مەملەكەت باسشىسى قاسىم-جومارت كەمەل ۇلى توقايەۆتىڭ «زاڭ مەن ءتارتىپ» قاعيداتىن ىسكە اسىرۋ نەگىزىندە تۇركىستان وبلىسى پوليسيا دەپارتامەنتى مەن وبلىس پروكۋراتۋراسىنىڭ باستاماسىمەن «كيبەرالاياقتىق: الدىن الۋ، قورعاۋ، جاۋاپكەرشىلىك» تاقىرىبىندا 1000 ادامنىڭ قاتىسۋىمەن اۋقىمدى رەسپۋبليكالىق فورۋم ءوتتى، دەپ حابارلايدى Dalanews.kz
العاش بولىپ جينالعاندارعا سۋ جاڭا ءىت-جابدىقتارى مەن روبوتوتەحنيكا قۇرالدارىنىڭ كورمەسى ۇسىنىلدى. ودان ءارى بۇگىنگى تاڭدا كوپ كەزدەسىپ جاتقان الاياقتارعا الدانۋدىڭ تۇرلەرى كورسەتىلگەن تەاترلاندىرىلعان قويىلىم قويىلدى.
ماقسات-تۇرعىندارعا وي سالىپ، الاياقتارعا الدانباۋعا شاقىرۋ، قاراپايىم قاۋىپسىزدىك شارالارىن ۇستانۋ.
ءىس-شارادا وبلىس اكىمىنىڭ ءبىرىنشى ورىنباسارى زۇلفۇحار جولداسوۆ، پوليسيا دەپارتامەنتىنىڭ باستىعى مۇرات قابدەنوۆ، وبلىس پروكۋرورى مۇرات تىلەۋبەردييەۆ ءسوز الىپ، وڭىردەگى الاياقتىق قىلمىسىنىڭ الدىن الۋ بويىنشا اتقارىلىپ جاتقان جۇمىستارعا كەڭىنەن توقتالدى.
سونداي-اق ق ر ءىىم-نىڭ كيبەرقىلمىسقا قارسى ءىس-قيمىل دەپارتامەنتىنىڭ باستىعى جاندوس ءسۇيىنباي، تۇركىستان وبلىسى بويىنشا ەكونوميكالىق تەرگەپ-تەكسەرۋ دەپارتامەنتىنىڭ باستىعى ەربولات بالعابايەۆ، «CYBERLABS» ءجشس-نىڭ وكىلى ادىلەت حامزين، «Digital road» IT-يندۋسترياسىنىڭ كاسىپكەرلەر اسسوسياسياسىنىڭ وكىلى سەيدۋللا يسمايلوۆتار، جينالعان جۇرتشىلىققا الاياقتارعا الدانباۋدىڭ ادىس-تاسىلدەرىن كورسەتىپ، بۇرىن سوڭدى ايتىلماعان ماعلۇماتتارمەن ءبولىستى.
وبلىس اكىمدىگى، قۇقىق قورعاۋ ورگاندارىنىڭ ءبىرىنشى باسشىلارى، زيالى قاۋىم، بانك قىزمەتكەرلەرى، كرەديتورلىق مەكەمەلەر مەن باسقا دا تۇلعالار قاتىسىپ، اشىق پىكىر الماسۋ ورىن الدى.
ستاتيستيكاعا كوز جۇگىرتەر بولساق، وبلىستىق پوليسيا دەپارتامەنتىندە قۇرىلعان كيبەرپول باسقارماسىنىڭ قىزمەتكەرلەرىمەن «ينتەرنەت-الاياقتىق» قىلمىستارىنىڭ 113 دەرەگى سوتقا جولداندى. 3 قىلمىستىق توپ قۇرىقتالىپ، ولاردىڭ 38 ەپيزودتى قىلمىستىق ىستەرگە قاتىستىلىعى انىقتالدى. ناتيجەسىندە جابىرلەنۋشىلەرگە 269 ملن. تەڭگە قايتارىلدى.
سونداي-اق 200-دەن استام قىلمىسقا قاتىستىلىعى بار 13 كۇدىكتىدەن تۇراتىن ۇيىمداسقان قىلمىستىق توپ قۇرىقتالىپ، سوتقا دەيىنگى تەرگەۋ جالعاسۋدا.
قىلمىسپەن كۇرەسۋدىڭ ءتيىمدى تاسىلى-پروفيلاكتيكا دەسەك، پوليسيا دەپارتامەنتى مەن حالىقارالىق قازاق-تۇرىك ۋنيۆەرسيتەتى اراسىندا جاسالعان مەموراندۋم اياسىندا، پوليسيا قىزمەتكەرلەرىمەن ستۋدەنتتەر بىرلەسىپ، «كيبەرنادزور» جۇيەسى ارقىلى 2 مىڭ قۇقىققا قايشى كونتەنتتى بۇعاتتادى.
بۇل شارالاردىڭ بارلىعى حالىقتىڭ قارجىلىق ساۋاتتىلىعىن ارتتىرۋ مەن الدانىپ قالۋدان ساق بولۋى ماقساتىندا جاسالۋدا. ايتا كەتۋ كەرەك بۇل ءىس-شارا وبلىسقا قاراستى 17 اۋداندا جالعاساتىن بولادى.
فورۋم سوڭىندا ەلىمىزگە بەلگىلى ءانشى ەركىن نۇرجانوۆ رۋحتى ءان شىرقاپ، جينالعاندارعا كوڭىل-كۇي سىيلادى.
