تۇركىستانداعى ق.ا.ياساۋي اتىنداعى حقتۋ-دىڭ مادەنيەت ورتالىعىندا قازاقتىڭ كورنەكتى جازۋشىسى، اقىن، ادەبيەت سىنشىسى تاكەن ءالىمقۇلوۆتىڭ 100 جىلدىعى مەن جازۋشى، دراماتۋرگ اسقار سۇلەيمەنوۆتىڭ 80 جىلدىعىنا وراي «ۇلى دالانىڭ دارا دانالارى» كىتاپ كورمەسى مەن «قاراتاۋدىڭ ءتول پەرزەنتتەرى» اتتى ەسكە الۋ كەشى ءوتتى.
ەلباسى ن.ءا.نازاربايەۆتىڭ «بولاشاققا باعدار: رۋحاني جاڭعىرۋ» ماقالاسى اياسىندا ۇيىمداستىرىلعان ادەبي كەشكە زيالى قاۋىم وكىلدەرى، ادەبيەتشىلەر، اقىن-جازۋشىلار مەن وقىرماندار قاتىستى.
رۋحاني كەشتە تۇركىستان وبلىسى اكىمىنىڭ ورىنباسارى مالىك وتاربايەۆ «قۇلاگەردەي قالامگەرلەردىڭ اتىن ارداقتاۋ، قۇرمەت تۇتىپ قاستەرلەۋ، بيىككە كوتەرۋ، مۇرا ەتىپ قالدىرعان التىن قازىنالارىن كەلەشەك ۇرپاققا جەتكىزۋ — بارشامىزدىڭ پارىزىمىز» دەي كەلە ءوڭىر باسشىسى جانسەيىت تۇيمەبايەۆتىڭ قۇتتىقتاۋ حاتىن وقىپ بەردى.
سونىمەن بىرگە، تاكەن ءالىمقۇلوۆتىڭ جۇبايى ەسىمكۇل ءالىمقۇلوۆا مەن اسقار سۇلەيمەنوۆتىڭ ۇلى الىشەر سۇلەيمەنوۆكە وبلىس باسشىسىنىڭ سىي-سياپاتىن تابىس ەتتى.
ءسوز زەرگەرلەرىن ەسكە الۋعا ارنالعان كەشكە قازاقستان جازۋشىلار وداعى باسقارماسى ءتوراعاسىنىڭ ورىنباسارى باقىت بەدەلحان ۇلى، قازاقستاننىڭ مەملەكەتتىك سىيلىعىنىڭ لاۋرەاتى، اقىن، جازۋشى ەسەنعالي راۋشانوۆ، جازۋشى، فيلولوگيا عىلىمدارىنىڭ دوكتورى، پروفەسسور قۇلبەك ەرگوبەك، «تۇركى الەمىنە قىزمەتى ءۇشىن» حالىقارالىق سىيلىقتىڭ يەگەرى رافاەل نيازبەك ۇلى، جازۋشى، «الاش» حالىقارالىق ادەبي سىيلىعىنىڭ لاۋرەاتى مارحابات بايعۇت جانە سوزاق اۋدانىنىڭ قۇرمەتتى ازاماتى، اقىن مىڭجاسار اسقاروۆ جانە وزگە دە زيالى قاۋىم وكىلدەرى ادەبيەتتىڭ قوس الىبىنىڭ ەڭبەگى ەرەن ەكەنىنە توقتالىپ، ولاردىڭ رۋحاني مۇرالارى ەلگە ماڭگى قىزمەت ەتەتىنىن ايتتى.
ادەبي كەشتە ر.سەيتمەتوۆ اتىنداعى تۇركىستان سازدى دراما تەاترىنىڭ ارتىستەرى «قاراتاۋدىڭ ءتول پەرزەنتتەرى» پوەتيكالىق كومپوزيسياسىن ۇسىنسا، وبلىس ونەرپازدارى كونسەرتتىك باعدارلاماسىن تارتۋ ەتتى.جيىنعا قاتىسۋشىلار «رۋحاني جاڭعىرۋ» باعدارلاماسى اياسىندا وتكەن كەشكە ريزاشىلىقتارىن ءبىلدىرىپ، رۋحاني سەرپىلىپ قايتتى.
وسى كۇنى تۇركىستان قالاسىنداعى №21 جالپى ورتا مەكتەبىندە دە تاكەن ءالىمقۇلوۆتىڭ 100 جىلدىعىنا ارنالعان ەسكە الۋ ءىس-شاراسى ءوتتى. سونداي-اق، تۇركىستان قالاسىنداعى №21 جالپى ورتا مەكتەبىنە ت.ءالىمقۇلوۆتىڭ اتىن بەرۋ جونىندە پرەزيدەنت اكىمشىلىگىنە ۇسىنىس حات جولدانسا، تۇركىستان قالاسىنداعى ا.سۇلەيمەنوۆ كوشەسىنە گاز، سۋ تارتىلىپ، جولى جوندەلەتىنى دە بەلگىلى بولدى. ۇلى تۇلعالارعا دەگەن قۇرمەت ەشقاشان تومەندەمەيدى.
