بۇگىن التىنشى شاقىرىلىمداعى وبلىستىق ءماسليحاتتىڭ كەزەكتەن تىس  جيىرما التىنشى سەسسياسى العاش رەت تۇركىستان وبلىسىنىڭ ورتالىعىندا ءوتتى. بۇل جيىندى وبلىستىق ءماسليحات سەسسياسىنىڭ ءتوراعاسى بازارباي مۇسابەكوۆ جۇرگىزدى.

سەسسيا جۇمىسىنا وبلىس اكىمى، وبلىس اكىمدىگىنىڭ مۇشەلەرى، وبلىستىق اۋماقتىق سايلاۋ كوميسسياسىنىڭ ءتوراعاسى، قالا جانە اۋدان اكىمدەرى، قۇقىق قورعاۋ ورگاندارىنىڭ، وبلىستىق اۋماقتىق دەپارتامەنتتەر مەن باسقارمالاردىڭ، ۇيىمداردىڭ باسشىلارى، بۇقارالىق اقپارات قۇرالدارىنىڭ وكىلدەرى قاتىستى.



وبلىستىق ءماسليحات سەسسياسىنىڭ كۇن تارتىبىندە وبلىستى باسقارۋ سحەماسىنا وزگەرىستەر ەنگىزۋ مەن تۇركىستان وبلىسى اكىمدىگىنىڭ دەربەس قۇرامىن كەلىسۋ تۋرالى جانە ءوڭىردىڭ اكىمشىلىك-اۋماقتىق قۇرىلىسى سىندى التى ماسەلە قارالدى.

سەسسيا وتىرىسىندا ءسوز العان وبلىس اكىمى جانسەيىت تۇيمەبايەۆ بۇگىنگى تۇركىستان قالاسىندا وتكىزىلىپ وتىرعان وبلىستىق ءماسليحاتىنىڭ سەسسياسى تاريحي ەكەنىن ايتىپ،  ەلوردادا 1997 جىلى 9 جەلتوقساندا وتكىزىلگەن ق ر پارلامەنتىنىڭ بىرلەسكەن ءبىرىنشى ءماجىلىسىن ەسكە الدى.

– تۇركىستان وبلىسى – ەل يگىلىگى، ۇلت بولاشاعى ءۇشىن قابىلدانعان ەلباسىمىزدىڭ باستاۋىمەن قولعا الىنعان ماڭىزدى شەشىم. بۇل استانانىڭ 20 جىلدىعىن تويلاۋ كەزىندە قازاقستانعا جاڭا سەرپىن بەرەتىن، جاڭا باستاما بولاتىن ۇلكەن قوزعالىس بولىپ تۇر. ەلباسىمىز 19 ماۋسىمدا وسى جارلىققا قول قويۋ كەزىندە كوپ نارسەنى ءتۇسىندىرىپ ايتتى. ورتا عاسىرلاردا قازاق حاندىعىنىڭ ورداسى بولعان،  قازاق جەرىندە مەملەكەتتىلىكتىڭ قالىپتاسۋىنا ەرەكشە ىقپال ەتكەن، تالاي حاندارىمىز، بيلەرىمىز بەن باتىرلارىمىز جانە سۇلتاندارىمىز جاتقان تۇركىستان قالاسى شىنىندا دا وزىنە لايىقتى قازاقستاننىڭ جانە تۇركى دۇنيەسىنىڭ مادەني ورتالىعى بولۋعا ءتيىستى، – دەدى وبلىس اكىمى.

بۇدان بولەك، سەسسيا بارىسىندا وبلىس اكىمى دەپۋتاتتاردى «استانانىڭ 20 جىلدىعى» مەدالىمەن جانە ءماسليحاتتىڭ قۇرمەت گراموتاسىمەن ماراپاتتادى.

 

 

تۇركىستان وبلىسى اكىمىنىڭ باسپا ءسوز قىزمەتى