تۇركىستاندا حالىق قاھارمانى راقىمجان قوشقاربايەۆتىڭ 100 جىلدىعىنا ارنالعان مەرەكەلىك ءىس-شارا ءوتتى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
حالىق قاھارمانى راقىمجان قوشقاربايەۆتىڭ 100 جىلدىعىن اتاپ ءوتۋ ماقساتىندا ۇيىمداستىرىلعان شاراعا وبلىس اكىمىنىڭ ورىنباسارى ەرتاي التايەۆ قاتىسىپ، بۇگىنگى شارانىڭ ماڭىزدىلىعىنا توقتالدى.
– بۇگىن ءبىز ۇلى تۇلعا، حالىق قاھارمانى راقىمجان قوشقاربايەۆتىڭ 100 جىلدىق مەرەيتويىن اتاپ ءوتۋ ءۇشىن جينالدىق. بۇل شارا – باتىرىمىزدىڭ ەرلىگىن، وتانشىلدىق رۋحىن جانە حالقىمىز ءۇشىن سىڭىرگەن ەڭبەگىن ەسكە الۋ، ءارى جاستارعا ۇلگى كورسەتۋ.
بۇگىنگى ءىس-شارا – راقىمجان قوشقاربايەۆتىڭ مۇراسىن ماڭگى ساقتاۋ، ونىڭ اتىمەن بايلانىستى تاريحي وقيعالاردى جاڭعىرتۋ، بولاشاق ۇرپاققا جەتكىزۋ ءۇشىن ماڭىزدى ءسات. ءبىز ونى ۇمىتپاي، جادىمىزدا ساقتاۋعا مىندەتتىمىز، – دەدى ەرتاي كەنجەبەك ۇلى.
مەرەكەلىك ءىس-شارا اياسىندا «AMANAT» پارتياسى تۇركىستان وبلىستىق فيليالى، تۇركىستان وبلىستىق قورعانىس ىستەرى جونىندەگى دەپارتامەنتى، «تۇركىستان وبلىستىق ءارتۇرلى دەڭگەيدەگى ارداگەرلەردى ۇيلەستىرۋ كەڭەسى» قوعامدىق بىرلەستىگى جانە وبلىس اكىمدىگى تاراپىنان مەموراندۋمعا قول قويۋ ءراسىمى ءوتتى.
مەموراندۋمنىڭ ماقساتى – ولىستاعى ءارتۇرلى دەڭگەيدەگى ارداگەرلەردىڭ ءوزارا بىرلىگىن نىعايتۋ، «ارداگەر» دەگەن قۇرمەتتى ەسىمنىڭ مارتەبەسىن كوتەرۋ، ۇلاعاتتى ءومىر جولىن وسكەلەڭ ۇرپاققا ۇلگى ەتۋ، ءداستۇر ساباقتاستىعى مەن ۇلتتىق قۇندىلىقتارىن ساقتاۋ.
