ۇلتىمىزدىڭ كورنەكتى مەملەكەت قايراتكەرى، قازاق ۇكىمەتىن 13 جىل باسقارعان، ءادىل باسشى، حالىقتىڭ ناعىز جاناشىرى بولا بىلگەن نۇرتاس وڭداسىنوۆتىڭ 120 جىلدىعى ەلىمىز كولەمىندە كەڭىنەن اتالىپ وتىلۋدە، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
ۇلت قايراتكەرىن ۇلىقتاپ، رۋحىنا تاعزىم ەتۋ ءۇشىن ارنايى دەلەگاسيا قۇرامى ساۋران اۋدانىنا بارىپ، نۇرتاس ءداندىباي ۇلىنىڭ بەيىت باسىنا زيارات ەتتى.
قوعام قايراتكەرىنىڭ ماڭگىلىك مۇراسىن جاڭعىرتىپ، ۇلتتىڭ دامۋىنا قوسقان ۇلەسىن ۇلىقتاۋ ءۇشىن قازاقستان جازۋشىلار وداعىنىڭ باسقارما ءتوراعاسى مەرەكە قۇلكەنوۆ، ق ر پارلامەنتى ءماجىلىسىنىڭ دەپۋتاتى قازىبەك يسا، اقىن قاسىمحان بەگمانوۆ، عالىم، قوعام قايراتكەرى، فيلولوگيا عىلىمىنىڭ كانديداتى اسلى وسمان، يسلام ءابىشوۆ، نۇرتاستانۋشى عالىم، جازۋشى-جۋرناليست گۇلسىم ورازالييەۆا مەن قوعامدىق دامۋ باسقارماسىنىڭ باسشىسى ەرلان كۇزەمبايەۆ پەن اۋدان اكىمى ماقسات تاڭعاتاروۆ جانە تۋعان اۋىلىنان كوزىن كورگەن زامانداستارى، زيالى قاۋىم وكىلدەرى قاتىستى. تۇركىستان وبلىسى بويىنشا وكىل يمام ەرجان تولەپوۆ نۇرتاس ءداندىباي ۇلىنىڭ رۋحىنا بەيىت باسىندا قۇران باعىشتادى.
بەيرەسمي تولعانىس جاساعان زيارات ەتۋشى زيالى قاۋىم وكىلدەرى ساياسي تۇلعانىڭ رۋحىنا تاعزىم جاساپ، ەرەكشە قۇرمەتپەن گۇل شوقتارىن قويدى. نۇرتاس وڭداسىنوۆتىڭ ەسىمى قازاقستاننىڭ دامۋ كەزەڭىمەن تىعىز بايلانىستى.
ۇلت قايراتكەرى ەلىمىزدىڭ مۇناي-گاز سالاسىن يگەرۋ، قازاق عىلىم اكادەمياسى، قىزدار پەداگوگيكا ينستيتۋتى، اباي اتىنداعى وپەرا جانە بالەت تەاترى، كونسەرۆاتوريا تاعى وزگە نىسانداردىڭ اشىلۋىنا ۇيىتقى بولدى. رۋحاني باسقوسۋدا قوناقتار عالىمنىڭ ءومىرى مەن ەڭبەك جولىنداعى وسىنداي ەستەلىكتەرىمەن ءبولىستى.
