الەۋمەتتىك جەلىدە اكەسىن ۇرىپ-سوققان ەر ادامنىڭ ۆيدەوسى تارادى. كەيىنىرەك بۇل دەرەك بويىنشا قىلمىستىق ءىس قوزعالدى. كۇدىكتى ۇستالىپ، ۋاقىتشا ۇستاۋ يزولياتورىنا قامالدى. ونىڭ ايەلىنە قاتىستى دا تەرگەۋ جۇرگىزىلىپ جاتىر،- دەپ حابارلايدى Dalanews.kz.
Tengrinews.kz-كە بەرگەن جاۋابىندا پوليسيا مارقۇمنىڭ كەلىنىنە قاتىستى دا تەرگەۋ جۇرگىزىلىپ جاتقانىن مالىمدەدى.
قىلمىستىق ءىس قك-نىڭ 109-1-بابى 2-بولىگى 3-تارماعى "كىنالى ادامعا دارمەنسىز كۇيدە ەكەنى كورىنەۋ بەلگىلى نە كىنالى ادامعا ماتەريالدىق جاعىنان نەمەسە وزگەشە تۇردە تاۋەلدى ادامعا قاتىستى جاسالعان ۇرىپ-سوعۋ" بويىنشا قوزعالعان.
ەسكە سالايىق، الەۋمەتتىك جەلىدە تۇركىستان وبلىسى شاردارا اۋدانىندا قارتايعان اكەسىن بالاسى اياۋسىز سوققىعا جىققانى تۇسىرىلگەن ۆيدەو تاراعان بولاتىن.
كادردان بالاسى مەن كەلىنى سويلەي المايتىن، وزدىگىنەن ءجۇرىپ-تۇرا المايتىن قاريانى كوشەدە جانە ءۇي اۋلاسىندا سۇيرەپ جۇرگەنىن كورۋگە بولادى. ۇلى اكەسىن بالاعاتتاپ، جۇرە الماعانى ءۇشىن بىرنەشە رەت ۇرىپ-سوققان. سوققىدان قاريانىڭ اۋزىنان قان كەتكەنى بايقالادى. ءبىراق قاريا ەش قارسىلىق بىلدىرمەيدى، ال كەلىنى اراشا تۇسپەيدى.
جەلىدە بۇل جاعداي قىزۋ تالقىلانىپ، ۇلكەن رەزونانس تۋدىردى.
