تۇركىستان وبلىسى بويىنشا 109 ءبىرىڭعاي بايلانىس ورتالىعىنا جىل باسىنان بەرى 100 837 ءوتىنىش، ۇسىنىس كەلىپ تۇسكەن. ورتالىققا وتىنىمدەردىڭ 97%-ى قوڭىراۋ شالۋ ارقىلى جانە 3%-ى الەۋمەتتىك جەلىلەر (Whatsaap، Instagram، Telegram، Facebook) ارقىلى جودانعان. بۇل تۋرالى بۇگىن وبلىس اكىمى دارحان ساتىبالدىنىڭ توراعالىعىمەن وتكەن اپپارات ماجىلىسىندە كەڭىنەن تالقىلاندى. ءوڭىر باسشىسى حالىقپەن بايلانىستى نىعايتۋ، وتىنىشتەرگە دەر كەزىندە جاۋاپ بەرۋدى تاپسىردى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
– بايلانىس ورتالىعىنا تۇسكەن ءاربىر ءوتىنىش مۇقيات قاداعالانىپ، باقىلاۋعا الىنۋى ءتيىس. بۇل ءىستى ساپالى اتقارا الماي وتىرعان اۋدان، قالا اكىمدىكتەرى جۇمىستى شيراتسىن. وزەكتى، كەزەك كۇتتىرمەيتىن ماسەلەلەردى سوزبالاڭعا سالۋعا بولمايدى. بايلانىس ورتالىعىنىڭ جۇمىسىن جەتىلدىرىپ، جۇيەلەي تۇسكەن ءجون، – دەدى دارحان ساتىبالدى.
جيىن بارىسىندا وبلىستىق سيفرلاندىرۋ، مەملەكەتتىك قىزمەتتەر كورسەتۋ جانە ارحيۆتەر باسقارماسى باسشىسى مارات اينابەكوۆ بايانداما جاسادى. ونىڭ ايتۋىنشا، ءوڭىر تۇرعىندارى كۇندەلىكتى كوممۋنالدىق-تۇرمىستىق، ءبىلىم، اكىمدىك قىزمەتتەر بويىنشا ءوتىنىش تۇسىرەدى. باسقارما باسشىسى شاعىمدارعا ءتيىستى مەكەمەلەرمەن بەرىلگەن جاۋاپتى سمس-حابارلاما رەتىندە تۇرعىندارعا جولداۋدى ۇيىمداستىرۋ، اۋدان، قالا اكىمدىكتەرىمەن تۇسكەن وتىنىمدەردىڭ ۋاقىتىلى جانە ساپالى ورىندالۋىن قامتاماسىز ەتۋ جانە تۇرعىندار اراسىندا 109 ءبىرىڭعاي بايلانىس جەلىسىن كەڭىنەن ناسيحاتتاۋ شارالارىن جۇرگىزۋ سىندى ءبىرقاتار ۇسىنىستارىن جەتكىزدى.
تالداۋ ناتيجەسىندە 9 ايدىڭ قورىتىندىسى بويىنشا وتىنىشتەر 13 پايىزعا تومەندەپ وتىر. نەگىزىنەن تۇركىستان جانە كەنتاۋ قالالارى مەن تولەبي اۋدانىنان قوڭىراۋلار كوپ تۇسەدى. ال وتىنىمدەردىڭ ەڭ ازى سارىاعاش، سوزاق، وتىرار، ماقتاارال اۋداندارىنا تيەسىلى. سونىمەن قاتار «تازا قازاقستان» باعدارلاماسى بويىنشا دا 20 ماۋسىمنان بەرى 500-گە جۋىق ءوتىنىم كەلىپ تۇسكەن.
ايتا كەتەيىك، 109 ءبىرىڭعاي بايلانىس ورتالىعى تۇركىستان وبلىسى تۇرعىندارىنىڭ وتىنىشتەرىن قابىلداپ، جاۋاپتى باسقارمالارعا نەمەسە اۋدان، قالا اكىمدىكتەرىنە، سونىمەن قاتار جاۋاپتى بولىمدەر مەن مەردىگەرلەرگە جولداپ، وتىنىشتەردىڭ تولىق، ساپالى جانە ۋاقتىلى ورىندالۋىن قامتاماسىز ەتەدى.
