تەليەۆيزيا ۇجىمى ناعىز ەڭبەك ادامدارىن «تۇركىستاندى تۇلەتكەندەر» دەپ اتاپ، تەلەارنا ەفيرىنەن شىققان باعدارلاما ارقىلى 20 تۇلعاعا جەكە-جەكە فيلم ازىرلەگەن. ءارقايسىسى ءوز سالاسىنداعى جەتىستىگىن، بەس جىل بۇرىنعى ەستەلىگىن ايتىپ، ادەمى اسەرلى شىعارىلىم كورەرمەنگە ۇسىنىلعان ەدى.
بۇل باعدارلاما تىكەلەي وبلىس اكىمىنىڭ باستاماسىمەن جۇزەگە اسقان بولاتىن.
پرەزيدەنت جارلىعىمەن 2018 جىلدىڭ 19 ماۋسىمىندا جاڭادان تۇركىستان وبلىسى قۇرىلعان بولاتىن. بۇل تاريحي شەشىم وڭىرگە جاڭا سەرپىن بەردى جانە جان-جاقتى دامۋ مۇمكىندىكتەرىنە جول اشتى.
تاريحي شاھاردا جۇزدەگەن نىسان بوي كوتەرىپ، كونە شاھار جاڭاردى، قايتا تۇرلەندى. سول جاۋاپكەرشىلىكتىڭ جۇگىن ارقالاپ، تۇرلەنگەن تۇركىستاندى دامىتۋعا ەلەۋلى ۇلەس قوسىپ، ەڭبەكتەن باقىت تاپقان جاندار جەتەرلىك.
ماراپات العانداردىڭ قاتارىندا تۇركىستان قالالىق ارداگەرلەر كەڭەسىنىڭ ءتوراعاسى جارقىنبەك قۇلبايىمبەتوۆ، ۇلاعاتتى ۇستاز نۇرسۇلۋ شەكتىبايەۆا، تۇركىستان وبلىستىق پوليسيا دەپارتامەنتى باستىعىنىڭ ورىنباسارى، پوليسيا پولكوۆنيگى قۇرمانبەك ساحوۆ، تۇركىستان وبلىستىق ءماسليحاتىنىڭ ءتوراعاسى نۇرالى ابيشوۆ، «قازاقستان» ۇلتتىق ارناسىنىڭ تۇركىستان وبلىسىنداعى مەنشىكتى ءتىلشىسى، كاسىبي جۋرناليست اينۇر اقبايەۆا، 4 دۇركىن الەم چەمپيونى، حالىقارالىق دارەجەدەگى تورەشى، پروفەسسور، جاتتىقتىرۋشى ءابدىسادىق حاليلايەۆ، «اقجايىق» مۋزىكا مەكتەبىنىڭ ديرەكتورى سىرىم ايسىنوۆ، تاريح عىلىمدارىنىڭ دوكتورى، پروفەسسور تۇرسىن حازرەتالى، كىتاپحاناشى، وبلىستىق فاراب كىتاپحاناسىنىڭ جاس مامانى ارداق نۇرعالي، تۇركىستان وبلىستىق مادەنيەت جانە تۋريزم باسقارماسىنىڭ ءبولىم باسشىسى نۇرداۋلەت مەدەۋوۆ، تۇركىستان مۋزىكالىق دراما تەاترىنىڭ ءارتىسى اق-سۇلتان انۋاربەك، وبلىستىق جاستار ورتالىعىنىڭ بەلدى قىزمەتكەرى، ءبولىم باسشىسى اقتورە قايرات، «حابيبۋللا اتا» كاسىپورنى، «ەدەم» جيھاز سەحىنىڭ ديرەكتورى يكبول ابيشيەۆ، «نەكە سارايىنىڭ » ديرەكتورى ءمولدىر ديلدابايەۆا، قۇرىلىسشى-پروراب مارات جاقايەۆ، قوعامدىق كولىك جۇرگىزۋشىسى باقىت سارباسوۆ، «جاسىل تۇركىستان» مەكەمەسىنىڭ بريگاديرى دجاماليددين ابدراحمانوۆ، تۇركىستاندىق برەند، «Daily food» كافە-رەستوران جەلىسىنىڭ اتقارۋشى ديرەكتورى داۋلەت قاۋىنبايەۆ، حالىققا قىزمەت كورسەتۋ ورتالىعىنىڭ باس مامانى اسحات مۇحامەدالي ۇلى بار.
شارا بارىسىندا اسەم اندەر شىرقالىپ، زيالى قاۋىم ىزگى تىلەگىن ارنادى. كەش سوڭىندا قاتىسۋشىلار شارانىڭ كوپتىڭ كوڭىلىنەن شىققاندىعىن ايتىپ، العىسىن ءبىلدىردى. سونىمەن قاتار ەستەلىك سۋرەتكە ءتۇسىپ، قۇرمەتپەن تاراستى.
