تۇركىستان قالاسىندا قولونەر بۇيىمدارىن جاساۋ ەرتەدەن كەلە جاتقان ءۇردىس. بۇل ءىستى ودان ءارى جانداندىرۋ ماقساتىندا تۇراقتى تۇردە قولونەرشىلەر كورمەلەرى، سايىستار، ءىس-شارالار ۇيىمداستىرىلۋدا، دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
ءوڭىردىڭ قولونەر شەبەرلەرى رەسپۋبليكالىق جانە حالىقارالىق كورمەلەرگە بەلسەنە قاتىسىپ كەلەدى.
اتاپ ايتساق، 2023 جىلدىڭ 6-10 اقپان كۇندەرى ارالىعىندا قولونەر سالاسىنا زەرتتەۋ جۇمىستارى جۇرگىزىلدى. تۇركىستان قالاسى اكىمدىگىنىڭ ۇيىمداستىرۋىمەن بىرلەستىك مۇشەلەرىنەن قۇرالعان قولونەر شەبەرلەرىنىڭ دەللەگاسياسى وزبەكستان رەسپۋبليكاسىنىڭ سامارقاند قالاسى مەن فەرعانا وبلىسىندا بولدى. جۇمىس ساپارى بارىسىندا وزبەك ۇلتىنىڭ قولونەرىمەن تانىسىپ، تاجىريبيە الماستى.
قالا قولونەرشىلەرى حالىقارالىق تيۋركسوي ۇيىمىنىڭ ۇيىمداستىرۋىمەن وتكەن جىلدىڭ 4-13 مامىر كۇندەرى ارالىعىندا ازەربايجان رەسپۋبليكاسىنىڭ شۋشا قالاسىندا وتكەن «تۇركى الەمىنىڭ مادەني استاناسى – شۋشا 2023» رەسمي اشىلۋ سالتاناتىنا جانە «حارى-بيۋلبيۋل» حالىقارالىق فولكلورلىق فەستيۆالىنە قاتىستى. بۇل ءىس-شارالارعا قازاقستانمەن قاتار، وزبەكستان، تاجىكستان، قىرعىزستان سياقتى تۇركىتىلدەس مەملەكەتتەردىڭ وكىلدەرى دە بولدى. اۋقىمدى ءىس-شارادا كوپشىلىككە قازاقتىڭ ۇلتتىق تاعامدارى مەن قولونەر شەبەرلەرىنىڭ ەڭ ۇزدىك بۇيىمدارى قويىلعان كورمە-جارمەڭكەسى ۇسىنىلدى. قازاقستاندىق دەلەگاسيا جوعارى باعا الىپ، تۇركى حالقىنىڭ ىستىق ىقىلاسىنا بولەندى.
2024 جىل – قىتايداعى «قازاقستاننىڭ تۋريزم جىلى» بولىپ بەلگىلەندى. وسىعان وراي، 28-30 ناۋرىز ارالىعىندا بەيجىڭ قالاسىندا اۋقىمدى ءىس-شارالار مەن فورۋمدار ءوتتى. وعان تۇركىستان وبلىسىنىڭ تۋريزم سالاسىنىڭ وكىلدەرى مەن قولونەر وداعىنىڭ شەبەرلەر بەلسەنە قاتىستى. حالىقارالىق كورمەگە كەلۋشىلەردىڭ نازارىنا قولونەر وداعىنىڭ شەبەرلەرى مەن شاكىرتتەرىنىڭ قايتالانباس قولونەرلەر تۋىندىلارى ۇسىنىلدى.
2024 جىلدىڭ 7-9 ماۋسىم كۇندەرى تۇركىستاندا «شىعىس بازارى» تۇركى حالىقتارى قولونەر شەبەرلەرىنىڭ سيمپوزيۋمى ءوتتى. «تۇركىستان – تۇركى الەمىنىڭ تۋريستىك استاناسى» اتانۋىنا بايلانىستى ۇيىمداستىرىلعان سيمپوزيۋمعا تۇركيا، وزبەكستان، ازەربايجان، قىرعىزستان، تاجىكستان ەلدەرىنەن جانە ەلىمىزدىڭ ءار ايماعىنان وزىق ۇلگىلى 30-عا جۋىق قولونەر شەبەرى قاتىستى. حالىقارالىق شاراعا قاتىسۋشىلار زەرگەرلىك، كەراميكا، توقىما، ۇلتتىق كيىمدەر تىگۋ، قۇراق تىگۋ، كەستە تىگۋ، كيىز باسۋ، اعاش ويۋ، بىلعارىنى كوركەمدەپ وڭدەۋ جانە باسقا دا قولونەر تۇرلەرى بويىنشا قايتالانباس تۋىندىلارىن كوپشىلىك نازارىنا ۇسىندى.
قولونەرشىلەردى قولداۋ، تۇركى مەملەكەتتەر اراسىندا مادەني بايلانىستى نىعايتۋ جانە ءتۋريزمدى ودان ءارى دامىتۋ باعىتىنداعى جۇمىستار جالعاسىن تابادى.
ايتا كەتەيىك، تۇركىستان قالاسىندا «Turkistan Qol oner» وداعى قوعامدىق بىرلەستىگى جۇمىس جاسايدى. وداق قۇرامىندا 115 مۇشە بار. سونىمەن قاتار، تۇركىستان قالاسىنىڭ بالالار قولونەر مەكتەبىندە 475 وقۋشى ءوز ونەرىن شىڭداپ جاتىر.
