جاڭا ورتالىقتىڭ اشىلۋ سالتاناتىنا تۇركىستان وبلىسىنىڭ اكىمى ءومىرزاق شوكەيەۆ، «ازاماتتارعا ارنالعان ۇكىمەت» مەملەكەتتىك كورپوراسياسىنىڭ ءتوراعاسىنىڭ ورىنباسارى ءبىرجان ءجۇنىسوۆ، «ازاماتتارعا ارنالعان ۇكىمەت» مەملەكەتتىك كورپوراسياسىنىڭ تۇركىستان وبلىسى بويىنشا فيليالىنىڭ ديرەكتورى ەرجان جەڭىسبەكوۆ، تۇركىستان وبلىستىق پوليسيا دەپارتامەنتىنىڭ باسشىسى قايرات دالبەكوۆ قاتىستى.
«ازاماتتارعا ارنالعان ۇكىمەت» مەملەكەتتىك كورپوراسياسىنىڭ ءتوراعاسىنىڭ ورىنباسارى ءبىرجان ءجۇنىسوۆ ورتالىقتىڭ اشىلۋىمەن قۇتتىقتاپ، ورتالىقتىڭ ماقساتىن كەڭ كولەمدى ءتۇسىندىرىپ ءوتتى.
– بۇرىن شەتەلدىكتەر جۇمىس ىستەۋگە رۇقسات الۋ ءۇشىن، بىرنەشە كۇن ءتۇرلى مەكەمەنى ارالاۋعا ءماجبۇر ەدى. ەندى ولار جسن الۋ، سالىق تولەۋ، مەديسينالىق تەكسەرىستەن، داكتيلوسكوپيادان ءوتۋ، ساقتاندىرۋ انىقتاماسىنا قول جەتكىزۋ سەكىلدى قۇجاتتاردى ءبىر جەردە، ءبىر ساعاتتىڭ ىشىندە راسىمدەۋ مۇمكىندىگىنە يە بولدى. مەملەكەتتىك قىزمەتتەر بەلگىلەنگەن ۋاقىت رەگلامەنتىنە ساي ەلەكتروندىق كەزەك ارقىلى ارنايى جابدىقتالعان جۇمىس ورىندارىندا جۇزەگە اسىرىلادى. بۇل ميگرانتتار ءۇشىن عانا ەمەس، جۇمىس بەرۋشى ءۇشىن دە وتە قولايلى. جاڭا محقو جۇمىس بارىسىن جەڭىلدەتىپ قانا قويماي، سىبايلاس جەمقورلىق ارەكەتتەرىنىڭ الدىن-الۋعا جول اشادى، – دەدى ءبىرجان ءجۇنىسوۆ.
سونىمەن قاتار، بيىلعى جىلدىڭ اقپان ايىنان باستاپ «ازاماتتارعا ارنالعان ۇكىمەت» مەملەكەتتىك كورپوراسياسىنىڭ ميگراسيالىق حقو-سى ارقىلى كورسەتىلەتىن قىزمەتتەر سانى تولىقتى. ەندى قازاقستان رەسپۋبليكاسىنا ۋاقىتشا كەلەتىن شەتەلدىكتەر مەن ازاماتتىعى جوق ادامدار كوشى-قون قىزمەتتەرى ورتالىعىنىڭ قىزمەتىنە جۇگىنەتىن بولادى. وسىعان دەيىن بۇل قىزمەت تەك ق ر ءىىم كوشى-قون كوميتەتى تاراپىنان كورسەتىلگەن بولاتىن. ەندى جاڭا قىزمەت ءتۇرىن پايدالانۋ ءۇشىن شەتەلدىك ازاماتتىڭ وزىمەن بىرگە كەلەسى قۇجاتتارى بولۋى ءتيىس. اتاپ ايتساق، ق ر ايماعىنا كىرۋگە ۆيزاسى بار شەتەلدىكتىڭ نە ازاماتتىعى جوق ادامنىڭ جەكە باسىن كۋالاندىراتىن جارامدى قۇجاتى، شەكارانى كەسىپ وتكەنى تۋرالى بەلگىسى بار كوشى-قون كارتوچكاسى، ەركىن تۇردە جازىلعان قولداۋحات.
بۇدان باسقا، قىزمەت الۋشىلار ق ر ايماعىنا 6 ايدان ارتىق مەرزىمگە كەلەتىن بولسا، قوسىمشا تولتىرىلعان 2 مەكەنجايعا كەلۋ پاراعىن، كەلۋ پاراعىنا تولتىرىلعان ستاتيستيكالىق ەسەپكە الۋ تالونى مەن 3،5*4،5 كولەمىندەگى ءبىر فوتوسۋرەت تاپسىرۋى كەرەك. سونداي-اق، جاڭادان قوسىلعان قىزمەتتەن بولەك، مۇندا شەتەلدىكتەر جۇمىس ىستەۋگە رۇقسات بەرەتىن قۇجاتتى الىپ، ق ر اۋماعىنا ۋاقىتشا كەلەتىندەر جەكە سايكەستەندىرۋ ءنومىرىن راسىمدەي الادى.
ايتا كەتەيىك، تۇركىستان وبلىسىندا بيىلعى جىلدىڭ باسىنان بەرى ميگراسيا باعىتى بويىنشا 36 728 قىزمەت كورسەتىلگەن. جاڭا فرونت-وفيس تۇركىستان قالاسى 160 كۆارتال 209-شى عيماراتتا ورنالاسقان. عيمارات قىزمەت الۋشىلارعا دۇيسەنبىدەن سەنبى كۇندەرى ارالىعىندا تاڭعى ساعات 09.00-دەن كەشكى ساعات 20.00-گە دەيىن قىزمەت كورسەتەدى.
تۇركىستان وبلىسى اكىمىنىڭ باسپا ءسوز قىزمەتى
