2025 جىلدىڭ 27-28 ناۋرىز كۇندەرى تۇركىستان قالاسىندا ءبىلىم مازمۇنىن دامىتۋ ينستيتۋتىنىڭ ۇيىمداستىرۋىمەن «جۇسىپبەك ايماۋىت ۇلىنىڭ ادىستەمەلىك مۇرالارىن جاڭعىرتۋداعى ن.ا. ورازاحىنوۆانىڭ اۆتورلىعىنداعى «ساتىلاي كەشەندى وقىتۋ» تەحنولوگياسىنىڭ ءرولى» تاقىرىبىندا حالىقارالىق سامميت ءوتتى، دەپ حابارلايدى Dalanews.kz
ءىس-شارانىڭ باستى ماقساتى – الاش زيالىسى، پەداگوگ جۇسىپبەك ايماۋىت ۇلىنىڭ ءبىلىم سالاسىنداعى قۇندى مۇرالارىن قازىرگى ءبىلىم بەرۋ جۇيەسىمەن ۇيلەستىرە وتىرىپ، «ساتىلاي كەشەندى وقىتۋ» تەحنولوگياسىنىڭ فۋنكسيونالدىق ساۋاتتىلىقتى ارتتىرۋداعى ءتيىمدى جولدارىن ايقىنداۋ بولدى. سامميتكە الماتى، استانا قالالارى، پاۆلودار، اتىراۋ، تۇركىستان وبلىستارى، سونداي-اق قىرعىزستان مەن موڭعوليادان 100-گە جۋىق ادام قاتىستى.
سامميتكە پەداگوگيكا عىلىمدارىنىڭ دوكتورى، پروفەسسور، رەسەي جاراتىلىستانۋ عىلىمدار اكادەمياسىنىڭ كوررەسپوندەنت-مۇشەسى، ق ر كىشى عىلىم اكادەمياسىنىڭ ۆيسە-پرەزيدەنتى، «ساتىلاي كەشەندى وقىتۋ» تەحنولوگياسىنىڭ اۆتورى نۇرشا الجانباي قىزى ورازاحىنوۆا قاتىسىپ، ءىس-شارانى اشىپ بەردى. ول ءوز سوزىندە جۇسىپبەك ايماۋىت ۇلىنىڭ پەداگوگيكا، پسيحولوگيا جانە ادىستەمە سالاسىنداعى ەڭبەكتەرىنىڭ بۇگىنگى كۇنى دە وزەكتىلىگىن جوعالتپاي وتىرعانىن اتاپ ءوتىپ، بۇل ەڭبەكتەردىڭ ءبىلىم سالاسىنداعى ماڭىزى مەن ورنى زور ەكەنىن جانە زاماناۋي ءبىلىم بەرۋ جۇيەسىمەن ۇيلەسىمدىلىگىن ارتتىرۋ قاجەتتىلىگىن ايتتى.
سامميت اياسىندا جۇسىپبەك ايماۋىت ۇلىنىڭ پەداگوگيكالىق جانە پسيحولوگيالىق ەڭبەكتەرىنىڭ ءوزارا ۇيلەسىم تاپقان تاجىريبەلەرى ۇسىنىلدى. ۇلتتىق قۇندىلىقتاردى دارىپتەۋ، وقۋشىلاردى فۋنكسيونالدىق ساۋاتتىلىققا بەيىمدەۋ، سونداي-اق ءبىلىم ساپاسىن ارتتىرۋ جولدارى جان-جاقتى تالقىلاندى. بۇل تەحنولوگيانىڭ ءبىلىم بەرۋ جۇيەسىندەگى ىقپالى، سونىڭ ىشىندە وقۋشىنىڭ جان-جاقتى دامۋىنا تيگىزەر پايداسى تۋرالى پىكىر الماسۋ بولدى.
«جۇسىپبەك ايماۋىت ۇلىنىڭ مۇراسى – بۇگىنگى ءبىلىم بەرۋ جۇيەسىمەن ۇيلەسىمدى تۇردە قولدانىسقا ەنگىزىلگەندە، وقۋ ۇدەرىسىنىڭ ساپاسىن ارتتىرۋعا ىقپال ەتەتىن قۇندى رەسۋرس بولاتىنى انىق. ۇلتتىق قۇندىلىقتاردى ساقتاي وتىرىپ، جاڭا ادىس-تاسىلدەردى قولدانۋ ارقىلى ءبىز زاماناۋي ءبىلىم بەرۋدە ۇلكەن جەتىستىكتەرگە جەتە الامىز. بۇگىنگى سامميت – وسىنداي ماڭىزدى يدەيالار مەن ماقساتتاردى جۇزەگە اسىرۋعا باعىتتالعان ماڭىزدى قادام»، – دەپ اتاپ ءوتتى ءبىلىم مازمۇنىن دامىتۋ ينستيتۋتىنىڭ قۇرىلتايشىسى، ديرەكتورى راقىمبەردى جەتىباي.
سونىمەن قاتار، سامميت اياسىندا 28 ناۋرىزدا «ءتىلىم مەنىڭ – تىرلىگىمنىڭ ايعاعى» تاقىرىبىندا اۋىزشا كوماندالىق وليمپيادا وتەدى. وليمپياداعا جالپى سانى 106 وقۋشى مەن 57 جەتەكشى قاتىسادى دەپ جوسپارلانۋدا. بۇل شارا وقۋشىلاردىڭ قازاق تىلىنە دەگەن قۇرمەتىن ارتتىرىپ، ۇلتتىق قۇندىلىقتاردى دارىپتەۋگە باعىتتالعان ماڭىزدى قادام بولىپ تابىلادى.
حالىقارالىق دەڭگەيدە ۇيىمداستىرىلعان بۇل سامميت پەداگوگيكالىق مۇرالاردى قازىرگى ءبىلىم بەرۋ ستاندارتتارىنا ءتيىمدى تۇردە ينتەگراسيالاۋدىڭ جارقىن ۇلگىسىن كورسەتىپ، ماڭىزدى قادام بولدى.
