ورمان شارۋاشىلىعى سالاسىنداعى ءوڭىردىڭ جەتىستىكتەرىمەن تانىسۋ جانە تاجىريبە الماسۋ ماقساتىندا كەلگەن وزبەكستان رەسپۋبليكاسى مەن ق ر ەكولوگيا، گەولوگيا جانە تابيعي رەسۋرستار مينيسترلىگى باسشىلىعىنىڭ دەلەگاسياسى تۇركىستان وڭىرىندە اتقارىلعان جۇمىستارمەن تانىسىپ، وڭ باعا بەردى. جەرگىلىكتى ەكولوگيانى جاقسارتۋ جولىندا اتقارىلىپ جاتقان جۇمىستار مەن «جاسىل بەلدەۋ» جوباسىن جوعارى باعالادى.
تاراپتار مەملەكەت باسشىسىنىڭ حالىققا جولداۋىندا كورسەتىلگەن ەكولوگيالىق احۋالدى جاقسارتۋ ءۇشىن مەملەكەتتىك ورمان قورى جەرلەرىندە 2 ملرد ءار ءتۇرلى اعاش كوشەتتەرىن وتىرعىزۋ تۋرالى تاپسىرماسى اياسىندا جۇرگىزىلىپ جاتقان جۇمىستارعا توقتالدى. كەشەندى جوسپار اياسىندا تۇركىستان وبلىسى بويىنشا 5 جىلدا 110 مىڭنان استام گەكتار جەرگە 170 ملن. اعاش كوشەتتەرىن وتىرعىزۋ بويىنشا ءتيىستى جۇمىستار اتقارىلۋدا.
بەكىتىلگەن كەشەندى جوسپاردى جۇزەگە اسىرۋ ماقساتىندا ورمان شارۋاشىلىعى مەكەمەلەرىنىڭ ورمان تۇقىمباقتارىندا 50-دەن اسا اعاش-بۇتا تۇرلەرىنىڭ كوشەتتەرى وسىرىلۋدە.
وبلىس اكىمى ءومىرزاق شوكەيەۆتىڭ باستاماسىمەن 2019 جىلى تۇركىستان قالاسىنىڭ اينالاسىنان 7700 گەكتار جەرگە «جاسىل بەلدەۋ» قۇرىلىپ، 12 ميلليونعا جۋىق جاپىراقتى اعاش كوشەتتەرى ەگىلگەن. بۇگىندە ونىڭ اۋماعى ەكى ەسە ۇلعايعان. 2025 جىلعا دەيىن شاھاردىڭ جاسىل بەلدەۋىن 20 مىڭ گەكتارعا ۇلعايتۋ كوزدەلگەن. وسىلايشا 5-6 جىل كولەمىندە كۇتىپ-باپتاۋ جۇمىستارى ارقىلى بۇل اۋماق ورمان القابىنا اينالادى.
ەگىلگەن كوشەتتەرگە تۇراقتى تۇردە كۇتىپ باپتاۋ جۇمىستارى جۇرگىزىلۋىنىڭ ناتيجەسىندە كونىمدىلىگى 60-65 پايىزدى قۇراپ وتىر. تۇركىستان قالاسى اۋماعىنىڭ توپىراقتىق-كليماتتىق جاعدايى ەرەكشە. سەبەبى توپىراق قۇرامى سورلانىپ، قۇنارلىعى تومەندەگەن. وسىنى ەسكەرگەن وزبەكستان عالىمدارى اعاشتاردىڭ كونىمدىلىگى 50 پايىزدى قۇراسا، سونىڭ ءوزى ۇلكەن جەتىستىك دەپ باعالاپ وتىر. ساپار بارىسىندا وزبەكستان توبى وڭىردەگى سەكسەۋىل ەگىلگەن اۋماقتاردى ارالاپ، تاجىريبەلەرىمەن ءبولىستى.
– تابيعي جاعدايلاردى ەسەپكە الۋ كەرەك. ەگىلگەن كوشەتتىڭ 100 پايىزى كوگەرىپ، كوكتەگەنى بولعان ەمەس، ول مۇمكىن ەمەس تە. عىلىمي دالەلدەنگەن دۇنيە بار. وعان سايكەس، وتىرعىزىلعان اعاشتىڭ 50-55 % جەرسىنسە، جاقسى. بۇل جاقسى كورسەتكىش. وعان جەتۋ ءۇشىن دە تىنىمسىز ەڭبەك كەرەك. ءبىزدىڭ ەلدەگى كليمات تا ۇقساس. ناتيجەلەرى دە وسىنداي. ءدال سىزدەردەگى اۋا-رايى جاعدايىن ەسەپكە الساق، قازىرگى ەڭبەك – ناعىز ەرلىك، – دەدى وزبەكستان رەسپۋبليكاسى ورمان شارۋاشىلىعى عىلىمي-زەرتتەۋ ينستيتۋتىنىڭ زەرتحانا جەتەكشىسى زينوۆيي نوۆيسكيي.
وبلىس اكىمدىگىنىڭ قولداۋىمەن ورمان شارۋاشىلىعىنا قاجەتتى بارلىعى 69 بىرلىك، ونىڭ ىشىندە 34 تراكتور، 9 اۆتوكولىك، 26 تىركەمە الۋ جوسپارلانىپ، بۇگىنگى كۇنگە 21 تراكتور مەن 15 تىركەمە الىندى. تۇركىستاندى جاسىل قالاعا اينالدىرۋ باعىتىندا جۇمىستار جالعاسا بەرەدى.
