تۇركىستاندا قازاقستان ءماسليحاتتارىنىڭ 30 جىلدىعىنا ارنالعان «ادىلەتتى قازاقستاندى قۇرۋدا ءماسليحاتتاردىڭ ءرولى: تاريح، بۇگىن جانە بولاشاق» اتتى عىلىمي-پراكتيكالىق كونفەرەنسيا ءوتتى. وعان قوعام قايراتكەرلەرى، پارلامەنت سەناتى مەن ءماجىلىسىنىڭ دەپۋتاتتارى، ءماسليحاتتىڭ بۇرىنعى ءتوراعالارى، ارداگەرلەر، تۇركىستان ءوڭىرىنىڭ دەپۋتاتتارى قاتىستى. ماڭىزدى جيىندا تۇركىستان وبلىسىنىڭ اكىمى دارحان ساتىبالدى دەپۋتاتتاردى جانە كوپشىلىكتى قازاقستان ءماسليحاتتارىنىڭ 30 جىلدىعىمەن قۇتتىقتادى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
– الاش ارىسى احمەت بايتۇرسىن ۇلىنىڭ «ۇلت جۇمىسى – ۇلكەن جۇمىس: ۇلكەن جۇمىسقا كوپ جۇمىسكەر كەرەك» دەگەن قاناتتى ءسوزى بار. بۇل رەتتە تۇركىستان وبلىسىنداعى وبلىستىق جانە جەرگىلىكتى ءماسليحاتتاردىڭ قوعامداعى ءرولى جوعارى. سىزدەر ءوڭىردىڭ دامۋىنا ۇلەس قوسىپ، ەڭبەك ەتىپ كەلەسىزدەر. مەملەكەت باسشىسى قاسىم-جومارت كەمەل ۇلى ءماسليحاتتار مەن جەرگىلىكتى اتقارۋشى ورگاندارعا ەلمەن، ءتۇرلى قوعامدىق ۇيىمدارمەن ديالوگ ورناتىپ، حالىقتىڭ مۇڭ-مۇقتاجىن بىرلەسە شەشۋدى تاپسىردى.
بۇل – ءسىز بەن ءبىزدىڭ ورتاق مىندەتىمىز. وڭىردە ينۆەستيسيا تارتۋ، ءوندىرىس ورىندارىن اشۋعا باسىمدىق بەرىلۋدە. وبلىستاعى جەرگىلىكتى ءماسليحاتتاردا 300-دەن استام دەپۋتات ەڭبەك ەتۋدە. ولاردىڭ اراسىندا اۋىل شارۋاشىلىعى، ءبىلىم، دەنساۋلىق جانە وزگە سالالاردىڭ وكىلدەرى بار، ال باسىم بولىگىن كاسىپكەرلەر قۇرايدى. وسى رەتتە، ينۆەستيسيا تارتۋعا، حالىقتى كاسىپكەرلىككە باۋلۋعا دەپۋتاتتارىمىز دا ءوز ۇلەستەرىن قوسۋى كەرەك. دەپۋتاتقا ءبىلىم، مىنەز، ەڭ باستىسى وتانشىلدىق قاجەت. وڭىردەگى 2 ميلليوننان استام حالىقتىڭ، 1 ميلليوننان استام سايلاۋشىنىڭ سەنىمىن اقتاۋ – ۇلكەن جاۋاپكەرشىلىك. ءبارىمىز بىرگە تۇركىستان ءوڭىرىنىڭ مۇددەسىن قورعاپ، وبلىستى دامىتۋ باعىتىندا جۇمىس اتقارا بەرەمىز. بارشاڭىزدى مەرەيتويمەن قۇتتىقتاي وتىرىپ، جۇمىستارىڭىزعا تابىس تىلەيمىن، – دەدى دارحان ساتىبالدى.
كونفەرەنسيانىڭ اشىلۋىندا سەنات دەپۋتاتى مۇرات قادىربەك ق ر پارلامەنتى سەناتىنىڭ ءتوراعاسى ماۋلەن اشىمبايەۆتىڭ قۇتتىقتاۋ حاتىن وقىپ بەرسە، ءماجىلىس دەپۋتاتى ەرلان ابدييەۆ ق ر پارلامەنتى ءماجىلىسىنىڭ ءتوراعاسى ەرلان قوشانوۆتىڭ ىستىق سالەمىن جەتكىزدى.
قوجا احمەت ياساۋي اتىنداعى حقتۋ رەكتورى جانار تەمىربەكوۆا مودەراتورلىق ەتكەن كونفەرەنسيادا ءماسليحاتتىڭ ءرولى، دەپۋتاتتاردىڭ بەلسەندىلىگىن ارتتىرۋ جانە وزگە دە ماسەلەلەر بويىنشا باياندامالار جاسالىپ، ۇتىمدى ويلار ايتىلدى.
سپيكەرلەر قاتارىندا ق ر ۇلتتىق عىلىم اكادەمياسىنىڭ پرەزيدەنتى مۇرات جۇرىنوۆ، «قازاقستان ءماسليحاتتارى دەپۋتاتتارى بىرلەستىگى» رقب ءتوراعاسى تولەۋبەك مۇقاشيەۆ، تۇركيانىڭ مەملەكەتتىك باسقارۋ پروفەسسورى حارۋن كىرىلماز بايانداما جاساپ، كەلەلى ويلارىن ايتتى. تۇركىستان وبلىستىق ءماسليحاتىنىڭ ءتوراعاسى نۇرالى ابىشيەۆ ءماسليحاتتاردىڭ قازىرگى جاي-كۇيى مەن اتقارعان جۇمىستارىنا توقتالىپ، ارىپتەستەرىن مەرەكەمەن قۇتتىقتادى.
قوعام قايراتكەرى ورازكۇل اسانعازى مەن قازاقستانداعى پارلامەنتاريزمدى دامىتۋ قورىنىڭ پرەزيدەنتى زاۋرەش باتتالوۆا مازمۇندى ويلارىن ءبولىسىپ، دەپۋتاتتارعا جۇكتەلگەن جاۋاپكەرشىلىك جوعارى ەكەنىن جەتكىزدى. اۋدان، قالالاردان كەلگەن جەرگىلىكتى ءماسليحات دەپۋتاتتارىنا جىگەر بەرەتىن جانە تاجىريبەسىن شىڭدايتىن ويلار ايتىپ، جۇمىستارىنا ساتتىلىك تىلەدى.
30 جىلدىق قۇرمەتىنە ارنالعان جيىندا ءبىر توپ ازاماتقا «تۇركىستان وبلىسىنىڭ قۇرمەتتى ازاماتى» اتاعىنىڭ كۋالىكتەرى تاپسىرىلىپ، قۇرمەت كورسەتىلدى. سونىمەن بىرگە وبلىستىق جانە اۋداندىق، قالالىق ءماسليحات دەپۋتاتتارىنا ق ر مينيسترلىكتەرىنىڭ، ق ر سەناتىنىڭ، «قازاقستان ءماسليحاتتارى» رقب-نىڭ ماراپاتتارى تاپسىرىلدى.
كونفەرەنسيا سوڭىندا وسى جيىنعا قاتىسقان مارتەبەلى مەيماندار مەن ەل اعالارى، دەپۋتاتتار «قازاقستان ءماسليحاتتارىنا – 30 جىل» اللەياسىنا شىنار اعاشىنىڭ كوشەتتەرىن وتىرعىزدى.
