلىقتى ساقتاپ، باعىتىمىزدى ايقىنداۋدا بۇل وزگەرىستىڭ ورنى ەرەك. مىنەكەي، پرەزيدەنت سايلاۋىن كەزەكتى رەت وتكىزۋ مالىمدەمەسى دە جاريالاندى. ءبىز بولاشاعىمىزدى ايقىنداردا وتكەنىمىزگە قاراۋدى ۇمىتپاعان ەلمىز. تاۋەلسىزدىك بىزگە قانداي جەڭىسىمەن كەلدى؟ الەم الدىنداعى اسقاق بەدەلىمىز بەن ەڭسەلى ەكونوميكامىزدى ايتپاعاننىڭ وزىندە قازاق رۋحانياتى ءۇشىن ەلەۋلى وقيعالارعا تولى بولدى. ونىڭ ىشىندە، كۇللى ادامزات، بۇكىل دۇنيە ءجۇزىنىڭ وركەنيەتتى قاۋىمى، بارشا ەل نازار اۋدارارلىقتاي الەمدىك دەڭگەيدەگى، پاراساتتىڭ شىرقاۋ بيىگىندەگى پايىمدار ورتاعا سالىندى. ناقتى عىلىمي دەرەكتەرگە سۇيەنىپ، جاھاندىق تاريحتاعى ۇلى دالا ەلىنىڭ، قازاق ۇلتىنىڭ، قازاقستان رەسپۋبليكاسىنىڭ ورنى مەن ءرولى جان-جاقتى ايقىندالدى. بۇكىل بايتاعىمىزدىڭ رۋحاني جاڭعىرۋ بارىسىندا الداعى ۋاقىتتا نەلەردى جانە قالاي جۇزەگە اسىرۋ كەرەكتىگىنىڭ تاعلىمدى تۇجىرىمداماسى جاسالدى. تۇركىستان قالاسىن وبلىس ورتالىعىنا اينالدىرۋ ارقىلى كۇللى تۇركى جۇرتىنىڭ تۋىن تورىمىزگە تىكتى. ونىڭ بولاشاعى، ءال-فارابي مەن احمەت ياساۋي بابالارىمىز، باتىرلار جىرى، قىزعالداق پەن سيۆەرس الماسىنا دەيىن ايرىقشا ءمان بەرىلۋى قالامگەرلەرگە قانات بىتىرەدى.
وسىنداي جارقىن كەزەڭدەردى باستان كەشىرىپ وتىرعان ەلىمىز الداعى سايلاۋدان مول ءۇمىت، كەلىستى كەلەشەك كۇتەدى. ول ءۇشىن اۋىزبىرلىك قاعيداسى اۋاداي قاجەت. كەمەڭگەر ەلىمىز ءوز پرەزيدەنتىن سايلاۋدا بۇل جولى دا قاتەلەسپەيدى دەپ ويلايمىز، – دەيدى جازۋشى.
تۇركىستان وبلىسى اكىمىنىڭ باسپا ءسوز قىزمەتى
