تۇركى جۇرتىنىڭ رۋحاني دا كيەلى استاناسى – تۇركىستان تورىندە بۇگىن تۇركىتىلدەس حالىقتاردىڭ ءانى اۋەلەگەن كۇن بولدى. «تۇركىستان – تۇركى الەمىنىڭ مادەني استاناسى» جىلىنىڭ سالتاناتتى اشىلۋى مەن ناۋرىز مەرەكەسى اياسىندا وتكەن مەرەكەلىك گالا-كونسەرتتە تۇركىتىلدەس ەلدەر مەن قازاقستاننىڭ 160-تان استام ونەر جۇلدىزدارى ونەر كورسەتىپ، اننەن شاشۋ شاشتى.

حالىقارالىق دەڭگەيدە وتكەن شارانى ش.قالداياقوۆ اتىنداعى وبلىستىق فيلارمونيانىڭ انشىلەرى «ناۋرىز» انىمەن اشسا، قازاقستان، تاتارستان رەسپۋبليكالارىنىڭ حالىق ءارتىسى نۇرجامال ۇسەنبايەۆا «قازاق ءۆالسى» ءانىن ورىنداپ، عاجايىپ كەشتىڭ جالعاسىن شەتەلدىك ونەر مايتالماندارىنىڭ كەزەگىنە بەردى.



اتاپ ايتقاندا، بۇل كۇنى بولگاريادان كەلگەن «تۋركسادەر رودوپ ەسينتيلەري» ءانسامبلى «تراكيا» ءبيىن بيلەسە، التايلىق اعايىندار ۇلتتىق اندەرىنەن پوپۋرري ورىندادى. ماجارستاندىق ونەر ۇجىمدارى دا بۇل كەشتە بار. ونداعى «Forras» ءانسامبلى ۆەنگر حالىق ءانىن ايتىپ، چۋۆاشتىق كۇمىسكومەي ءانشى ۆەرا شۋركينا ءوز تىلىندە ءان شىرقادى.

جالپى، گالا-كونسەرتتەگى مەرەكەلىك 20-دان استام نومىردە 10-نان استام شەتەلدىك جۇلدىزدار - گرەكتەر مەن سولتۇستىك كيپر ونەر ۇجىمدارى، رۋمىندىقتار، ساحا-ياكۋتتار، مولداۆانىڭ گاگاۋىز ەلى، قالمىق ۇلتتارى، ماكەدونيادان كەلگەن ونەر ۇجىمى، موڭعولدىقتار، وزبەكستاندىق انشى-بيشىلەر تۇركىنىڭ تورىندە وتكەن دۋمان تويدا جىردان شاشۋ شاشىپ، ءبىر جاساپ قالدى.

قازاقستاندىق مادەنيەت ۇزدىكتەرى قوناق بولىپ كەلگەن ونەر ۇجىمدارىمەن كەزەك الماسا ونەر كورسەتىپ، ءا.بەيسەۋوۆتىڭ «شاقىرادى كوكتەم»، ب.ورال ۇلىنىڭ «دومبىراسىن»، ن.تىلەندييەۆتىڭ «سارىجايلاۋىن»، ءو.التايەۆتىڭ «قازاقستانىم العا» اندەرىن ورىنداپ، كوپشىلىكتىڭ ىستىق ىقىلاسىنا بولەندى. سونداي-اق، گالا-كونسەرتتىڭ اياقتالۋ ساتىندە س.بايتەرەكوۆتىڭ «تۇركىستان» ءانى ورىندالىپ، ادەمى كەشتىڭ شىرايىن اشىلدى.

گالا-كونسەرت جالعاسى وبلىس اكىمىنىڭ ىقىلاس گۇلدەرىمەن اجارلانىپ، شارا سوڭى وتشاشۋمەن ارلەندى.

 

وقو اكىمىنىڭ باسپا ءسوز قىزمەتى