بۇگىندە حالىقتى قان قاقساتىپ جۇرگەن ينتەرنەت الاياقتاردىڭ سانى كۇن ساناپ ارتىپ بارادى. ولاردىڭ تورىنا سان سوعىپ، الدانعانداردىڭ سانى ەسەپسىز.
بانك سالاسى ماماندارىنىڭ مالىمەتىنە سۇيەنسەك، ەلىمىزدە 10 مىڭنان استام ينتەرنەت الاياقتىق تىركەلگەن. الاياقتار 18،2 ملرد تەڭگەنى قالتالارىنا باسقان. تىپتەن الاياقتاردى قۇرىقتاپ، تەمىر تورعا توعىتسا دا توقتاماي بولماي تۇر. شىندىعى سول، اقپاراتتىق تەحنولوگيانىڭ وزىق مۇمكىندىكتەرىن پايدالاناتىن ولاردى ۇستاۋدىڭ ءوزى وڭايعا تۇسپەي تۇرعانى دا جاسىرىن ەمەس.
ەلىمىزدە حالىقتى جاپپاي قارجىلىق ساۋاتتىلىققا ۇيرەتۋ قولعا الىنىپ جاتىر. بۇل، ارينە، بولاشاققا جاسالعان مىقتى قادام. بۇل ماڭىزدى قادامنىڭ العا ىلگەرىلەۋى ءۇشىن ەڭ الدىمەن ب ا ق وكىلدەرىنىڭ اتقارار قىزمەتى مەن مىندەتى جوعارى بولماق.
ءقازىر اقپارات اعىمىنا ىلەسۋ، ساۋاتتى كەيس جاساۋ ءار ءجۋرناليستىڭ مەڭگەرۋ كەرەك فۋنكسياسى. سەبەبى بۇگىندە قاراپايىم جازۋ ارقىلى وقىرمانعا اقپاراتتى جەتكىزە المايسىڭ. وعان ماشىق قاجەت. ۇزدىكسىز دامۋ، سول دامۋ پروسەسسىندەگى جاڭا دۇنيەنى مەديادا ساۋاتتى پايدالانا الۋ وتە ماڭىزدى.وسى ورايدا Halyk Bank جانە تۇركىتىلدەس جۋرناليستەر قورى بىرلەسىپ ۇيىمداستىرعان «قارجىلىق ساۋاتتىلىق:ىسكەرلىك جۋرناليستيكا» تاقىرىبىنداعى كەزەكتى سەمينار-ترەنينگى تۇركىستان وبلىسىندا ءوتتى.
سەمينار بارىسىندا Halyk Bank وكىلدەرى ينتەرنەت الاياقتىقتان قورعانۋ جولدارىن ءتۇسىندىرىپ، قولدانۋ جولدارىن كورسەتتى.
Halyk Bank تۇركىستان فيليالىنىڭ ديرەكتورى ارتۋر تاسقارين مەن ونىڭ كومانداسى بانك اكسيالارى، الەۋمەتتىك باعىتتاعى جوبالارى، ينتەرنەت الاياقتىق تۇرلەرى مەن ونىڭ جولدارى، حالىقتىڭ قارجىلىق ساۋاتىن ارتتىرۋ جايلى كەڭىنەن اڭگىمەلەپ، ب ا ق وكىلدەرىنىڭ سۇراقتارىنا جاۋاپ بەردى.
ارتۋر تاسقارين ب ا ق وكىلدەرىنەن مىنا تومەندەگى ەسكەرتۋگە اسا ءمان بەرۋ كەرەكتىگىن جانە حالىققا جەتكىزۋىن سۇرادى. ونىڭ ايتۋىنشا، ونلاين ساۋدا جاسايتىن كەزدە كۇماندى ترانزاكسيالاردان باس تارتىڭىز! بانك كارتاسىنىڭ دەرەكتەرىن، شوت نومەرىن جانە قاۋىپسىزدىك كودىن بوتەن ادامعا بەرمەڭىز! بانكتەردىڭ كۇماندى سىلتەمەلەرىن اشپاڭىز! كۇمان تۋعىزعان سىلتەمە بويىنشا كىرىپ، ول جەرگە جەكە مالىمەتتەرىڭىزدى ەنگىزبەڭىز! تانىمايتىن ادامعا اقشا اۋدارماڭىز!
سونىمەن قاتار، سوڭعى كەزدەرى قازاقستاندىقتارعا وزدەرىن بانك قىزمەتكەرىمىز دەپ تانىستىراتىن الاياقتار تەلەفون سوعۋدى ۇدەتە تۇسكەن. ولار ءسىزدىڭ دەپوزيتىڭىزگە ءقاۋىپ تونگەنىن حابارلايدى، اقشانى جەدەل شەشىپ الۋدى نەمەسە دەپوزيتتى «ءقاۋىپسىز شوتقا» اۋدارۋدى ۇسىنادى. بۇل ايلاعا بەرىلمەي، كەرىسىنشە بانككە جەدەل تۇردە قوڭىراۋ شالىڭىز!
قارجىلىق ساۋاتتىلىقتىڭ ماڭىزى، الاياقتاردىڭ سان ءتۇرلى ايلاسى، سونداي-اق ودان ساقتانۋ جولدارىن ۇيرەتىپ ءوتتى.
قور پرەزيدەنتى ءنازيا جويامەرگەن قىزى دا قارجىلىق ساۋاتتىلىق جايلى پىكىرلەرىمەن ءبولىستى.
سەمينار بارىسىندا جۋرناليستەر مەديا ترەنەر ەرسۇلتان حوجالەپەستىڭ «يۋتۋبتاعى رەيتينگ پەن مونەتيزاسيا» تۋرالى تاقىرىپتارىمەن دە تانىسىپ، تاجىريبەلىك جۇمىستارىمەن اينالىستى. ءاربىر مينۋتتى بارىنشا ءتيىمدى پايدالانۋعا ۇمتىلعان قاتىسۋشىلار جاڭا دۇنيەنى ۇيرەنۋگە بەلسەندى قاتىستى. سەبەبى ءقازىر ساۋاتتىلىقتى ارتتىرۋعا باعىتتالعان سەمينار اقىلى. ونىڭ ۇستىنە ۋاقىتتىڭ تالابى جازعان دۇنيەڭنىڭ الەۋمەتتىك جەلىدە تەز قارالىم جيناپ، ودان پايدا تابۋ بولىپ وتىر. سول سەبەپتى مۇنداي پايداسى زور ءارى تەگىن ساباقتان تۇركىستاندىق جۋرناليستەر تولىققاندى جاۋاپ الۋعا تىرىستى.
بۇدان باسقا، سەميناردا مەديا-ترەنەرلەر ءدارىس وتكىزىپ، ارىپتەستەر جاساندى ينتەللەكت بويىنشا ىسكەرلىك جۋرناليستيكادا قولدانۋدى ۇيرەندى.
جاساندى ينتەلەكتپەن قالاي جۇمىس جاساۋ كەرەكتىگى، ونىڭ پايدالى تۇستارى قايسى، ول ءۇشىن قانداي پروگراممالارمەن جۇمىس ىستەۋ كەرەكتىگىن قازاق تىلىندەگى ب ا ق وكىلدەرىنىڭ كاسىبي بىلىگىن ارتتىرۋ جولىندا مەديا ترەنەر باۋىرجان عاپپاروۆتىڭ «AI: ينفوگرافيكا، پوستەر، پرەزەنتاسيا» تاقىرىبىندا وتكەن ساباعىندا ءتۇسىندىرىپ ءوتتى. اتاپ ايتقاندا، پوستەر، افيشا، ينفوگرافيكا جاساۋ، فوتوكوللاج، سۋرەت، اشىق دەرەككوزدەرمەن جۇمىس، اۋديو مونتاج، دىبىستى تازالاۋ، ۆيدەو مونتاج، جاساندى ينتەللەكت سەكىلدى زاماناۋي مەدياساۋاتتىلىق مۇمكىندىكتەرىن كۇندەلىكتى قىزمەتتە قولدانۋدىڭ جولدارىن ۇيرەنۋگە دەگەن قىزىعۋشىلىق جوعارى بولدى.
باقداۋلەت ايداعارايەۆ
